EeseDharmaSanātana Library
15अध्याय 15
Śukla Yajurveda Mādhyaṃdina ka Adhyay 15.
63 shlokअग्ने॑ जा॒तान् प्र णु॑दा नः स॒पत्ना॒न् प्रत्यजा॑तान् नुद जातवेदः।
अधि॑ नो ब्रूहि सु॒मना॒ अहे॑डँ॒स्तव॑ स्याम॒ शर्मँ॑स्त्रि॒वरू॑थ उ॒द्भौ ।। १ ।।
agne॑ jā॒tān pra ṇu॑dā naḥ sa॒patnā॒n pratyajā॑tān nuda jātavedaḥ | adhi॑ no brūhi su॒manā॒ ahe॑ḍam॒̐stava॑ syāma॒ śarmam̐॑stri॒varū॑tha u॒dbhau | | १ | |
सह॑सा जा॒तान् प्र णु॑दा नः स॒पत्ना॒न् प्रत्यजा॑ताञ्जातवेदो नुदस्व ।
अधि॑ नो ब्रूहि सुमन॒स्यमा॑नो व॒यᳪ स्या॑म॒ प्र णु॑दा नः स॒पत्ना॑न् ।। २ ।।
saha॑sā jā॒tān pra ṇu॑dā naḥ sa॒patnā॒n pratyajā॑tāñjātavedo nudasva | adhi॑ no brūhi sumana॒syamā॑no va॒yaᳪ syā॑ma॒ pra ṇu॑dā naḥ sa॒patnā॑n | | २ | |
षो॒ड॒शी स्तोम॒ ओजो॒ द्रवि॑णं चतुश्चत्वारि॒ᳪश स्तोमो॒ वर्चो॒ द्रवि॑णम् ।
अ॒ग्नेः पुरी॑षम॒स्यप्सो॒ नाम॒ तां त्वा॒ विश्वे॑ अ॒भि गृ॑णन्तु दे॒वाः ।
स्तोम॑पृष्ठा घृ॒तव॑ती॒ह सी॑द प्र॒जाव॑द॒स्मे द्रवि॒णा य॑जस्व ।। ३ ।।
ṣo॒ḍa॒śī stoma॒ ojo॒ dravi॑ṇaṃ catuścatvāri॒ᳪśa stomo॒ varco॒ dravi॑ṇam | a॒gneḥ purī॑ṣama॒syapso॒ nāma॒ tāṃ tvā॒ viśve॑ a॒bhi gṛ॑ṇantu de॒vāḥ | stoma॑pṛṣṭhā ghṛ॒tava॑tī॒ha sī॑da pra॒jāva॑da॒sme dravi॒ṇā ya॑jasva | | ३ | |
एव॒श्छन्दो॒ वरि॑व॒श्छन्द॑: श॒म्भूश्छन्द॑: परि॒भूश्छन्द॑ आ॒च्छच्छन्दो॒ मन॒श्छन्दो॒
व्यच॒श्छन्द॒: सिन्धु॒श्छन्द॑: समु॒द्रश्छन्द॑:सरि॒रं छन्द॑: क॒कुप्छन्द॑स्त्रिक॒कुप्छन्द॑: का॒व्यं छन्दो॒
अङ्कु॒॒पं छन्दो॒ ऽक्षर॑पङ्क्ति॒श्छन्द॑: प॒दप॑ङ्क्ति॒श्छन्दो॑ विष्टा॒रप॑ङ्क्ति॒श्छन्द॑: क्षु॒रो भ्रज॒श्छन्द॑: ।। ४ ।।
eva॒śchando॒ vari॑va॒śchanda॑: śa॒mbhūśchanda॑: pari॒bhūśchanda॑ ā॒cchacchando॒ mana॒śchando॒ vyaca॒śchanda॒: sindhu॒śchanda॑: samu॒draśchanda॑:sari॒raṃ chanda॑: ka॒kupchanda॑strika॒kupchanda॑: kā॒vyaṃ chando॒ aṅku॒॒paṃ chando॒ ’kṣara॑paṅkti॒śchanda॑: pa॒dapa॑ṅkti॒śchando॑ viṣṭā॒rapa॑ṅkti॒śchanda॑: kṣu॒ro bhraja॒śchanda॑: | | ४ | |
आ॒च्छच्छन्द॑: प्र॒च्छच्छन्द॑: सं॒यच्छन्दो॑ वि॒यच्छन्दो॑ बृ॒हच्छन्दो॑ रथन्त॒रञ्छन्दो॑ निका॒यश्छन्दो॑
विवधश्छन्दो॒ गिर॒श्छन्दो॒ भ्रज॒श्छन्द॑: स॒ᳪस्तुप्छन्दो॑ ऽनु॒ष्टुप्छन्द॒ एव॒श्छन्दो॒ वरि॑व॒श्छन्दो॒ वय॒श्छन्दो॑ वय॒स्कृच्छन्दो॒ विष्प॑र्धा॒श्छन्दो॑
विशा॒लं छन्द॑श्छ॒दिश्छन्दो॑ दूरोह॒णं छन्द॑स्त॒न्द्रं छन्दो॑ अङ्का॒ङ्कं छन्द॑: ।। ५ ।।
ā॒cchacchanda॑: pra॒cchacchanda॑: saṃ॒yacchando॑ vi॒yacchando॑ bṛ॒hacchando॑ rathanta॒rañchando॑ nikā॒yaśchando॑ vivadhaśchando॒ gira॒śchando॒ bhraja॒śchanda॑: sa॒ᳪstupchando॑ ’nu॒ṣṭupchanda॒ eva॒śchando॒ vari॑va॒śchando॒ vaya॒śchando॑ vaya॒skṛcchando॒ viṣpa॑rdhā॒śchando॑ viśā॒laṃ chanda॑ścha॒diśchando॑ dūroha॒ṇaṃ chanda॑sta॒ndraṃ chando॑ aṅkā॒ṅkaṃ chanda॑: | | ५ | |
र॒श्मिना॑ स॒त्याय॑ स॒त्यं जि॑न्व॒ प्रेति॑ना॒ धर्म॑णा॒ धर्मं॑ जि॒न्वान्वि॑त्या दि॒वा दिवं॑ जिन्व स॒न्धिना॒ऽन्तरि॑क्षेणा॒न्तरि॑क्षं जिन्व प्रति॒धिना॑ पृथि॒व्या पृ॑थि॒वीं जि॑न्व विष्ट॒म्भेन॒ वृष्ट्या॒ वृष्टिं॑ जिन्व प्र॒वयाऽह्नाऽह॑र्जिन्वानु॒या रात्र्या॒ रात्रीं॑ जिन्वो॒शिजा॒ वसु॑भ्यो॒ वसू॑ञ्जिन्व प्रके॒तेना॑दि॒त्येभ्य॑ आदि॒त्याञ्जि॑न्व ।। ६ ।।
