EeseDharmaSanātana Library
628मण्डल 8 · सूक्त 8
23 shlokआ नो॒ विश्वा॑भिरू॒तिभि॒रश्वि॑ना॒ गच्छ॑तं यु॒वम् । दस्रा॒ हिर॑ण्यवर्तनी॒ पिब॑तं सो॒म्यं मधु॑ ॥१॥
ā no॒ viśvā॑bhirū॒tibhi॒raśvi॑nā॒ gaccha॑taṃ yu॒vam | dasrā॒ hira॑ṇyavartanī॒ piba॑taṃ so॒myaṃ madhu॑ || १ ||
आ नू॒नं या॑तमश्विना॒ रथे॑न॒ सूर्य॑त्वचा । भुजी॒ हिर॑ण्यपेशसा॒ कवी॒ गम्भी॑रचेतसा ॥२॥
ā nū॒naṃ yā॑tamaśvinā॒ rathe॑na॒ sūrya॑tvacā | bhujī॒ hira॑ṇyapeśasā॒ kavī॒ gambhī॑racetasā || २ ||
आ या॑तं॒ नहु॑ष॒स्पर्याऽऽन्तरि॑क्षात्सुवृ॒क्तिभि॑: । पिबा॑थो अश्विना॒ मधु॒ कण्वा॑नां॒ सव॑ने सु॒तम् ॥३॥
ā yā॑taṃ॒ nahu॑ṣa॒sparyā’’ntari॑kṣātsuvṛ॒ktibhi॑: | pibā॑tho aśvinā॒ madhu॒ kaṇvā॑nāṃ॒ sava॑ne su॒tam || ३ ||
आ नो॑ यातं दि॒वस्पर्याऽन्तरि॑क्षादधप्रिया । पु॒त्रः कण्व॑स्य वामि॒ह सु॒षाव॑ सो॒म्यं मधु॑ ॥४॥
ā no॑ yātaṃ di॒vasparyā’ntari॑kṣādadhapriyā | pu॒traḥ kaṇva॑sya vāmi॒ha su॒ṣāva॑ so॒myaṃ madhu॑ || ४ ||
आ नो॑ यात॒मुप॑श्रु॒त्यश्वि॑ना॒ सोम॑पीतये । स्वाहा॒ स्तोम॑स्य वर्धना॒ प्र क॑वी धी॒तिभि॑र्नरा ॥५॥
ā no॑ yāta॒mupa॑śru॒tyaśvi॑nā॒ soma॑pītaye | svāhā॒ stoma॑sya vardhanā॒ pra ka॑vī dhī॒tibhi॑rnarā || ५ ||
यच्चि॒द्धि वां॑ पु॒र ऋष॑यो जुहू॒रेऽव॑से नरा । आ या॑तमश्वि॒ना ग॑त॒मुपे॒मां सु॑ष्टु॒तिं मम॑ ॥६॥
yacci॒ddhi vāṃ॑ pu॒ra ṛṣa॑yo juhū॒re’va॑se narā | ā yā॑tamaśvi॒nā ga॑ta॒mupe॒māṃ su॑ṣṭu॒tiṃ mama॑ || ६ ||
दि॒वश्चि॑द्रोच॒नादध्या नो॑ गन्तं स्वर्विदा । धी॒भिर्व॑त्सप्रचेतसा॒ स्तोमे॑भिर्हवनश्रुता ॥७॥
di॒vaści॑droca॒nādadhyā no॑ gantaṃ svarvidā | dhī॒bhirva॑tsapracetasā॒ stome॑bhirhavanaśrutā || ७ ||
किम॒न्ये पर्या॑सते॒ऽस्मत्स्तोमे॑भिर॒श्विना॑ । पु॒त्रः कण्व॑स्य वा॒मृषि॑र्गी॒र्भिर्व॒त्सो अ॑वीवृधत् ॥८॥
kima॒nye paryā॑sate॒’smatstome॑bhira॒śvinā॑ | pu॒traḥ kaṇva॑sya vā॒mṛṣi॑rgī॒rbhirva॒tso a॑vīvṛdhat || ८ ||
आ वां॒ विप्र॑ इ॒हाव॒सेऽह्व॒त्स्तोमे॑भिरश्विना । अरि॑प्रा॒ वृत्र॑हन्तमा॒ ता नो॑ भूतं मयो॒भुवा॑ ॥९॥
