EeseDharmaSanātana Library
708मण्डल 8 · सूक्त 88
6 shlokतं वो॑ द॒स्ममृ॑ती॒षहं॒ वसो॑र्मन्दा॒नमन्ध॑सः । अ॒भि व॒त्सं न स्वस॑रेषु धे॒नव॒ इन्द्रं॑ गी॒र्भिर्न॑वामहे ॥१॥
taṃ vo॑ da॒smamṛ॑tī॒ṣahaṃ॒ vaso॑rmandā॒namandha॑saḥ | a॒bhi va॒tsaṃ na svasa॑reṣu dhe॒nava॒ indraṃ॑ gī॒rbhirna॑vāmahe || १ ||
द्यु॒क्षं सु॒दानुं॒ तवि॑षीभि॒रावृ॑तं गि॒रिं न पु॑रु॒भोज॑सम् । क्षु॒मन्तं॒ वाजं॑ श॒तिनं॑ सह॒स्रिणं॑ म॒क्षू गोम॑न्तमीमहे ॥२॥
dyu॒kṣaṃ su॒dānuṃ॒ tavi॑ṣībhi॒rāvṛ॑taṃ gi॒riṃ na pu॑ru॒bhoja॑sam | kṣu॒mantaṃ॒ vājaṃ॑ śa॒tinaṃ॑ saha॒sriṇaṃ॑ ma॒kṣū goma॑ntamīmahe || २ ||
न त्वा॑ बृ॒हन्तो॒ अद्र॑यो॒ वर॑न्त इन्द्र वी॒ळव॑: । यद्दित्स॑सि स्तुव॒ते माव॑ते॒ वसु॒ नकि॒ष्टदा मि॑नाति ते ॥३॥
na tvā॑ bṛ॒hanto॒ adra॑yo॒ vara॑nta indra vī॒ḷava॑: | yadditsa॑si stuva॒te māva॑te॒ vasu॒ naki॒ṣṭadā mi॑nāti te || ३ ||
योद्धा॑सि॒ क्रत्वा॒ शव॑सो॒त दं॒सना॒ विश्वा॑ जा॒ताभि म॒ज्मना॑ ।
आ त्वा॒यम॒र्क ऊ॒तये॑ ववर्तति॒ यं गोत॑मा॒ अजी॑जनन् ॥४॥
yoddhā॑si॒ kratvā॒ śava॑so॒ta daṃ॒sanā॒ viśvā॑ jā॒tābhi ma॒jmanā॑ | ā tvā॒yama॒rka ū॒taye॑ vavartati॒ yaṃ gota॑mā॒ ajī॑janan || ४ ||
प्र हि रि॑रि॒क्ष ओज॑सा दि॒वो अन्ते॑भ्य॒स्परि॑ । न त्वा॑ विव्याच॒ रज॑ इन्द्र॒ पार्थि॑व॒मनु॑ स्व॒धां व॑वक्षिथ ॥५॥
pra hi ri॑ri॒kṣa oja॑sā di॒vo ante॑bhya॒spari॑ | na tvā॑ vivyāca॒ raja॑ indra॒ pārthi॑va॒manu॑ sva॒dhāṃ va॑vakṣitha || ५ ||
नकि॒: परि॑ष्टिर्मघवन्म॒घस्य॑ ते॒ यद्दा॒शुषे॑ दश॒स्यसि॑ । अ॒स्माकं॑ बोध्यु॒चथ॑स्य चोदि॒ता मंहि॑ष्ठो॒ वाज॑सातये ॥६॥
naki॒: pari॑ṣṭirmaghavanma॒ghasya॑ te॒ yaddā॒śuṣe॑ daśa॒syasi॑ | a॒smākaṃ॑ bodhyu॒catha॑sya codi॒tā maṃhi॑ṣṭho॒ vāja॑sātaye || ६ ||