ra॒śminā॑ sa॒tyāya॑ sa॒tyaṃ ji॑nva॒ preti॑nā॒ dharma॑ṇā॒ dharmaṃ॑ ji॒nvānvi॑tyā di॒vā divaṃ॑ jinva sa॒ndhinā॒’ntari॑kṣeṇā॒ntari॑kṣaṃ jinva prati॒dhinā॑ pṛthi॒vyā pṛ॑thi॒vīṃ ji॑nva viṣṭa॒mbhena॒ vṛṣṭyā॒ vṛṣṭiṃ॑ jinva pra॒vayā’hnā’ha॑rjinvānu॒yā rātryā॒ rātrīṃ॑ jinvo॒śijā॒ vasu॑bhyo॒ vasū॑ñjinva prake॒tenā॑di॒tyebhya॑ ādi॒tyāñji॑nva | | ६ | |
तन्तु॑ना रा॒यस्पोषे॑ण रा॒यस्पोषं॑ जिन्व सᳪस॒र्पे॑ण श्रु॒ताय॑ श्रु॒तं जि॑न्वै॒डेनौ॑षधीभि॒रोष॑धीर्जिन्वोत्त॒मेन॑ त॒नूभि॑स्त॒नूर्जि॑न्व व॑यो॒धसाधी॑ते॒नाधी॑तं जिन्वाभि॒जिता॒ तेज॑सा॒ तेजो॑ जिन्व ।। ७ ।।
tantu॑nā rā॒yaspoṣe॑ṇa rā॒yaspoṣaṃ॑ jinva saᳪsa॒rpe॑ṇa śru॒tāya॑ śru॒taṃ ji॑nvai॒ḍenau॑ṣadhībhi॒roṣa॑dhīrjinvotta॒mena॑ ta॒nūbhi॑sta॒nūrji॑nva va॑yo॒dhasādhī॑te॒nādhī॑taṃ jinvābhi॒jitā॒ teja॑sā॒ tejo॑ jinva | | ७ | |
प्रति॒पद॑सि प्रति॒पदे॑ त्वा ऽनु॒पद॑स्यनु॒पदे॑ त्वा स॒म्पद॑सि स॒म्पदे॑ त्वा तेजो॑ऽसि॒ तेज॑से त्वा ।। ८ ।।
prati॒pada॑si prati॒pade॑ tvā ’nu॒pada॑syanu॒pade॑ tvā sa॒mpada॑si sa॒mpade॑ tvā tejo॑’si॒ teja॑se tvā | | ८ | |
त्रि॒वृद॑सि त्रि॒वृते॑ त्वा प्र॒वृद॑सि प्र॒वृते॑ त्वा वि॒वृद॑सि वि॒वृते॑ त्वा स॒वृद॑सि स॒वृते॑ त्वा
ऽऽक्र॒मो॒ऽस्याक्र॒माय॑ त्वा संक्र॒मो॒ऽसि संक्र॒माय॑ त्वोत्क्र॒मो॒ऽस्युत्क्र॒माय॒ त्वोत्क्रा॑न्तिर॒स्युत्क्रा॑न्त्यै॒ त्वा
ऽधि॑पतिनो॒र्जोर्जं॑ जिन्व ।। ९ ।।
tri॒vṛda॑si tri॒vṛte॑ tvā pra॒vṛda॑si pra॒vṛte॑ tvā vi॒vṛda॑si vi॒vṛte॑ tvā sa॒vṛda॑si sa॒vṛte॑ tvā ’’kra॒mo॒’syākra॒māya॑ tvā saṃkra॒mo॒’si saṃkra॒māya॑ tvotkra॒mo॒’syutkra॒māya॒ tvotkrā॑ntira॒syutkrā॑ntyai॒ tvā ’dhi॑patino॒rjorjaṃ॑ jinva | | ९ | |
राज्ञ्य॑सि॒ प्राची॒ दिग्वस॑वस्ते दे॒वा अधि॑पतयो॒ऽग्निर्हे॑ती॒नां प्र॑तिध॒र्ता त्रि॒वृत् त्वा॒ स्तोम॑: पृथि॒व्याᳪ श्र॑य॒त्वाज्य॑मु॒क्थमव्य॑थायै स्तभ्नातु रथन्त॒रᳪ साम॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।। १ ०।।
वि॒राड॑सि॒ दक्षि॑णा॒ दिग्रु॒द्रास्ते॑ दे॒वा अधि॑पतय॒ इन्द्रो॑ हेती॒नां प्र॑तिध॒र्ता प॑ञ्चद॒स्त्वा॒ स्तोम॑: पृथि॒व्याᳪश्र॑यतु॒ प्र उ॑गमु॒क्थमव्य॑थायै स्तभ्नातु बृ॒हत्साम॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।। ११ ।।
rājñya॑si॒ prācī॒ digvasa॑vaste de॒vā adhi॑patayo॒’gnirhe॑tī॒nāṃ pra॑tidha॒rtā tri॒vṛt tvā॒ stoma॑: pṛthi॒vyāᳪ śra॑ya॒tvājya॑mu॒kthamavya॑thāyai stabhnātu rathanta॒raᳪ sāma॒ prati॑ṣṭhityā a॒ntari॑kṣa॒ ṛṣa॑yastvā prathama॒jā de॒veṣu॑ di॒vo mātra॑yā vari॒mṇā pra॑thantu vidha॒rtā cā॒yamadhi॑patiśca॒ te tvā॒ sarve॑ saṃvidā॒nā nāka॑sya pṛ॒ṣṭhe sva॒rge lo॒ke yaja॑mānaṃ ca sādayantu | | १ ० | | vi॒rāḍa॑si॒ dakṣi॑ṇā॒ digru॒drāste॑ de॒vā adhi॑pataya॒ indro॑ hetī॒nāṃ pra॑tidha॒rtā pa॑ñcada॒stvā॒ stoma॑: pṛthi॒vyāᳪśra॑yatu॒ pra u॑gamu॒kthamavya॑thāyai stabhnātu bṛ॒hatsāma॒ prati॑ṣṭhityā a॒ntari॑kṣa॒ ṛṣa॑yastvā prathama॒jā de॒veṣu॑ di॒vo mātra॑yā vari॒mṇā pra॑thantu vidha॒rtā cā॒yamadhi॑patiśca॒ te tvā॒ sarve॑ saṃvidā॒nā nāka॑sya pṛ॒ṣṭhe sva॒rge lo॒ke yaja॑mānaṃ ca sādayantu | | ११ | |
