EeseDharmaSanātana Library
10अध्याय 10
Śukla Yajurveda Mādhyaṃdina ka Adhyay 10.
34 shlokअ॒पो दे॒वा मधु॑मतीरगृभ्ण॒न्नूर्ज॑स्वती राज॒स्वश्चिता॑नाः ।
याभि॑र्मि॒त्रावरु॑णाव॒भ्यषि॑ञ्च॒न्याभि॒रिन्द्र॒मन॑य॒न्नत्यरा॑तीः ।। १ ।।
a॒po de॒vā madhu॑matīragṛbhṇa॒nnūrja॑svatī rāja॒svaścitā॑nāḥ | yābhi॑rmi॒trāvaru॑ṇāva॒bhyaṣi॑ñca॒nyābhi॒rindra॒mana॑ya॒nnatyarā॑tīḥ | | १ | |
वृष्ण॑ ऊ॒र्मिर॑सि राष्ट्र॒दा रा॒ष्ट्रं मे॑ देहि॒ स्वाहा॒ वृष्ण॑ ऊ॒र्मिर॑सि राष्ट्र॒दा रा॒ष्ट्रम॒मुष्मै॑ देहि
वृ॑षसे॒नो॒ऽसि राष्ट्र॒दा रा॒ष्ट्रं मे॑ देहि॒ स्वाहा॑ वृषसे॒नो॒ऽसि राष्ट्र॒दा रा॒ष्ट्रम॒मुष्मै॑ देहि ।। २ ।।
vṛṣṇa॑ ū॒rmira॑si rāṣṭra॒dā rā॒ṣṭraṃ me॑ dehi॒ svāhā॒ vṛṣṇa॑ ū॒rmira॑si rāṣṭra॒dā rā॒ṣṭrama॒muṣmai॑ dehi vṛ॑ṣase॒no॒’si rāṣṭra॒dā rā॒ṣṭraṃ me॑ dehi॒ svāhā॑ vṛṣase॒no॒’si rāṣṭra॒dā rā॒ṣṭrama॒muṣmai॑ dehi | | २ | |
अ॒र्थेत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ ऽर्थेत॑ स्थ राष्ट्र॒दा रा॒ष्ट्रम॒मुष्मै॑ द॒त्तौज॑स्वती स्थ राष्ट्र॒दा रा॒ष्ट्रं मे॑ दत्त॒ स्वाहौज॑स्वती स्थ राष्ट्र॒दा रा॒ष्ट्रम॒मुष्मै॑ द॒त्ताप॑: परिवा॒हिणी॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ऽप॑: परिवा॒हिणी॑ स्थ राष्ट्र॒दा रा॒ष्ट्रम॒मुष्मै॑ दत्ता॒पां पति॑रसि राष्ट्र॒दा रा॒ष्ट्रं मे॑ देहि॒ स्वाहा॒ ऽपां पति॑रसि राष्ट्र॒दा रा॒ष्ट्रम॒मुष्मै॑ देह्य॒पां गर्भो॑ऽसि राष्ट्र॒दा रा॒ष्ट्रं मे॑ देहि॒ स्वाहा॒ ऽपां गर्भो॑ सि राष्ट्र॒दा रा॒ष्ट्रम॒मुष्मै॑ देहि॒ ।। ३ ।।
a॒rtheta॑ stha rāṣṭra॒dā rā॒ṣṭraṃ me॑ datta॒ svāhā॒ ’rtheta॑ stha rāṣṭra॒dā rā॒ṣṭrama॒muṣmai॑ da॒ttauja॑svatī stha rāṣṭra॒dā rā॒ṣṭraṃ me॑ datta॒ svāhauja॑svatī stha rāṣṭra॒dā rā॒ṣṭrama॒muṣmai॑ da॒ttāpa॑: parivā॒hiṇī॑ stha rāṣṭra॒dā rā॒ṣṭraṃ me॑ datta॒ svāhā॑ ’pa॑: parivā॒hiṇī॑ stha rāṣṭra॒dā rā॒ṣṭrama॒muṣmai॑ dattā॒pāṃ pati॑rasi rāṣṭra॒dā rā॒ṣṭraṃ me॑ dehi॒ svāhā॒ ’pāṃ pati॑rasi rāṣṭra॒dā rā॒ṣṭrama॒muṣmai॑ dehya॒pāṃ garbho॑’si rāṣṭra॒dā rā॒ṣṭraṃ me॑ dehi॒ svāhā॒ ’pāṃ garbho॑ si rāṣṭra॒dā rā॒ṣṭrama॒muṣmai॑ dehi॒ | | ३ | |
