EeseDharmaSanātana Library
718मण्डल 8 · सूक्त 98
12 shlokइन्द्रा॑य॒ साम॑ गायत॒ विप्रा॑य बृह॒ते बृ॒हत् । ध॒र्म॒कृते॑ विप॒श्चिते॑ पन॒स्यवे॑ ॥१॥
indrā॑ya॒ sāma॑ gāyata॒ viprā॑ya bṛha॒te bṛ॒hat | dha॒rma॒kṛte॑ vipa॒ścite॑ pana॒syave॑ || १ ||
त्वमि॑न्द्राभि॒भूर॑सि॒ त्वं सूर्य॑मरोचयः । वि॒श्वक॑र्मा वि॒श्वदे॑वो म॒हाँ अ॑सि ॥२॥
tvami॑ndrābhi॒bhūra॑si॒ tvaṃ sūrya॑marocayaḥ | vi॒śvaka॑rmā vi॒śvade॑vo ma॒hām̐ a॑si || २ ||
वि॒भ्राज॒ञ्ज्योति॑षा॒ स्व१रग॑च्छो रोच॒नं दि॒वः । दे॒वास्त॑ इन्द्र स॒ख्याय॑ येमिरे ॥३॥
vi॒bhrāja॒ñjyoti॑ṣā॒ sva१raga॑ccho roca॒naṃ di॒vaḥ | de॒vāsta॑ indra sa॒khyāya॑ yemire || ३ ||
एन्द्र॑ नो गधि प्रि॒यः स॑त्रा॒जिदगो॑ह्यः । गि॒रिर्न वि॒श्वत॑स्पृ॒थुः पति॑र्दि॒वः ॥४॥
endra॑ no gadhi pri॒yaḥ sa॑trā॒jidago॑hyaḥ | gi॒rirna vi॒śvata॑spṛ॒thuḥ pati॑rdi॒vaḥ || ४ ||
अ॒भि हि स॑त्य सोमपा उ॒भे ब॒भूथ॒ रोद॑सी । इन्द्रासि॑ सुन्व॒तो वृ॒धः पति॑र्दि॒वः ॥५॥
a॒bhi hi sa॑tya somapā u॒bhe ba॒bhūtha॒ roda॑sī | indrāsi॑ sunva॒to vṛ॒dhaḥ pati॑rdi॒vaḥ || ५ ||
त्वं हि शश्व॑तीना॒मिन्द्र॑ द॒र्ता पु॒रामसि॑ । ह॒न्ता दस्यो॒र्मनो॑र्वृ॒धः पति॑र्दि॒वः ॥६॥
tvaṃ hi śaśva॑tīnā॒mindra॑ da॒rtā pu॒rāmasi॑ | ha॒ntā dasyo॒rmano॑rvṛ॒dhaḥ pati॑rdi॒vaḥ || ६ ||
अधा॒ ही॑न्द्र गिर्वण॒ उप॑ त्वा॒ कामा॑न्म॒हः स॑सृ॒ज्महे॑ । उ॒देव॒ यन्त॑ उ॒दभि॑: ॥७॥
adhā॒ hī॑ndra girvaṇa॒ upa॑ tvā॒ kāmā॑nma॒haḥ sa॑sṛ॒jmahe॑ | u॒deva॒ yanta॑ u॒dabhi॑: || ७ ||
वार्ण त्वा॑ य॒व्याभि॒र्वर्ध॑न्ति शूर॒ ब्रह्मा॑णि । वा॒वृ॒ध्वांसं॑ चिदद्रिवो दि॒वेदि॑वे ॥८॥
vārṇa tvā॑ ya॒vyābhi॒rvardha॑nti śūra॒ brahmā॑ṇi | vā॒vṛ॒dhvāṃsaṃ॑ cidadrivo di॒vedi॑ve || ८ ||
यु॒ञ्जन्ति॒ हरी॑ इषि॒रस्य॒ गाथ॑यो॒रौ रथ॑ उ॒रुयु॑गे । इ॒न्द्र॒वाहा॑ वचो॒युजा॑ ॥९॥
yu॒ñjanti॒ harī॑ iṣi॒rasya॒ gātha॑yo॒rau ratha॑ u॒ruyu॑ge | i॒ndra॒vāhā॑ vaco॒yujā॑ || ९ ||
त्वं न॑ इ॒न्द्रा भ॑रँ॒ ओजो॑ नृ॒म्णं श॑तक्रतो विचर्षणे । आ वी॒रं पृ॑तना॒षह॑म् ॥१०॥
tvaṃ na॑ i॒ndrā bha॑ram॒̐ ojo॑ nṛ॒mṇaṃ śa॑takrato vicarṣaṇe | ā vī॒raṃ pṛ॑tanā॒ṣaha॑m || १० ||
त्वं हि न॑: पि॒ता व॑सो॒ त्वं मा॒ता श॑तक्रतो ब॒भूवि॑थ । अधा॑ ते सु॒म्नमी॑महे ॥११॥
tvaṃ hi na॑: pi॒tā va॑so॒ tvaṃ mā॒tā śa॑takrato ba॒bhūvi॑tha | adhā॑ te su॒mnamī॑mahe || ११ ||
त्वां शु॑ष्मिन्पुरुहूत वाज॒यन्त॒मुप॑ ब्रुवे शतक्रतो । स नो॑ रास्व सु॒वीर्य॑म् ॥१२॥
tvāṃ śu॑ṣminpuruhūta vāja॒yanta॒mupa॑ bruve śatakrato | sa no॑ rāsva su॒vīrya॑m || १२ ||