EeseDharmaSanātana Library
829मण्डल 9 · सूक्त 106
14 shlokइन्द्र॒मच्छ॑ सु॒ता इ॒मे वृष॑णं यन्तु॒ हर॑यः । श्रु॒ष्टी जा॒तास॒ इन्द॑वः स्व॒र्विद॑: ॥१॥
indra॒maccha॑ su॒tā i॒me vṛṣa॑ṇaṃ yantu॒ hara॑yaḥ | śru॒ṣṭī jā॒tāsa॒ inda॑vaḥ sva॒rvida॑: || १ ||
अ॒यं भरा॑य सान॒सिरिन्द्रा॑य पवते सु॒तः । सोमो॒ जैत्र॑स्य चेतति॒ यथा॑ वि॒दे ॥२॥
a॒yaṃ bharā॑ya sāna॒sirindrā॑ya pavate su॒taḥ | somo॒ jaitra॑sya cetati॒ yathā॑ vi॒de || २ ||
अ॒स्येदिन्द्रो॒ मदे॒ष्वा ग्रा॒भं गृ॑भ्णीत सान॒सिम् । वज्रं॑ च॒ वृष॑णं भर॒त्सम॑प्सु॒जित् ॥३॥
a॒syedindro॒ made॒ṣvā grā॒bhaṃ gṛ॑bhṇīta sāna॒sim | vajraṃ॑ ca॒ vṛṣa॑ṇaṃ bhara॒tsama॑psu॒jit || ३ ||
प्र ध॑न्वा सोम॒ जागृ॑वि॒रिन्द्रा॑येन्दो॒ परि॑ स्रव । द्यु॒मन्तं॒ शुष्म॒मा भ॑रा स्व॒र्विद॑म् ॥४॥
pra dha॑nvā soma॒ jāgṛ॑vi॒rindrā॑yendo॒ pari॑ srava | dyu॒mantaṃ॒ śuṣma॒mā bha॑rā sva॒rvida॑m || ४ ||
इन्द्रा॑य॒ वृष॑णं॒ मदं॒ पव॑स्व वि॒श्वद॑र्शतः । स॒हस्र॑यामा पथि॒कृद्वि॑चक्ष॒णः ॥५॥
indrā॑ya॒ vṛṣa॑ṇaṃ॒ madaṃ॒ pava॑sva vi॒śvada॑rśataḥ | sa॒hasra॑yāmā pathi॒kṛdvi॑cakṣa॒ṇaḥ || ५ ||
अ॒स्मभ्यं॑ गातु॒वित्त॑मो दे॒वेभ्यो॒ मधु॑मत्तमः । स॒हस्रं॑ याहि प॒थिभि॒: कनि॑क्रदत् ॥६॥
a॒smabhyaṃ॑ gātu॒vitta॑mo de॒vebhyo॒ madhu॑mattamaḥ | sa॒hasraṃ॑ yāhi pa॒thibhi॒: kani॑kradat || ६ ||
पव॑स्व दे॒ववी॑तय॒ इन्दो॒ धारा॑भि॒रोज॑सा । आ क॒लशं॒ मधु॑मान्त्सोम नः सदः ॥७॥
pava॑sva de॒vavī॑taya॒ indo॒ dhārā॑bhi॒roja॑sā | ā ka॒laśaṃ॒ madhu॑māntsoma naḥ sadaḥ || ७ ||
तव॑ द्र॒प्सा उ॑द॒प्रुत॒ इन्द्रं॒ मदा॑य वावृधुः । त्वां दे॒वासो॑ अ॒मृता॑य॒ कं प॑पुः ॥८॥
tava॑ dra॒psā u॑da॒pruta॒ indraṃ॒ madā॑ya vāvṛdhuḥ | tvāṃ de॒vāso॑ a॒mṛtā॑ya॒ kaṃ pa॑puḥ || ८ ||
आ न॑: सुतास इन्दवः पुना॒ना धा॑वता र॒यिम् । वृ॒ष्टिद्या॑वो रीत्यापः स्व॒र्विद॑: ॥९॥
ā na॑: sutāsa indavaḥ punā॒nā dhā॑vatā ra॒yim | vṛ॒ṣṭidyā॑vo rītyāpaḥ sva॒rvida॑: || ९ ||
सोम॑: पुना॒न ऊ॒र्मिणाऽव्यो॒ वारं॒ वि धा॑वति । अग्रे॑ वा॒चः पव॑मान॒: कनि॑क्रदत् ॥१०॥
soma॑: punā॒na ū॒rmiṇā’vyo॒ vāraṃ॒ vi dhā॑vati | agre॑ vā॒caḥ pava॑māna॒: kani॑kradat || १० ||
धी॒भिर्हि॑न्वन्ति वा॒जिनं॒ वने॒ क्रीळ॑न्त॒मत्य॑विम् । अ॒भि त्रि॑पृ॒ष्ठं म॒तय॒: सम॑स्वरन् ॥११॥
dhī॒bhirhi॑nvanti vā॒jinaṃ॒ vane॒ krīḷa॑nta॒matya॑vim | a॒bhi tri॑pṛ॒ṣṭhaṃ ma॒taya॒: sama॑svaran || ११ ||
अस॑र्जि क॒लशाँ॑ अ॒भि मी॒ळ्हे सप्ति॒र्न वा॑ज॒युः । पु॒ना॒नो वाचं॑ ज॒नय॑न्नसिष्यदत् ॥१२॥
asa॑rji ka॒laśām̐॑ a॒bhi mī॒ḷhe sapti॒rna vā॑ja॒yuḥ | pu॒nā॒no vācaṃ॑ ja॒naya॑nnasiṣyadat || १२ ||
पव॑ते हर्य॒तो हरि॒रति॒ ह्वरां॑सि॒ रंह्या॑ । अ॒भ्यर्ष॑न्त्स्तो॒तृभ्यो॑ वी॒रव॒द्यश॑: ॥१३॥
pava॑te harya॒to hari॒rati॒ hvarāṃ॑si॒ raṃhyā॑ | a॒bhyarṣa॑ntsto॒tṛbhyo॑ vī॒rava॒dyaśa॑: || १३ ||
अ॒या प॑वस्व देव॒युर्मधो॒र्धारा॑ असृक्षत । रेभ॑न्प॒वित्रं॒ पर्ये॑षि वि॒श्वत॑: ॥१४॥
a॒yā pa॑vasva deva॒yurmadho॒rdhārā॑ asṛkṣata | rebha॑npa॒vitraṃ॒ parye॑ṣi vi॒śvata॑: || १४ ||