EeseDharmaSanātana Library
704मण्डल 8 · सूक्त 84
9 shlokप्रेष्ठं॑ वो॒ अति॑थिं स्तु॒षे मि॒त्रमि॑व प्रि॒यम् । अ॒ग्निं रथं॒ न वेद्य॑म् ॥१॥
preṣṭhaṃ॑ vo॒ ati॑thiṃ stu॒ṣe mi॒trami॑va pri॒yam | a॒gniṃ rathaṃ॒ na vedya॑m || १ ||
क॒विमि॑व॒ प्रचे॑तसं॒ यं दे॒वासो॒ अध॑ द्वि॒ता । नि मर्त्ये॑ष्वाद॒धुः ॥२॥
ka॒vimi॑va॒ prace॑tasaṃ॒ yaṃ de॒vāso॒ adha॑ dvi॒tā | ni martye॑ṣvāda॒dhuḥ || २ ||
त्वं य॑विष्ठ दा॒शुषो॒ नॄँ: पा॑हि शृणु॒धी गिर॑: । रक्षा॑ तो॒कमु॒त त्मना॑ ॥३॥
tvaṃ ya॑viṣṭha dā॒śuṣo॒ nṝm̐: pā॑hi śṛṇu॒dhī gira॑: | rakṣā॑ to॒kamu॒ta tmanā॑ || ३ ||
कया॑ ते अग्ने अङ्गिर॒ ऊर्जो॑ नपा॒दुप॑स्तुतिम् । वरा॑य देव म॒न्यवे॑ ॥४॥
kayā॑ te agne aṅgira॒ ūrjo॑ napā॒dupa॑stutim | varā॑ya deva ma॒nyave॑ || ४ ||
दाशे॑म॒ कस्य॒ मन॑सा य॒ज्ञस्य॑ सहसो यहो । कदु॑ वोच इ॒दं नम॑: ॥५॥
dāśe॑ma॒ kasya॒ mana॑sā ya॒jñasya॑ sahaso yaho | kadu॑ voca i॒daṃ nama॑: || ५ ||
अधा॒ त्वं हि न॒स्करो॒ विश्वा॑ अ॒स्मभ्यं॑ सुक्षि॒तीः । वाज॑द्रविणसो॒ गिर॑: ॥६॥
adhā॒ tvaṃ hi na॒skaro॒ viśvā॑ a॒smabhyaṃ॑ sukṣi॒tīḥ | vāja॑draviṇaso॒ gira॑: || ६ ||
कस्य॑ नू॒नं परी॑णसो॒ धियो॑ जिन्वसि दम्पते । गोषा॑ता॒ यस्य॑ ते॒ गिर॑: ॥७॥
kasya॑ nū॒naṃ parī॑ṇaso॒ dhiyo॑ jinvasi dampate | goṣā॑tā॒ yasya॑ te॒ gira॑: || ७ ||
तं म॑र्जयन्त सु॒क्रतुं॑ पुरो॒यावा॑नमा॒जिषु॑ । स्वेषु॒ क्षये॑षु वा॒जिन॑म् ॥८॥
taṃ ma॑rjayanta su॒kratuṃ॑ puro॒yāvā॑namā॒jiṣu॑ | sveṣu॒ kṣaye॑ṣu vā॒jina॑m || ८ ||
क्षेति॒ क्षेमे॑भिः सा॒धुभि॒र्नकि॒र्यं घ्नन्ति॒ हन्ति॒ यः । अग्ने॑ सु॒वीर॑ एधते ॥९॥
kṣeti॒ kṣeme॑bhiḥ sā॒dhubhi॒rnaki॒ryaṃ ghnanti॒ hanti॒ yaḥ | agne॑ su॒vīra॑ edhate || ९ ||