स॒म्राड॑सि प्र॒तीची॒ दिगा॑दि॒त्यास्ते॑ दे॒वा अधि॑पतयो॒ वरु॑णो हेती॒नां प्र॑तिध॒र्ता स॑प्तद॒शस्त्वा॒ स्तोम॑: पृथि॒व्याᳪ श्र॑यतु मरुत्व॒तीय॑मु॒क्थमव्य॑थायै स्तभ्नातु वैरू॒पᳪसाम॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।। १२ ।।
sa॒mrāḍa॑si pra॒tīcī॒ digā॑di॒tyāste॑ de॒vā adhi॑patayo॒ varu॑ṇo hetī॒nāṃ pra॑tidha॒rtā sa॑ptada॒śastvā॒ stoma॑: pṛthi॒vyāᳪ śra॑yatu marutva॒tīya॑mu॒kthamavya॑thāyai stabhnātu vairū॒paᳪsāma॒ prati॑ṣṭhityā a॒ntari॑kṣa॒ ṛṣa॑yastvā prathama॒jā de॒veṣu॑ di॒vo mātra॑yā vari॒mṇā pra॑thantu vidha॒rtā cā॒yamadhi॑patiśca॒ te tvā॒ sarve॑ saṃvidā॒nā nāka॑sya pṛ॒ṣṭhe sva॒rge lo॒ke yaja॑mānaṃ ca sādayantu | | १२ | |
स्व॒राड॒स्युदी॒ची॒ दिङ्म॒रुत॑स्ते दे॒वा अधि॑पतय॒: सोमो॑ हेती॒नां प्र॑तिध॒र्तैक॑वि॒ᳪशस्त्वा॒ स्तोम॑: पृथि॒व्याᳪ श्र॑यतु॒ निष्के॑वल्यमु॒क्थमव्य॑थायै स्तभ्नातु वैरा॒जँ साम॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।। १३ ।।
sva॒rāḍa॒syudī॒cī॒ diṅma॒ruta॑ste de॒vā adhi॑pataya॒: somo॑ hetī॒nāṃ pra॑tidha॒rtaika॑vi॒ᳪśastvā॒ stoma॑: pṛthi॒vyāᳪ śra॑yatu॒ niṣke॑valyamu॒kthamavya॑thāyai stabhnātu vairā॒jam̐ sāma॒ prati॑ṣṭhityā a॒ntari॑kṣa॒ ṛṣa॑yastvā prathama॒jā de॒veṣu॑ di॒vo mātra॑yā vari॒mṇā pra॑thantu vidha॒rtā cā॒yamadhi॑patiśca॒ te tvā॒ sarve॑ saṃvidā॒nā nāka॑sya pṛ॒ṣṭhe sva॒rge lo॒ke yaja॑mānaṃ ca sādayantu | | १३ | |
अधि॑पत्न्यसि बृह॒ती दिग्विश्वे॑ ते दे॒वा अधि॑पतयो॒ बृह॒स्पति॑र्हेती॒नां प्र॑तिध॒र्ता त्रि॑णवत्रयस्त्रि॒ᳪशौ त्वा॒ स्तोमौ॑ पृथि॒व्याᳪ श्र॑यतां वैश्वदेवाग्निमारु॒ते उ॒क्थे अव्य॑थायै स्तभ्नीताᳪ शाक्वररैव॒ते साम॑नी॒ प्रति॑ष्ठित्या अ॒न्तरि॑क्ष॒ ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु ।। १४ ।।
adhi॑patnyasi bṛha॒tī digviśve॑ te de॒vā adhi॑patayo॒ bṛha॒spati॑rhetī॒nāṃ pra॑tidha॒rtā tri॑ṇavatrayastri॒ᳪśau tvā॒ stomau॑ pṛthi॒vyāᳪ śra॑yatāṃ vaiśvadevāgnimāru॒te u॒kthe avya॑thāyai stabhnītāᳪ śākvararaiva॒te sāma॑nī॒ prati॑ṣṭhityā a॒ntari॑kṣa॒ ṛṣa॑yastvā prathama॒jā de॒veṣu॑ di॒vo mātra॑yā vari॒mṇā pra॑thantu vidha॒rtā cā॒yamadhi॑patiśca॒ te tvā॒ sarve॑ saṃvidā॒nā nāka॑sya pṛ॒ṣṭhe sva॒rge lo॒ke yaja॑mānaṃ ca sādayantu | | १४ | |
अ॒यं पु॒रो हरि॑केश॒: सूर्य॑रश्मि॒स्तस्य॑ रथगृ॒त्सश्च॒ रथौ॑जाश्च सेनानीग्राम॒ण्यौ॒ |
पु॒ञ्जि॒क॒स्थ॒ला च॑ क्रतुस्थ॒ला चा॑प्स॒रसौ॑ द॒ङ्क्ष्णव॑: प॒शवो॑ हे॒तिः पौ॑रुषेयो व॒धः प्रहे॑ति॒स्तेभ्यो॒ नमो॑ अस्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। १५ ।।
a॒yaṃ pu॒ro hari॑keśa॒: sūrya॑raśmi॒stasya॑ rathagṛ॒tsaśca॒ rathau॑jāśca senānīgrāma॒ṇyau॒ | pu॒ñji॒ka॒stha॒lā ca॑ kratustha॒lā cā॑psa॒rasau॑ da॒ṅkṣṇava॑: pa॒śavo॑ he॒tiḥ pau॑ruṣeyo va॒dhaḥ prahe॑ti॒stebhyo॒ namo॑ astu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | १५ | |
अ॒यं द॑क्षि॒णा वि॒श्वक॑र्मा॒ तस्य॑ रथस्व॒नश्च॒ रथे॑चित्रश्च सेनानीग्राम॒ण्यौ॒ ।
मे॒न॒का च॑ सहज॒न्या चा॑प्स॒रसौ॑ यातुधा॒ना हे॒ती रक्षा॑ᳪसि॒ प्रहे॑ति॒स्तेभ्यो॒ नमो॑ अस्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। १६ ।।
