EeseDharmaSanātana Library
705मण्डल 8 · सूक्त 85
9 shlokआ मे॒ हवं॑ नास॒त्याऽश्वि॑ना॒ गच्छ॑तं यु॒वम् । मध्व॒: सोम॑स्य पी॒तये॑ ॥१॥
ā me॒ havaṃ॑ nāsa॒tyā’śvi॑nā॒ gaccha॑taṃ yu॒vam | madhva॒: soma॑sya pī॒taye॑ || १ ||
इ॒मं मे॒ स्तोम॑मश्विने॒मं मे॑ शृणुतं॒ हव॑म् । मध्व॒: सोम॑स्य पी॒तये॑ ॥२॥
i॒maṃ me॒ stoma॑maśvine॒maṃ me॑ śṛṇutaṃ॒ hava॑m | madhva॒: soma॑sya pī॒taye॑ || २ ||
अ॒यं वां॒ कृष्णो॑ अश्विना॒ हव॑ते वाजिनीवसू । मध्व॒: सोम॑स्य पी॒तये॑ ॥३॥
a॒yaṃ vāṃ॒ kṛṣṇo॑ aśvinā॒ hava॑te vājinīvasū | madhva॒: soma॑sya pī॒taye॑ || ३ ||
शृ॒णु॒तं ज॑रि॒तुर्हवं॒ कृष्ण॑स्य स्तुव॒तो न॑रा । मध्व॒: सोम॑स्य पी॒तये॑ ॥४॥
śṛ॒ṇu॒taṃ ja॑ri॒turhavaṃ॒ kṛṣṇa॑sya stuva॒to na॑rā | madhva॒: soma॑sya pī॒taye॑ || ४ ||
छ॒र्दिर्य॑न्त॒मदा॑भ्यं॒ विप्रा॑य स्तुव॒ते न॑रा । मध्व॒: सोम॑स्य पी॒तये॑ ॥५॥
cha॒rdirya॑nta॒madā॑bhyaṃ॒ viprā॑ya stuva॒te na॑rā | madhva॒: soma॑sya pī॒taye॑ || ५ ||
गच्छ॑तं दा॒शुषो॑ गृ॒हमि॒त्था स्तु॑व॒तो अ॑श्विना । मध्व॒: सोम॑स्य पी॒तये॑ ॥६॥
gaccha॑taṃ dā॒śuṣo॑ gṛ॒hami॒tthā stu॑va॒to a॑śvinā | madhva॒: soma॑sya pī॒taye॑ || ६ ||
यु॒ञ्जाथां॒ रास॑भं॒ रथे॑ वी॒ड्व॑ङ्गे वृषण्वसू । मध्व॒: सोम॑स्य पी॒तये॑ ॥७॥
yu॒ñjāthāṃ॒ rāsa॑bhaṃ॒ rathe॑ vī॒ḍva॑ṅge vṛṣaṇvasū | madhva॒: soma॑sya pī॒taye॑ || ७ ||
त्रि॒व॒न्धु॒रेण॑ त्रि॒वृता॒ रथे॒ना या॑तमश्विना । मध्व॒: सोम॑स्य पी॒तये॑ ॥८॥
tri॒va॒ndhu॒reṇa॑ tri॒vṛtā॒ rathe॒nā yā॑tamaśvinā | madhva॒: soma॑sya pī॒taye॑ || ८ ||
नू मे॒ गिरो॑ नास॒त्याऽश्वि॑ना॒ प्राव॑तं यु॒वम् । मध्व॒: सोम॑स्य पी॒तये॑ ॥९॥
nū me॒ giro॑ nāsa॒tyā’śvi॑nā॒ prāva॑taṃ yu॒vam | madhva॒: soma॑sya pī॒taye॑ || ९ ||