सूर्य॑त्वचस स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑त्वचस स्थ राष्ट्र॒दा रा॒ष्ट्रम॒मुष्मै॑ दत्त सूर्य॑वर्चस स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑वर्चस स्थ राष्ट्र॒दा रा॒ष्ट्रम॒मुष्मै॑ दत्त॒ मान्दा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ मान्दा॑ स्थ राष्ट्र॒दा रा॒ष्ट्रम॒मुष्मै॑ दत्त व्रज॒क्षित॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ व्रज॒क्षित॑ स्थ राष्ट्र॒दा रा॒ष्ट्रम॒मुष्मै॑ दत्त॒ वाशा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ वाशा॑ स्थ राष्ट्र॒दा रा॒ष्ट्रम॒मुष्मै॑ दत्त॒ शवि॑ष्ठा स्थ राष्ट्र॒दा रा॒ष्ट्रं मे॑ दत्त॒ स्वाहा॒ शवि॑ष्ठा स्थ राष्ट्र॒दा रा॒ष्ट्रम॒मुष्मै॑ दत्त॒ शक्व॑री स्थ राष्ट्र॒दा रा॒ष्ट्रं मे॑ दत्त॒ स्वाहा॒ शक्व॑री स्थ राष्ट्र॒दा रा॒ष्ट्रम॒मुष्मै॑ दत्त जन॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ जन॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त विश्व॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ विश्व॒भृत॑ स्थ राष्ट्र॒दा रा॒ष्ट्रम॒मुष्मै॑ द॒त्ताप॑: स्व॒राज॑ स्थ राष्ट्र॒दा रा॒ष्ट्रम॒मुष्मै॑ दत्त । मधु॑मती॒र्मधु॑मतीभिः पृच्यन्तां॒ महि॑ क्ष॒त्रं क्ष॒त्रिया॑य वन्वा॒नांना॑धृष्टाः सीदत स॒हौज॑सो॒ महि॑ क्ष॒त्रं क्ष॒त्रिया॑य॒ दध॑तीः ।। ४ ।।
sūrya॑tvacasa stha rāṣṭra॒dā rā॒ṣṭraṃ me॑ datta॒ svāhā॒ sūrya॑tvacasa stha rāṣṭra॒dā rā॒ṣṭrama॒muṣmai॑ datta sūrya॑varcasa stha rāṣṭra॒dā rā॒ṣṭraṃ me॑ datta॒ svāhā॒ sūrya॑varcasa stha rāṣṭra॒dā rā॒ṣṭrama॒muṣmai॑ datta॒ māndā॑ stha rāṣṭra॒dā rā॒ṣṭraṃ me॑ datta॒ svāhā॒ māndā॑ stha rāṣṭra॒dā rā॒ṣṭrama॒muṣmai॑ datta vraja॒kṣita॑ stha rāṣṭra॒dā rā॒ṣṭraṃ me॑ datta॒ svāhā॑ vraja॒kṣita॑ stha rāṣṭra॒dā rā॒ṣṭrama॒muṣmai॑ datta॒ vāśā॑ stha rāṣṭra॒dā rā॒ṣṭraṃ me॑ datta॒ svāhā॒ vāśā॑ stha rāṣṭra॒dā rā॒ṣṭrama॒muṣmai॑ datta॒ śavi॑ṣṭhā stha rāṣṭra॒dā