a॒yaṃ da॑kṣi॒ṇā vi॒śvaka॑rmā॒ tasya॑ rathasva॒naśca॒ rathe॑citraśca senānīgrāma॒ṇyau॒ | me॒na॒kā ca॑ sahaja॒nyā cā॑psa॒rasau॑ yātudhā॒nā he॒tī rakṣā॑ᳪsi॒ prahe॑ti॒stebhyo॒ namo॑ astu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | १६ | |
अ॒यं प॒श्चाद्वि॒श्वव्य॑चा॒स्तस्य॒ रथ॑प्रो॒तश्चास॑मरथश्च सेनानीग्राम॒ण्यौ॒ ।
प्र॒म्लोच॑न्ती चानु॒म्लोच॑न्ती चाप्स॒रसौ॑ व्या॒घ्रा हे॒तिः स॒र्पा: प्रहे॑ति॒स्तेभ्यो॒ नमो अ॑स्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। १७ ।।
a॒yaṃ pa॒ścādvi॒śvavya॑cā॒stasya॒ ratha॑pro॒taścāsa॑marathaśca senānīgrāma॒ṇyau॒ | pra॒mloca॑ntī cānu॒mloca॑ntī cāpsa॒rasau॑ vyā॒ghrā he॒tiḥ sa॒rpā: prahe॑ti॒stebhyo॒ namo a॑stu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | १७ | |
अ॒यमु॑त्त॒रात्सं॒यद्व॑सु॒स्तस्य॒ तार्क्ष्य॒श्चारि॑ष्टनेमिश्च सेनानीग्राम॒ण्यौ॒ ।
वि॒श्वाची॑ च घृ॒ताची॑ चाप्स॒रसा॒वापो॑ हे॒तिर्वात॒: प्रहे॑ति॒स्तेभ्यो॒ नमो॑ अस्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। १८ ।।
a॒yamu॑tta॒rātsaṃ॒yadva॑su॒stasya॒ tārkṣya॒ścāri॑ṣṭanemiśca senānīgrāma॒ṇyau॒ | vi॒śvācī॑ ca ghṛ॒tācī॑ cāpsa॒rasā॒vāpo॑ he॒tirvāta॒: prahe॑ti॒stebhyo॒ namo॑ astu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | १८ | |
अ॒यमु॒पर्य॒र्वाग्व॑सु॒स्तस्य॑ सेन॒जिच्च॑ सु॒षेण॑श्च सेनानीग्राम॒ण्यौ॒ ।
उ॒र्वशी॑ च पू॒र्वचि॑त्तिश्चाप्स॒रसा॑वब॒स्फूर्ज॑न् हे॒तिर्वि॒द्युत्प्रहे॑ति॒स्तेभ्यो॒ नमो॑ अस्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। १९ ।।
a॒yamu॒parya॒rvāgva॑su॒stasya॑ sena॒jicca॑ su॒ṣeṇa॑śca senānīgrāma॒ṇyau॒ | u॒rvaśī॑ ca pū॒rvaci॑ttiścāpsa॒rasā॑vaba॒sphūrja॑n he॒tirvi॒dyutprahe॑ti॒stebhyo॒ namo॑ astu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | १९ | |
अ॒ग्निर्मू॒र्धा दि॒वः क॒कुत्पति॑: पृथि॒व्या अ॒यम् ।
अ॒पाᳪ रेता॑ᳪसि जिन्वति ।। २० ।।
a॒gnirmū॒rdhā di॒vaḥ ka॒kutpati॑: pṛthi॒vyā a॒yam | a॒pāᳪ retā॑ᳪsi jinvati | | २० | |
अ॒यम॒ग्निः स॑ह॒स्रिणो॒ वाज॑स्य श॒तिन॒स्पति॑: । मू॒र्धा क॒वी र॑यी॒णाम् ।। २१ ।।
a॒yama॒gniḥ sa॑ha॒sriṇo॒ vāja॑sya śa॒tina॒spati॑: | mū॒rdhā ka॒vī ra॑yī॒ṇām | | २१ | |
त्वाम॑ग्ने॒ पुष्क॑रा॒दध्यथ॑र्वा॒ निर॑मन्थत । मू॒र्ध्नो विश्व॑स्य वा॒घत॑: ।। २२ ।।
tvāma॑gne॒ puṣka॑rā॒dadhyatha॑rvā॒ nira॑manthata | mū॒rdhno viśva॑sya vā॒ghata॑: | | २२ | |
भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भि॒: सच॑से शि॒वाभि॑: ।
दि॒वि मू॒र्धानं॑ दधिषे स्व॒र्षां जि॒ह्वाम॑ग्ने चकृषे हव्य॒वाह॑म् ।। २३ ।।
bhuvo॑ ya॒jñasya॒ raja॑saśca ne॒tā yatrā॑ ni॒yudbhi॒: saca॑se śi॒vābhi॑: | di॒vi mū॒rdhānaṃ॑ dadhiṣe sva॒rṣāṃ ji॒hvāma॑gne cakṛṣe havya॒vāha॑m | | २३ | |
अबो॑ध्य॒ग्निः स॒मिधा॒ जना॑नां॒ प्रति॑ धे॒नुमि॑वाय॒तीमु॒षास॑म् ।
य॒ह्वा इव॒ प्र व॒यामु॒ज्जिहा॑ना॒: प्र भा॒नव॑: सिस्रते॒ नाक॒मच्छ॑ ।। २४ ।।
abo॑dhya॒gniḥ sa॒midhā॒ janā॑nāṃ॒ prati॑ dhe॒numi॑vāya॒tīmu॒ṣāsa॑m | ya॒hvā iva॒ pra va॒yāmu॒jjihā॑nā॒: pra bhā॒nava॑: sisrate॒ nāka॒maccha॑ | | २४ | |
अवो॑चाम क॒वये॒ मेध्या॑य॒ वचो॑ व॒न्दारु॑ वृष॒भाय॒ वृष्णे॑ ।