rā॒ṣṭraṃ me॑ datta॒ svāhā॒ śavi॑ṣṭhā stha rāṣṭra॒dā rā॒ṣṭrama॒muṣmai॑ datta॒ śakva॑rī stha rāṣṭra॒dā rā॒ṣṭraṃ me॑ datta॒ svāhā॒ śakva॑rī stha rāṣṭra॒dā rā॒ṣṭrama॒muṣmai॑ datta jana॒bhṛta॑ stha rāṣṭra॒dā rā॒ṣṭraṃ me॑ datta॒ svāhā॑ jana॒bhṛta॑ stha rāṣṭra॒dā rā॒ṣṭrama॒muṣmai॑ datta viśva॒bhṛta॑ stha rāṣṭra॒dā rā॒ṣṭraṃ me॑ datta॒ svāhā॑ viśva॒bhṛta॑ stha rāṣṭra॒dā rā॒ṣṭrama॒muṣmai॑ da॒ttāpa॑: sva॒rāja॑ stha rāṣṭra॒dā rā॒ṣṭrama॒muṣmai॑ datta | madhu॑matī॒rmadhu॑matībhiḥ pṛcyantāṃ॒ mahi॑ kṣa॒traṃ kṣa॒triyā॑ya vanvā॒nāṃnā॑dhṛṣṭāḥ sīdata sa॒hauja॑so॒ mahi॑ kṣa॒traṃ kṣa॒triyā॑ya॒ dadha॑tīḥ | | ४ | |
सोम॑स्य॒ त्विषि॑रसि॒ तवे॑व मे॒ त्विषि॑र्भूयात् । अ॒ग्नये॒ स्वाहा॒ सोमा॑य॒ स्वाहा॑ सवि॒त्रे स्वाहा॒ सर॑स्वत्यै॒ स्वाहा॑
पू॒ष्णे स्वाहा॒ बृह॒स्पत॑ये॒ स्वाहेन्द्रा॑य॒ स्वाहा॒ घोषा॑य॒ स्वाहा॒ श्लोका॑य॒ स्वाहा
ऽᳪशा॑य॒ स्वाहा॒ भगा॑य॒ स्वाहा॑ ऽर्य॒म्णे स्वाहा॑ ।। ५ ।।
soma॑sya॒ tviṣi॑rasi॒ tave॑va me॒ tviṣi॑rbhūyāt | a॒gnaye॒ svāhā॒ somā॑ya॒ svāhā॑ savi॒tre svāhā॒ sara॑svatyai॒ svāhā॑ pū॒ṣṇe svāhā॒ bṛha॒spata॑ye॒ svāhendrā॑ya॒ svāhā॒ ghoṣā॑ya॒ svāhā॒ ślokā॑ya॒ svāhā ’ᳪśā॑ya॒ svāhā॒ bhagā॑ya॒ svāhā॑ ’rya॒mṇe svāhā॑ | | ५ | |
प॒वित्रे॑ स्थो वैष्ण॒व्यौ॒ सवि॒तुर्व॑: प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभि॑: ।
अनि॑भृष्टमसि वा॒चो बन्धु॑स्तपो॒जाः सोम॑स्य दा॒त्रम॑सि॒ स्वाहा॑ राज॒स्व॒: ।। ६ ।।
pa॒vitre॑ stho vaiṣṇa॒vyau॒ savi॒turva॑: prasa॒va utpu॑nā॒myacchi॑dreṇa pa॒vitre॑ṇa॒ sūrya॑sya ra॒śmibhi॑: | ani॑bhṛṣṭamasi vā॒co bandhu॑stapo॒jāḥ soma॑sya dā॒trama॑si॒ svāhā॑ rāja॒sva॒: | | ६ | |
स॒ध॒मादो॑ द्यु॒म्निनी॒राप॑ ए॒ता अना॑धृष्टा अप॒स्यो वसा॑नाः ।
प॒स्त्या॒सु चक्रे॒ वरु॑णः स॒धस्थ॑म॒पाᳪ शिशु॑र्मा॒तृत॑मास्व॒न्तः ।। ७ ।।
sa॒dha॒mādo॑ dyu॒mninī॒rāpa॑ e॒tā anā॑dhṛṣṭā apa॒syo vasā॑nāḥ | pa॒styā॒su cakre॒ varu॑ṇaḥ sa॒dhastha॑ma॒pāᳪ śiśu॑rmā॒tṛta॑māsva॒ntaḥ | | ७ | |
क्ष॒त्रस्योल्ब॑मसि क्ष॒त्रस्य॑ ज॒राय्व॑सि क्ष॒त्रस्य॒ योनि॑रसि क्ष॒त्रस्य॒ नाभि॑र॒सीन्द्र॑स्य॒ वार्त्र॑घ्नमसि मि॒त्रस्या॑सि॒ वरु॑णस्यासि॒
त्वया॒ऽयं वृ॒त्रं ब॑धेत् । दृ॒बाऽसि॑ रु॒जाऽसि॑ क्षु॒माऽसि॑ । पा॒तैनं॒ प्राञ्चं॑ पा॒तैनं प्र॒त्यञ्चं॑ पा॒तैनं॑ ति॒र्यञ्चं॑ दि॒ग्भ्यः पा॑त ।। ८ ।।
kṣa॒trasyolba॑masi kṣa॒trasya॑ ja॒rāyva॑si kṣa॒trasya॒ yoni॑rasi kṣa॒trasya॒ nābhi॑ra॒sīndra॑sya॒ vārtra॑ghnamasi mi॒trasyā॑si॒ varu॑ṇasyāsi॒ tvayā॒’yaṃ vṛ॒traṃ ba॑dhet | dṛ॒bā’si॑ ru॒jā’si॑ kṣu॒mā’si॑ | pā॒tainaṃ॒ prāñcaṃ॑ pā॒tainaṃ pra॒tyañcaṃ॑ pā॒tainaṃ॑ ti॒ryañcaṃ॑ di॒gbhyaḥ pā॑ta | | ८ | |
आ॒विर्म॑या॒ आवि॑त्तो अ॒ग्निर्गृ॒हप॑तिरावि॑त्त॒ इन्द्रो॑ वृ॒द्धश्र॑वा॒ आवि॑त्तौ मि॒त्रावरु॑णौ धृ॒तव्र॑ता॒वावि॑त्तः पू॒षा वि॒श्ववे॑दा॒
आवि॑त्ते॒ द्यावा॑पृथि॒वी वि॒श्वश॑म्भुवा॒वावि॒त्तादि॑तिरु॒रुश॑र्मा ।। ९ ।।
ā॒virma॑yā॒ āvi॑tto a॒gnirgṛ॒hapa॑tirāvi॑tta॒ indro॑ vṛ॒ddhaśra॑vā॒ āvi॑ttau mi॒trāvaru॑ṇau dhṛ॒tavra॑tā॒vāvi॑ttaḥ pū॒ṣā vi॒śvave॑dā॒ āvi॑tte॒ dyāvā॑pṛthi॒vī vi॒śvaśa॑mbhuvā॒vāvi॒ttādi॑tiru॒ruśa॑rmā | | ९ | |
अवे॑ष्टा दन्द॒शूका॑: प्राची॒मा रो॑ह गाय॒त्री त्वा॑ऽवतु रथन्त॒रᳪ साम॑ त्रि॒वृत्स्तोमो॑ वस॒न्त ऋ॒तुर्ब्रह्म॒ द्रवि॑णम् ।। १० ।।
ave॑ṣṭā danda॒śūkā॑: prācī॒mā ro॑ha gāya॒trī tvā॑’vatu rathanta॒raᳪ sāma॑ tri॒vṛtstomo॑ vasa॒nta ṛ॒turbrahma॒ dravi॑ṇam | | १० | |
दक्षि॑णा॒मा रो॑ह त्रि॒ष्टुप् त्वा॑ऽवतु बृ॒हत्साम॑ पञ्चद॒श स्तोमो॑ ग्री॒ष्म ऋ॒तुः क्ष॒त्रं द्रवि॑णम् ।। ११ ।।
dakṣi॑ṇā॒mā ro॑ha tri॒ṣṭup tvā॑’vatu bṛ॒hatsāma॑ pañcada॒śa stomo॑ grī॒ṣma ṛ॒tuḥ kṣa॒traṃ dravi॑ṇam | | ११ | |
प्र॒तीची॒मा रो॑ह॒ जग॑ती त्वाऽवतु वैरू॒पᳪ साम॑ सप्तद॒श स्तोमो॑ व॒र्षा ऋ॒तुर्विड् द्रवि॑णम् ।। १२ ।।
pra॒tīcī॒mā ro॑ha॒ jaga॑tī tvā’vatu vairū॒paᳪ sāma॑ saptada॒śa stomo॑ va॒rṣā ṛ॒turviḍ dravi॑ṇam | | १२ | |
उदी॑ची॒मा रो॑हानु॒ष्टुप् त्वा॑ऽवतु वैरा॒जᳪ सामै॑कवि॒ᳪश स्तोम॑: श॒रदृ॒तुः फलं॒ द्रवि॑णम् ।। १३ ।।