गवि॑ष्ठिरो॒ नम॑सा॒ स्तोम॑म॒ग्नौ दि॒वी॒व रु॒क्ममु॑रु॒व्यञ्च॑मश्रेत् ।। २५ ।।
avo॑cāma ka॒vaye॒ medhyā॑ya॒ vaco॑ va॒ndāru॑ vṛṣa॒bhāya॒ vṛṣṇe॑ | gavi॑ṣṭhiro॒ nama॑sā॒ stoma॑ma॒gnau di॒vī॒va ru॒kmamu॑ru॒vyañca॑maśret | | २५ | |
अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्य॑: ।
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॒ वि॒शे-वि॑शे ।। २६ ।।
a॒yami॒ha pra॑tha॒mo dhā॑yi dhā॒tṛbhi॒rhotā॒ yaji॑ṣṭho adhva॒reṣvīḍya॑: | yamapna॑vāno॒ bhṛga॑vo viruru॒curvane॑ṣu ci॒traṃ vi॒bhvaṃ॒ vi॒śe-vi॑śe | | २६ | |
जन॑स्य गो॒पा अ॑जनिष्ट॒ जागृ॑विर॒ग्निः सु॒दक्ष॑: सुवि॒ताय॒ नव्य॑से ।
घृ॒तप्र॑तीको बृह॒ता दि॑वि॒स्पृशा॑ द्यु॒मद्वि भा॑ति भर॒तेभ्य॒: शुचि॑: ।। २७ ।।
jana॑sya go॒pā a॑janiṣṭa॒ jāgṛ॑vira॒gniḥ su॒dakṣa॑: suvi॒tāya॒ navya॑se | ghṛ॒tapra॑tīko bṛha॒tā di॑vi॒spṛśā॑ dyu॒madvi bhā॑ti bhara॒tebhya॒: śuci॑: | | २७ | |
त्वाम॑ग्ने॒ अङ्गि॑रसो॒ गुहा॑ हि॒तमन्व॑विन्दञ्छिश्रिया॒णं वने॑ – वने ।
स जा॑यसे म॒थ्यमा॑न॒: सहो॑ म॒हत्त्वामा॑हु॒: सह॑सस्पु॒त्रम॑ङ्गिरः ।। २८ ।।
tvāma॑gne॒ aṅgi॑raso॒ guhā॑ hi॒tamanva॑vindañchiśriyā॒ṇaṃ vane॑ – vane | sa jā॑yase ma॒thyamā॑na॒: saho॑ ma॒hattvāmā॑hu॒: saha॑saspu॒trama॑ṅgiraḥ | | २८ | |
सखा॑य॒: सं व॑: स॒म्यञ्च॒मिष॒ᳪ स्तोमं॑ चा॒ग्नये॑ ।
वर्षि॑ष्ठाय क्षिती॒नामू॒र्जो नप्त्रे॒ सह॑स्वते ।। २९ ।।
sakhā॑ya॒: saṃ va॑: sa॒myañca॒miṣa॒ᳪ stomaṃ॑ cā॒gnaye॑ | varṣi॑ṣṭhāya kṣitī॒nāmū॒rjo naptre॒ saha॑svate | | २९ | |
सᳪस॒मिद्यु॑वसे वृष॒न्नग्ने॒ विश्वा॑न्य॒र्य आ । इ॒डस्प॒दे समि॑ध्यसे॒ स नो॒ वसू॒न्या भ॑र ।। ३० ।।
saᳪsa॒midyu॑vase vṛṣa॒nnagne॒ viśvā॑nya॒rya ā | i॒ḍaspa॒de sami॑dhyase॒ sa no॒ vasū॒nyā bha॑ra | | ३० | |
त्वां चि॑त्रश्रवस्तम॒ हव॑न्ते वि॒क्षु ज॒न्तव॑: । शो॒चिष्के॑शं पुरुप्रि॒याग्ने॑ ह॒व्याय॒ वोढ॑वे ।। ३१ ।।
tvāṃ ci॑traśravastama॒ hava॑nte vi॒kṣu ja॒ntava॑: | śo॒ciṣke॑śaṃ purupri॒yāgne॑ ha॒vyāya॒ voḍha॑ve | | ३१ | |
ए॒ना वो॑ अ॒ग्निं नम॑सो॒र्जो नपा॑त॒मा हु॑वे । प्रि॒यं चेति॑ष्ठमर॒तिᳪ स्व॑ध्व॒रं विश्व॑स्य दू॒तम॒मृत॑म् ।। ३२ ।।
e॒nā vo॑ a॒gniṃ nama॑so॒rjo napā॑ta॒mā hu॑ve | pri॒yaṃ ceti॑ṣṭhamara॒tiᳪ sva॑dhva॒raṃ viśva॑sya dū॒tama॒mṛta॑m | | ३२ | |
विश्व॑स्य दू॒तम॒मृतं॒ विश्व॑स्य दू॒तम॒मृत॑म् । स यो॑जते अरु॒षा वि॒श्वभो॑जसा॒ स दु॑द्रव॒त्स्वा॑हुतः ।। ३३ ।।
viśva॑sya dū॒tama॒mṛtaṃ॒ viśva॑sya dū॒tama॒mṛta॑m | sa yo॑jate aru॒ṣā vi॒śvabho॑jasā॒ sa du॑drava॒tsvā॑hutaḥ | | ३३ | |
स दु॑द्रव॒त्स्वा॒हुत॒: स दु॑द्रव॒त्स्वा॒हुतः । सु॒ब्रह्मा॑ य॒ज्ञः सु॒शमी॒ वसू॑नां दे॒वᳪ राधो॒ जना॑नाम् ।। ३४ ।।
sa du॑drava॒tsvā॒huta॒: sa du॑drava॒tsvā॒hutaḥ | su॒brahmā॑ ya॒jñaḥ su॒śamī॒ vasū॑nāṃ de॒vaᳪ rādho॒ janā॑nām | | ३४ | |
अग्ने॒ वाज॑स्य॒ गोम॑त॒ ईशा॑नः सहसो यहो । अ॒स्मे धे॑हि जातवेदो॒ महि॒ श्रव॑: ।। ३५ ।।
agne॒ vāja॑sya॒ goma॑ta॒ īśā॑naḥ sahaso yaho | a॒sme dhe॑hi jātavedo॒ mahi॒ śrava॑: | | ३५ | |
स इ॑धा॒नो वसु॑ष्क॒विर॒ग्निरी॒डेन्यो॑ गि॒रा । रे॒वद॒स्मभ्यं॑ पुर्वणीक दीदिहि ।। ३६ ।।
sa i॑dhā॒no vasu॑ṣka॒vira॒gnirī॒ḍenyo॑ gi॒rā | re॒vada॒smabhyaṃ॑ purvaṇīka dīdihi | | ३६ | |