udī॑cī॒mā ro॑hānu॒ṣṭup tvā॑’vatu vairā॒jaᳪ sāmai॑kavi॒ᳪśa stoma॑: śa॒radṛ॒tuḥ phalaṃ॒ dravi॑ṇam | | १३ | |
ऊ॒र्ध्वामा रो॑ह प॒ङ्क्तिस्त्वा॑ऽवतु शाक्वररैव॒ते साम॑नी त्रिणवत्रयस्त्रि॒ᳪशौ॒ स्तोमौ॑ हेमन्तशिशि॒रावृ॒तू वर्चो॒ द्रवि॑णं॒
प्रत्य॑स्तं॒ नमु॑चे॒: शिर॑: ।। १४ ।।
ū॒rdhvāmā ro॑ha pa॒ṅktistvā॑’vatu śākvararaiva॒te sāma॑nī triṇavatrayastri॒ᳪśau॒ stomau॑ hemantaśiśi॒rāvṛ॒tū varco॒ dravi॑ṇaṃ॒ pratya॑staṃ॒ namu॑ce॒: śira॑: | | १४ | |
सोम॑स्य॒ त्विषि॑रसि॒ तवे॑व मे॒ त्विषि॑र्भूयात् । मृ॒त्योः पा॒ह्योजो॑ऽसि॒ सहो॑ऽस्य॒मृत॑मसि ।। १५ ।।
soma॑sya॒ tviṣi॑rasi॒ tave॑va me॒ tviṣi॑rbhūyāt | mṛ॒tyoḥ pā॒hyojo॑’si॒ saho॑’sya॒mṛta॑masi | | १५ | |
हिर॑ण्यरूपा उ॒षसो॑ विरो॒क उ॒भावि॑न्द्रा॒ उदि॑थ॒: सूर्य॑श्च ।
आ रो॑हतं वरुण मित्र॒ गर्त्तं॒ तत॑श्चक्षाथा॒मदि॑तिं॒ दितिं॑ च मि॒त्रो॒ऽसि॒ वरु॑णोऽसि ।। १६ ।।
hira॑ṇyarūpā u॒ṣaso॑ viro॒ka u॒bhāvi॑ndrā॒ udi॑tha॒: sūrya॑śca | ā ro॑hataṃ varuṇa mitra॒ garttaṃ॒ tata॑ścakṣāthā॒madi॑tiṃ॒ ditiṃ॑ ca mi॒tro॒’si॒ varu॑ṇo’si | | १६ | |
सोम॑स्य त्वा द्यु॒म्नेना॒भि षि॑ञ्चाम्य॒ग्नेर्भ्राज॑सा॒ सूर्य॑स्य॒ वर्च॒सेन्द्र॑स्येन्द्रि॒येण॑ ।
क्ष॒त्राणां॑ क्ष॒त्रप॑तिरे॒ध्यति॑ दि॒द्यून् पा॑हि ।। १७ ।।
soma॑sya tvā dyu॒mnenā॒bhi ṣi॑ñcāmya॒gnerbhrāja॑sā॒ sūrya॑sya॒ varca॒sendra॑syendri॒yeṇa॑ | kṣa॒trāṇāṃ॑ kṣa॒trapa॑tire॒dhyati॑ di॒dyūn pā॑hi | | १७ | |
इ॒मं दे॑वा असप॒त्नᳪ सु॑वध्वं मह॒ते क्ष॒त्राय॑ मह॒ते ज्यै॑ष्ठ्याय मह॒ते जान॑राज्या॒येन्द्र॑स्येन्द्रि॒याय॑ ।
इ॒मम॒मुष्य॑ पु॒त्रम॒मुष्यै॑ पु॒त्रमस्यै वि॒श ए॒ष वो॑ऽमी॒ राजा॒ सोमो॒ऽस्माकं॑ ब्राह्म॒णाना॒ᳪराजा॑ ।। १८ ।।
i॒maṃ de॑vā asapa॒tnaᳪ su॑vadhvaṃ maha॒te kṣa॒trāya॑ maha॒te jyai॑ṣṭhyāya maha॒te jāna॑rājyā॒yendra॑syendri॒yāya॑ | i॒mama॒muṣya॑ pu॒trama॒muṣyai॑ pu॒tramasyai vi॒śa e॒ṣa vo॑’mī॒ rājā॒ somo॒’smākaṃ॑ brāhma॒ṇānā॒ᳪrājā॑ | | १८ | |
प्र पर्व॑तस्य वृष॒भस्य॑ पृ॒ष्ठान्नाव॑श्चरन्ति स्व॒सिच॑ इया॒नाः ।