क्ष॒पो रा॑जन्नु॒त त्मनाग्ने॒ वस्तो॑रु॒तोषस॑: । स ति॑ग्मजम्भ र॒क्षसो॑ दह॒ प्रति॑ ।। ३७ ।।
kṣa॒po rā॑jannu॒ta tmanāgne॒ vasto॑ru॒toṣasa॑: | sa ti॑gmajambha ra॒kṣaso॑ daha॒ prati॑ | | ३७ | |
भ॒द्रो नो॑ अ॒ग्निराहु॑तो भ॒द्रा रा॒तिः सु॑भग भ॒द्रो अ॑ध्व॒रः । भ॒द्रा उ॒त प्रश॑स्तयः ।। ३८ ।।
bha॒dro no॑ a॒gnirāhu॑to bha॒drā rā॒tiḥ su॑bhaga bha॒dro a॑dhva॒raḥ | bha॒drā u॒ta praśa॑stayaḥ | | ३८ | |
भ॒द्रा उ॒त प्रश॑स्तयो भ॒द्रं मन॑: कृणुष्व वृत्र॒तूर्ये॑ । येना॑ स॒मत्सु॑ सा॒सह॑: ।। ३९ ।।
bha॒drā u॒ta praśa॑stayo bha॒draṃ mana॑: kṛṇuṣva vṛtra॒tūrye॑ | yenā॑ sa॒matsu॑ sā॒saha॑: | | ३९ | |
येना॑ स॒मत्सु॑ सा॒सहोऽव॑ स्थि॒रा त॑नुहि॒ भूरि॒ शर्ध॑ताम् । व॒नेमा॑ ते अ॒भिष्टि॑भिः ।। ४० ।।
yenā॑ sa॒matsu॑ sā॒saho’va॑ sthi॒rā ta॑nuhi॒ bhūri॒ śardha॑tām | va॒nemā॑ te a॒bhiṣṭi॑bhiḥ | | ४० | |
अ॒ग्निं तं म॑न्ये॒ यो वसु॒रस्तं॒ यं यन्ति॑ धे॒नव॑: ।
अस्त॒मर्व॑न्त आ॒शवोऽस्तं॒ नित्या॑सो वा॒जिन॒ इष॑ᳪ स्तो॒तृभ्य॒ आ भ॑र ।। ४१ ।।
a॒gniṃ taṃ ma॑nye॒ yo vasu॒rastaṃ॒ yaṃ yanti॑ dhe॒nava॑: | asta॒marva॑nta ā॒śavo’staṃ॒ nityā॑so vā॒jina॒ iṣa॑ᳪ sto॒tṛbhya॒ ā bha॑ra | | ४१ | |
सो अ॒ग्निर्यो वसु॑र्गृ॒णे सं यमा॒यन्ति॑ धे॒नव॑: ।
समर्व॑न्तो रघु॒द्रुव॒: सᳪ सु॑जा॒तास॑: सू॒रय॒ इष॑ᳪ स्तो॒तृभ्य॒ आ भ॑र ।। ४२ ।।
so a॒gniryo vasu॑rgṛ॒ṇe saṃ yamā॒yanti॑ dhe॒nava॑: | samarva॑nto raghu॒druva॒: saᳪ su॑jā॒tāsa॑: sū॒raya॒ iṣa॑ᳪ sto॒tṛbhya॒ ā bha॑ra | | ४२ | |
उ॒भे सु॑श्चन्द्र स॒र्पिषो॒ दर्वी॑ श्रीणीष आ॒सनि॑ ।
उ॒तो न॒ उत्पु॑पूर्या उ॒क्थेषु॑ शवसस्पत॒ इष॑ᳪ स्तो॒तृभ्य॒ आ भ॑र ।। ४३ ।।
u॒bhe su॑ścandra sa॒rpiṣo॒ darvī॑ śrīṇīṣa ā॒sani॑ | u॒to na॒ utpu॑pūryā u॒ktheṣu॑ śavasaspata॒ iṣa॑ᳪ sto॒tṛbhya॒ ā bha॑ra | | ४३ | |
अग्ने॒ तम॒द्याश्वं॒ न स्तोमै॒: क्रतुं॒ न भ॒द्रᳪ हृ॑दि॒स्पृश॑म् । ऋ॒ध्यामा॑ त॒ ओहै॑: ।। ४४ ।।
agne॒ tama॒dyāśvaṃ॒ na stomai॒: kratuṃ॒ na bha॒draᳪ hṛ॑di॒spṛśa॑m | ṛ॒dhyāmā॑ ta॒ ohai॑: | | ४४ | |
अधा॒ ह्य॒ग्ने॒ क्रतो॑र्भ॒द्रस्य॒ दक्ष॑स्य सा॒धोः । र॒थीरृ॒तस्य॑ बृह॒तो ब॒भूथ॑ ।। ४५ ।।
adhā॒ hya॒gne॒ krato॑rbha॒drasya॒ dakṣa॑sya sā॒dhoḥ | ra॒thīrṛ॒tasya॑ bṛha॒to ba॒bhūtha॑ | | ४५ | |
ए॒भिर्नो॑ अर्कै॒र्भवा॑ नो अ॒र्वाङ् स्व॒र्ण ज्योति॑: । अग्ने॒ विश्वे॑भिः सु॒मना॒ अनी॑कैः ।। ४६ ।।
e॒bhirno॑ arkai॒rbhavā॑ no a॒rvāṅ sva॒rṇa jyoti॑: | agne॒ viśve॑bhiḥ su॒manā॒ anī॑kaiḥ | | ४६ | |
अ॒ग्निᳪ होता॑रं मन्ये॒ दास्व॑न्तं॒ वसु॑ᳪ सू॒नुᳪ सह॑सो जा॒तवे॑दसं॒ विप्रं॒ न जा॒तवे॑दसम् ।
य ऊ॒र्ध्वया॑ स्वध्व॒रो दे॒वो दे॒वाच्या॑ कृ॒पा । घृ॒तस्य॒ विभ्रा॑ष्टि॒मनु॑ वष्टि शो॒चिषा॒ऽऽजुह्वा॑नस्य स॒र्पिष॑: ।। ४७ ।।
a॒gniᳪ hotā॑raṃ manye॒ dāsva॑ntaṃ॒ vasu॑ᳪ sū॒nuᳪ saha॑so jā॒tave॑dasaṃ॒ vipraṃ॒ na jā॒tave॑dasam | ya ū॒rdhvayā॑ svadhva॒ro de॒vo de॒vācyā॑ kṛ॒pā | ghṛ॒tasya॒ vibhrā॑ṣṭi॒manu॑ vaṣṭi śo॒ciṣā॒’’juhvā॑nasya sa॒rpiṣa॑: | | ४७ | |
अग्ने॒ त्वं नो॒ अन्त॑म उ॒त त्रा॒ता शि॒वो भ॑व वरू॒थ्य॒: ।
वसु॑र॒ग्निर्वसु॑श्रवा॒ अच्छा॑ नक्षि द्यु॒मत्त॑मᳪ र॒यिं दा॑: ।
तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ।। ४८ ।।
agne॒ tvaṃ no॒ anta॑ma u॒ta trā॒tā śi॒vo bha॑va varū॒thya॒: | vasu॑ra॒gnirvasu॑śravā॒ acchā॑ nakṣi dyu॒matta॑maᳪ ra॒yiṃ dā॑: | taṃ tvā॑ śociṣṭha dīdivaḥ su॒mnāya॑ nū॒namī॑mahe॒ sakhi॑bhyaḥ | | ४८ | |
येन॒ ऋष॑य॒स्तप॑सा स॒त्रमाय॒न्निन्धा॑ना अ॒ग्निᳪ स्व॑रा॒भर॑न्तः ।
तस्मि॑न्न॒हं नि द॑धे॒ नाके॑ अ॒ग्निं यमा॒हुर्मन॑व स्ती॒र्णब॑र्हिषम् ।। ४९ ।।
yena॒ ṛṣa॑ya॒stapa॑sā sa॒tramāya॒nnindhā॑nā a॒gniᳪ sva॑rā॒bhara॑ntaḥ | tasmi॑nna॒haṃ ni da॑dhe॒ nāke॑ a॒gniṃ yamā॒hurmana॑va stī॒rṇaba॑rhiṣam | | ४९ | |
तं पत्नी॑भि॒रनु॑ गच्छेम देवाः पु॒त्रैर्भ्रातृ॑भिरु॒त वा॒ हिर॑ण्यैः ।
नाकं॑ गृभ्णा॒नाः सु॑कृ॒तस्य॑ लो॒के तृ॒तीये॑ पृ॒ष्ठे अधि॑ रोच॒ने दि॒वः ।। ५०।
आ वा॒चो मध्य॑मरुहद्भुर॒ण्युर॒यम॒ग्निः सत्प॑ति॒श्चेकि॑तानः ।
पृ॒ष्ठे पृ॑थि॒व्या निहि॑तो॒ दवि॑द्युतद॒धस्प॒दं कृ॑णुतां॒ ये पृ॑त॒न्यव॑: ।। ५१ ।।
taṃ patnī॑bhi॒ranu॑ gacchema devāḥ pu॒trairbhrātṛ॑bhiru॒ta vā॒ hira॑ṇyaiḥ | nākaṃ॑ gṛbhṇā॒nāḥ su॑kṛ॒tasya॑ lo॒ke tṛ॒tīye॑ pṛ॒ṣṭhe adhi॑ roca॒ne di॒vaḥ | | ५० | ā vā॒co madhya॑maruhadbhura॒ṇyura॒yama॒gniḥ satpa॑ti॒śceki॑tānaḥ | pṛ॒ṣṭhe pṛ॑thi॒vyā nihi॑to॒ davi॑dyutada॒dhaspa॒daṃ kṛ॑ṇutāṃ॒ ye pṛ॑ta॒nyava॑: | | ५१ | |
अ॒यम॒ग्निर्वी॒रत॑मो वयो॒धाः स॑ह॒स्रियो॑ द्योतता॒मप्र॑युच्छन् ।
वि॒भ्राज॑मानः सरि॒रस्य॒ मध्य॒ उप॒ प्र या॑हि दि॒व्यानि॒ धाम॑ ।। ५२ ।।
a॒yama॒gnirvī॒rata॑mo vayo॒dhāḥ sa॑ha॒sriyo॑ dyotatā॒mapra॑yucchan | vi॒bhrāja॑mānaḥ sari॒rasya॒ madhya॒ upa॒ pra yā॑hi di॒vyāni॒ dhāma॑ | | ५२ | |
स॒म्प्रच्य॑वध्व॒मुप॑ स॒म्प्रया॒ताग्ने॑ प॒थो दे॑व॒याना॑न् कृणुध्वम् ।
पुन॑: कृण्वा॒ना पि॒तरा॒ युवा॑ना॒ऽन्वाता॑ᳪसी॒त् त्वयि॒ तन्तु॑मे॒तम् ।। ५३ ।।
sa॒mpracya॑vadhva॒mupa॑ sa॒mprayā॒tāgne॑ pa॒tho de॑va॒yānā॑n kṛṇudhvam | puna॑: kṛṇvā॒nā pi॒tarā॒ yuvā॑nā॒’nvātā॑ᳪsī॒t tvayi॒ tantu॑me॒tam | | ५३ | |
उद्बु॑ध्यस्वाग्ने॒ प्रति॑ जागृहि॒ त्वमि॑ष्टापू॒र्ते सᳪ सृ॑जेथाम॒यं च॑ ।
अ॒स्मिन्त्स॒धस्थे॒ अध्युत्त॑रस्मि॒न् विस्वे॑ देवा॒ यज॑मानाश्च सीदत ।। ५४ ।।
udbu॑dhyasvāgne॒ prati॑ jāgṛhi॒ tvami॑ṣṭāpū॒rte saᳪ sṛ॑jethāma॒yaṃ ca॑ | a॒smintsa॒dhasthe॒ adhyutta॑rasmi॒n visve॑ devā॒ yaja॑mānāśca sīdata | | ५४ | |
येन॒ वह॑सि स॒हस्रं॒ येना॑ग्ने सर्ववेद॒सम् ।
तेने॒मं य॒ज्ञं नो॑ नय॒ स्व॒र्दे॒वेषु॒ गन्त॑वे ।। ५५ ।।
yena॒ vaha॑si sa॒hasraṃ॒ yenā॑gne sarvaveda॒sam | tene॒maṃ ya॒jñaṃ no॑ naya॒ sva॒rde॒veṣu॒ ganta॑ve | | ५५ | |
अ॒यं ते॒ योनि॑रृ॒त्वियो॒ यतो॑ जा॒तो अरो॑चथा । तं जा॒नन्न॑ग्न आ रो॒हाथा॑ नो वर्धया र॒यिम् ।। ५६ ।।
a॒yaṃ te॒ yoni॑rṛ॒tviyo॒ yato॑ jā॒to aro॑cathā | taṃ jā॒nanna॑gna ā ro॒hāthā॑ no vardhayā ra॒yim | | ५६ | |
तप॑श्च तप॒स्य॒श्च शैशि॒रावृ॒तू अ॒ग्नेर॑न्तः श्ले॒षो॒ऽसि॒ कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धय॒: कल्प॑न्ताम॒ग्नय॒: पृथ॒ङ्मम॒ ज्यैष्ठ्या॑य॒ सव्र॑ताः। ये अ॒ग्नय॒: सम॑नसोऽन्त॒रा द्यावा॑पृथि॒वी इ॒मे|
शै॒शि॒रावृ॒तू अ॑भि॒कल्प॑माना॒ इन्द्र॑मिव दे॒वा अ॑भि॒संवि॑शन्तु॒ तया॑ दे॒वत॑याऽङ्गिर॒स्वद्ध्रु॒वे सी॑दतम् ।। ५७ ।।