ता आऽव॑वृत्रन्नध॒रागुद॑क्ता॒ अहिं॑ बु॒ध्न्य॒मनु॒ रीय॑माणाः ।
विष्णो॑र्वि॒क्रम॑णमसि॒ विष्णो॒र्विक्रा॑न्तमसि॒ विष्णो॑: क्रा॒न्तम॑सि ।। १९ ।।
pra parva॑tasya vṛṣa॒bhasya॑ pṛ॒ṣṭhānnāva॑ścaranti sva॒sica॑ iyā॒nāḥ | tā ā’va॑vṛtrannadha॒rāguda॑ktā॒ ahiṃ॑ bu॒dhnya॒manu॒ rīya॑māṇāḥ | viṣṇo॑rvi॒krama॑ṇamasi॒ viṣṇo॒rvikrā॑ntamasi॒ viṣṇo॑: krā॒ntama॑si | | १९ | |
प्रजा॑पते॒ न त्वदे॒तान्य॒न्यो विश्वा॑ रू॒पाणि॒ परि॒ ता ब॑भूव । यत्का॑मास्ते जुहु॒मस्तन्नो॑ अस्त्व॒यम॒मुष्य॑ पि॒तासाव॒स्य पि॒ता व॒यᳪ स्या॑म॒ पत॑यो रयी॒णाᳪ स्वाहा॑ ।
रुद्र॒ यत्ते॒ क्रिवि॒ परं॒ नाम॒ तस्मि॑न्हु॒तम॑स्यमे॒ष्टम॑सि॒ स्वाहा॑ ।। २० ।।
prajā॑pate॒ na tvade॒tānya॒nyo viśvā॑ rū॒pāṇi॒ pari॒ tā ba॑bhūva | yatkā॑māste juhu॒mastanno॑ astva॒yama॒muṣya॑ pi॒tāsāva॒sya pi॒tā va॒yaᳪ syā॑ma॒ pata॑yo rayī॒ṇāᳪ svāhā॑ | rudra॒ yatte॒ krivi॒ paraṃ॒ nāma॒ tasmi॑nhu॒tama॑syame॒ṣṭama॑si॒ svāhā॑ | | २० | |
इन्द्र॑स्य॒ वज्रो॑ऽसि मि॒त्रावरु॑णयोस्त्वा प्रशा॒स्त्रोः प्र॒शिषा॑ युनज्मि ।
अव्य॑थायै त्वा स्व॒धायै॒ त्वाऽरि॑ष्टो॒ अर्जु॑नो म॒रुतां॑ प्रस॒वेन॑ ज॒यापा॑म॒ मन॑सा॒ समि॑न्द्रि॒येण॑ ।। २१ ।।
indra॑sya॒ vajro॑’si mi॒trāvaru॑ṇayostvā praśā॒stroḥ pra॒śiṣā॑ yunajmi | avya॑thāyai tvā sva॒dhāyai॒ tvā’ri॑ṣṭo॒ arju॑no ma॒rutāṃ॑ prasa॒vena॑ ja॒yāpā॑ma॒ mana॑sā॒ sami॑ndri॒yeṇa॑ | | २१ | |
मा त॑ इन्द्र ते व॒यं तु॑राषा॒डयु॑क्तासो अब्र॒ह्मता॒ विद॑साम ।
तिष्ठा॒ रथ॒मधि॒ यं व॑ज्रह॒स्ता र॒श्मीन् दे॑व युवसे॒ स्वश्वा॑न् ।। २२ ।।
mā ta॑ indra te va॒yaṃ tu॑rāṣā॒ḍayu॑ktāso abra॒hmatā॒ vida॑sāma | tiṣṭhā॒ ratha॒madhi॒ yaṃ va॑jraha॒stā ra॒śmīn de॑va yuvase॒ svaśvā॑n | | २२ | |
अ॒ग्नये॑ गृ॒हप॑तये॒ स्वाहा॒ सोमा॑य॒ वन॒स्पत॑ये॒ स्वाहा॑
म॒रुता॒मोज॑से॒ स्वाहेन्द्र॑स्येन्द्रि॒याय॒ स्वाहा॑ । पृथि॑वि मात॒र्मा मा॑ हिᳪसी॒र्मो अ॒हं त्वाम् ।। २३ ।।
a॒gnaye॑ gṛ॒hapa॑taye॒ svāhā॒ somā॑ya॒ vana॒spata॑ye॒ svāhā॑ ma॒rutā॒moja॑se॒ svāhendra॑syendri॒yāya॒ svāhā॑ | pṛthi॑vi māta॒rmā mā॑ hiᳪsī॒rmo a॒haṃ tvām | | २३ | |
ह॒ᳪसः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।
नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत् ।। २४ ।।
ha॒ᳪsaḥ śu॑ci॒ṣadvasu॑rantarikṣa॒saddhotā॑ vedi॒ṣadati॑thirduroṇa॒sat | nṛ॒ṣadva॑ra॒sadṛ॑ta॒sadvyo॑ma॒sada॒bjā go॒jā ṛ॑ta॒jā a॑dri॒jā ṛ॒taṃ bṛ॒hat | | २४ | |
इय॑द॒स्यायु॑र॒स्यायु॒र्मयि॑ धेहि॒ युङ्ङ॑सि॒ वर्चो॑ऽसि॒ वर्चो॒ मयि॑ धे॒ह्यूर्ग॒स्यूर्जं॒ मयि॑ धेहि ।।
इन्द्र॑स्य वां वीर्य॒कृतो॑ बा॒हू अ॑भ्यु॒पाव॑हरामि ।। २५ ।।
iya॑da॒syāyu॑ra॒syāyu॒rmayi॑ dhehi॒ yuṅṅa॑si॒ varco॑’si॒ varco॒ mayi॑ dhe॒hyūrga॒syūrjaṃ॒ mayi॑ dhehi | | indra॑sya vāṃ vīrya॒kṛto॑ bā॒hū a॑bhyu॒pāva॑harāmi | | २५ | |
स्यो॒नाऽसि॑ सु॒षदा॑ऽसि क्ष॒त्रस्य॒ योनि॑रसि ।
स्यो॒नामा सी॑द सु॒षदा॒मा सी॑द क्ष॒त्रस्य॒ योनि॒मा सी॑द ।। २६ ।।
syo॒nā’si॑ su॒ṣadā॑’si kṣa॒trasya॒ yoni॑rasi | syo॒nāmā sī॑da su॒ṣadā॒mā sī॑da kṣa॒trasya॒ yoni॒mā sī॑da | | २६ | |
नि ष॑साद घृ॒तव्र॑तो॒ वरु॑णः प॒स्त्यास्वा । साम्रा॑ज्याय सु॒क्रतु॑: ।। २७ ।।
ni ṣa॑sāda ghṛ॒tavra॑to॒ varu॑ṇaḥ pa॒styāsvā | sāmrā॑jyāya su॒kratu॑: | | २७ | |
अ॒भि॒भूर॑स्ये॒तास्ते॒ पञ्च॒ दिश॑: कल्पन्तां॒ ब्रह्मँ॒स्त्वं ब्र॒ह्माऽसि॑ सवि॒ताऽसि॑ स॒त्यप्र॑सवो॒ वरु॑णोऽसि स॒त्यौजा॒ इन्द्रो॑ऽसि॒ विशौ॑जा रु॒द्रो॒ऽसि सु॒शेव॑: ।
बहु॑कार॒ श्रेय॑स्कर॒ भूय॑स्क॒रेन्द्र॑स्य॒ वज्रो॑ऽसि॒ तेन॑ मे रध्य ।। २८ ।।
a॒bhi॒bhūra॑sye॒tāste॒ pañca॒ diśa॑: kalpantāṃ॒ brahmam॒̐stvaṃ bra॒hmā’si॑ savi॒tā’si॑ sa॒tyapra॑savo॒ varu॑ṇo’si sa॒tyaujā॒ indro॑’si॒ viśau॑jā ru॒dro॒’si su॒śeva॑: | bahu॑kāra॒ śreya॑skara॒ bhūya॑ska॒rendra॑sya॒ vajro॑’si॒ tena॑ me radhya | | २८ | |
अ॒ग्निः पृ॒थुर्धर्म॑ण॒स्पति॑र्जुषा॒णो अ॒ग्निः पृ॒थुर्धर्म॑ण॒स्पति॒राज्य॑स्य वेतु॒ स्वाहा॑
स्वाहा॑कृता॒: सूर्य॑स्य र॒श्मिभि॑र्यतध्वᳪ सजा॒तानां॑ मध्य॒मेष्ठ्या॑य ।। २९ ।।
a॒gniḥ pṛ॒thurdharma॑ṇa॒spati॑rjuṣā॒ṇo a॒gniḥ pṛ॒thurdharma॑ṇa॒spati॒rājya॑sya vetu॒ svāhā॑ svāhā॑kṛtā॒: sūrya॑sya ra॒śmibhi॑ryatadhvaᳪ sajā॒tānāṃ॑ madhya॒meṣṭhyā॑ya | | २९ | |