tapa॑śca tapa॒sya॒śca śaiśi॒rāvṛ॒tū a॒gnera॑ntaḥ śle॒ṣo॒’si॒ kalpe॑tāṃ॒ dyāvā॑pṛthi॒vī kalpa॑ntā॒māpa॒ oṣa॑dhaya॒: kalpa॑ntāma॒gnaya॒: pṛtha॒ṅmama॒ jyaiṣṭhyā॑ya॒ savra॑tāḥ | ye a॒gnaya॒: sama॑naso’nta॒rā dyāvā॑pṛthi॒vī i॒me| śai॒śi॒rāvṛ॒tū a॑bhi॒kalpa॑mānā॒ indra॑miva de॒vā a॑bhi॒saṃvi॑śantu॒ tayā॑ de॒vata॑yā’ṅgira॒svaddhru॒ve sī॑datam | | ५७ | |
प॒र॒मे॒ष्ठी त्वा॑ सादयतु दि॒वस्पृ॒ष्ठे ज्योति॑ष्मतीम् । विश्व॑स्मै प्रा॒णाया॑पा॒नाय॑ व्या॒नाय॒ विश्वं॒ ज्योति॑र्यच्छ ।
सूर्य॒स्तेऽधि॑पति॒स्तया॑ दे॒वत॑याऽङ्गिर॒स्वद् ध्रु॒वा सी॑द ।। ५८ ।।
pa॒ra॒me॒ṣṭhī tvā॑ sādayatu di॒vaspṛ॒ṣṭhe jyoti॑ṣmatīm | viśva॑smai prā॒ṇāyā॑pā॒nāya॑ vyā॒nāya॒ viśvaṃ॒ jyoti॑ryaccha | sūrya॒ste’dhi॑pati॒stayā॑ de॒vata॑yā’ṅgira॒svad dhru॒vā sī॑da | | ५८ | |
लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् । इ॒न्द्रा॒ग्नी त्वा॒ बृह॒स्पति॑र॒स्मिन्योना॑वसीषदन् ।। ५९ ।।
lo॒kaṃ pṛ॑ṇa chi॒draṃ pṛ॒ṇātho॑ sīda dhru॒vā tvam | i॒ndrā॒gnī tvā॒ bṛha॒spati॑ra॒sminyonā॑vasīṣadan | | ५९ | |
ता अ॑स्य॒ सूद॑दोहस॒: सोम॑ᳪ श्रीणन्ति॒ पृश्न॑यः । जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः ।। ६० ।।
tā a॑sya॒ sūda॑dohasa॒: soma॑ᳪ śrīṇanti॒ pṛśna॑yaḥ | janma॑nde॒vānāṃ॒ viśa॑stri॒ṣvā ro॑ca॒ne di॒vaḥ | | ६० | |
इन्द्रं॒ विश्वा॑ अवीवृधन्त्समु॒द्रव्य॑चसं॒ गिर॑: । र॒थीत॑मᳪ र॒थीनां॒ वाजा॑ना॒ᳪ सत्प॑तिं॒ पति॑म् ।। ६१ ।।
indraṃ॒ viśvā॑ avīvṛdhantsamu॒dravya॑casaṃ॒ gira॑: | ra॒thīta॑maᳪ ra॒thīnāṃ॒ vājā॑nā॒ᳪ satpa॑tiṃ॒ pati॑m | | ६१ | |
प्रोथ॒दश्वो॒ न यव॑सेऽवि॒ष्यन्य॒दा म॒हः सं॒वर॑णा॒द्वयस्था॑त् ।
आद॑स्य॒ वातो॒ अनु॑वाति शो॒चिरध॑ स्म ते॒ व्रज॑नं कृ॒ष्णम॑स्ति ।। ६२ ।।
protha॒daśvo॒ na yava॑se’vi॒ṣyanya॒dā ma॒haḥ saṃ॒vara॑ṇā॒dvayasthā॑t | āda॑sya॒ vāto॒ anu॑vāti śo॒ciradha॑ sma te॒ vraja॑naṃ kṛ॒ṣṇama॑sti | | ६२ | |
आ॒योष्ट्वा॒ सद॑ने सादया॒म्यव॑तश्छा॒याया॑ᳪ समु॒द्रस्य॒ हृद॑ये ।
र॒श्मी॒वतीं॒ भास्व॑ती॒मा या द्यां भास्यापृ॑थि॒वीमोर्व॒न्तरि॑क्षम् ।। ६३ ।।
ā॒yoṣṭvā॒ sada॑ne sādayā॒myava॑taśchā॒yāyā॑ᳪ samu॒drasya॒ hṛda॑ye | ra॒śmī॒vatīṃ॒ bhāsva॑tī॒mā yā dyāṃ bhāsyāpṛ॑thi॒vīmorva॒ntari॑kṣam | | ६३ | |
प॒र॒मे॒ष्ठी त्वा॑ सादयतु दि॒वस्पृ॒ष्ठे व्यच॑स्वतीं॒ प्रथ॑स्वतीं॒ दिवं॑ यच्छ॒ दिवं॑ दृᳪह॒ दिवं॒ मा हि॑ᳪसीः ।
विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ च॒रित्रा॑य ।
सूर्य॑स्त्वा॒ऽभि पा॑तु म॒ह्या स्व॒स्त्या छ॒र्दिषा॒ शन्त॑मेन॒ तया॑ दे॒वत॑याऽङ्गिर॒स्वद् ध्रु॒वे सी॑दतम् ।। ६४ ।।
pa॒ra॒me॒ṣṭhī tvā॑ sādayatu di॒vaspṛ॒ṣṭhe vyaca॑svatīṃ॒ pratha॑svatīṃ॒ divaṃ॑ yaccha॒ divaṃ॑ dṛᳪha॒ divaṃ॒ mā hi॑ᳪsīḥ | viśva॑smai prā॒ṇāyā॑pā॒nāya॑ vyā॒nāyo॑dā॒nāya॑ prati॒ṣṭhāyai॑ ca॒ritrā॑ya | sūrya॑stvā॒’bhi pā॑tu ma॒hyā sva॒styā cha॒rdiṣā॒ śanta॑mena॒ tayā॑ de॒vata॑yā’ṅgira॒svad dhru॒ve sī॑datam | | ६४ | |
स॒हस्र॑स्य प्र॒माऽसि॑ स॒हस्र॑स्य प्रति॒माऽसि॑ स॒हस्र॑स्यो॒न्माऽसि॑ साह॒स्रो॒ऽसि स॒हस्रा॑य त्वा ।। ६५ ।।
sa॒hasra॑sya pra॒mā’si॑ sa॒hasra॑sya prati॒mā’si॑ sa॒hasra॑syo॒nmā’si॑ sāha॒sro॒’si sa॒hasrā॑ya tvā | | ६५ | |