स॒वि॒त्रा प्र॑सवि॒त्रा सर॑स्वत्या वा॒चा त्वष्ट्रा॑ रू॒पैः पू॒ष्णा प॒शुभि॒रिन्द्रे॑णा॒स्मे बृह॒स्पति॑ना॒ ब्रह्म॑णा॒ वरु॑णे॒नौज॑सा॒ऽग्निना॒ तेज॑सा॒ सोमे॑न॒ राज्ञा॒ विष्णु॑ना दश॒म्या दे॒वत॑या॒ प्रसू॑त॒: प्र स॑र्पामि ।। ३० ।।
sa॒vi॒trā pra॑savi॒trā sara॑svatyā vā॒cā tvaṣṭrā॑ rū॒paiḥ pū॒ṣṇā pa॒śubhi॒rindre॑ṇā॒sme bṛha॒spati॑nā॒ brahma॑ṇā॒ varu॑ṇe॒nauja॑sā॒’gninā॒ teja॑sā॒ some॑na॒ rājñā॒ viṣṇu॑nā daśa॒myā de॒vata॑yā॒ prasū॑ta॒: pra sa॑rpāmi | | ३० | |
अ॒श्विभ्यां॑ पच्यस्व॒ सर॑स्वत्यै पच्य॒स्वेन्द्रा॑य सु॒त्राम्णे॑ पच्यस्व ।
वा॒युः पू॒तः प॒वित्रे॑ण प्र॒त्यङ्क्सोमो॒ अति॑स्रुतः । इन्द्र॑स्य॒ युज्य॒: सखा॑ ।। ३१ ।।
a॒śvibhyāṃ॑ pacyasva॒ sara॑svatyai pacya॒svendrā॑ya su॒trāmṇe॑ pacyasva | vā॒yuḥ pū॒taḥ pa॒vitre॑ṇa pra॒tyaṅksomo॒ ati॑srutaḥ | indra॑sya॒ yujya॒: sakhā॑ | | ३१ | |
कु॒विद॒ङ्ग यव॑मन्तो यवं॑ चि॒द्यथा॒ दान्त्य॑नुपू॒र्वं वि॒यूय॑ ।
इ॒हेहै॑षां कृणुहि॒ भोज॑नानि॒ ये ब॒र्हिषो॒ नम॑ उक्तिं॒ यज॑न्ति ।
उ॒प॒या॒मगृ॑हीतोऽस्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑ ।। ३२ ।।
ku॒vida॒ṅga yava॑manto yavaṃ॑ ci॒dyathā॒ dāntya॑nupū॒rvaṃ vi॒yūya॑ | i॒hehai॑ṣāṃ kṛṇuhi॒ bhoja॑nāni॒ ye ba॒rhiṣo॒ nama॑ uktiṃ॒ yaja॑nti | u॒pa॒yā॒magṛ॑hīto’sya॒śvibhyāṃ॑ tvā॒ sara॑svatyai॒ tvendrā॑ya tvā su॒trāmṇe॑ | | ३२ | |
यु॒वᳪ सु॒राम॑मश्विना॒ नमु॑चावासु॒रे सचा॑ । वि॒पि॒पा॒ना शु॑भस्पती॒ इन्द्रं॒ कर्म॑स्वावतम् ।। ३३ ।।
yu॒vaᳪ su॒rāma॑maśvinā॒ namu॑cāvāsu॒re sacā॑ | vi॒pi॒pā॒nā śu॑bhaspatī॒ indraṃ॒ karma॑svāvatam | | ३३ | |
पु॒त्रमि॑व पि॒तरा॑व॒श्विनो॒भेन्द्रा॒वथु॒: काव्यै॑र्द॒ᳪसना॑भिः ।
यत्सु॒रामं॒ व्यपि॑ब॒: शची॑भि॒: सर॑स्वती त्वा मघवन्नभिष्णक् ।। ३४ ।।
pu॒trami॑va pi॒tarā॑va॒śvino॒bhendrā॒vathu॒: kāvyai॑rda॒ᳪsanā॑bhiḥ | yatsu॒rāmaṃ॒ vyapi॑ba॒: śacī॑bhi॒: sara॑svatī tvā maghavannabhiṣṇak | | ३४ | |