ā vāṃ॒ vipra॑ i॒hāva॒se’hva॒tstome॑bhiraśvinā | ari॑prā॒ vṛtra॑hantamā॒ tā no॑ bhūtaṃ mayo॒bhuvā॑ || ९ ||
आ यद्वां॒ योष॑णा॒ रथ॒मति॑ष्ठद्वाजिनीवसू । विश्वा॑न्यश्विना यु॒वं प्र धी॒तान्य॑गच्छतम् ॥१०॥
ā yadvāṃ॒ yoṣa॑ṇā॒ ratha॒mati॑ṣṭhadvājinīvasū | viśvā॑nyaśvinā yu॒vaṃ pra dhī॒tānya॑gacchatam || १० ||
अत॑: स॒हस्र॑निर्णिजा॒ रथे॒ना या॑तमश्विना । व॒त्सो वां॒ मधु॑म॒द्वचोऽशं॑सीत्का॒व्यः क॒विः ॥११॥
ata॑: sa॒hasra॑nirṇijā॒ rathe॒nā yā॑tamaśvinā | va॒tso vāṃ॒ madhu॑ma॒dvaco’śaṃ॑sītkā॒vyaḥ ka॒viḥ || ११ ||
पु॒रु॒म॒न्द्रा पु॑रू॒वसू॑ मनो॒तरा॑ रयी॒णाम् । स्तोमं॑ मे अ॒श्विना॑वि॒मम॒भि वह्नी॑ अनूषाताम् ॥१२॥
pu॒ru॒ma॒ndrā pu॑rū॒vasū॑ mano॒tarā॑ rayī॒ṇām | stomaṃ॑ me a॒śvinā॑vi॒mama॒bhi vahnī॑ anūṣātām || १२ ||
आ नो॒ विश्वा॑न्यश्विना ध॒त्तं राधां॒स्यह्र॑या । कृ॒तं न॑ ऋ॒त्विया॑वतो॒ मा नो॑ रीरधतं नि॒दे ॥१३॥
ā no॒ viśvā॑nyaśvinā dha॒ttaṃ rādhāṃ॒syahra॑yā | kṛ॒taṃ na॑ ṛ॒tviyā॑vato॒ mā no॑ rīradhataṃ ni॒de || १३ ||
यन्ना॑सत्या परा॒वति॒ यद्वा॒ स्थो अध्यम्ब॑रे । अत॑: स॒हस्र॑निर्णिजा॒ रथे॒ना या॑तमश्विना ॥१४॥
yannā॑satyā parā॒vati॒ yadvā॒ stho adhyamba॑re | ata॑: sa॒hasra॑nirṇijā॒ rathe॒nā yā॑tamaśvinā || १४ ||
यो वां॑ नासत्या॒वृषि॑र्गी॒र्भिर्व॒त्सो अवी॑वृधत् । तस्मै॑ स॒हस्र॑निर्णिज॒मिषं॑ धत्तं घृत॒श्चुत॑म् ॥१५॥
yo vāṃ॑ nāsatyā॒vṛṣi॑rgī॒rbhirva॒tso avī॑vṛdhat | tasmai॑ sa॒hasra॑nirṇija॒miṣaṃ॑ dhattaṃ ghṛta॒ścuta॑m || १५ ||
प्रास्मा॒ ऊर्जं॑ घृत॒श्चुत॒मश्वि॑ना॒ यच्छ॑तं यु॒वम् । यो वां॑ सु॒म्नाय॑ तु॒ष्टव॑द्वसू॒याद्दा॑नुनस्पती ॥१६॥
prāsmā॒ ūrjaṃ॑ ghṛta॒ścuta॒maśvi॑nā॒ yaccha॑taṃ yu॒vam | yo vāṃ॑ su॒mnāya॑ tu॒ṣṭava॑dvasū॒yāddā॑nunaspatī || १६ ||
आ नो॑ गन्तं रिशादसे॒मं स्तोमं॑ पुरुभुजा । कृ॒तं न॑: सु॒श्रियो॑ नरे॒मा दा॑तम॒भिष्ट॑ये ॥१७॥
ā no॑ gantaṃ riśādase॒maṃ stomaṃ॑ purubhujā | kṛ॒taṃ na॑: su॒śriyo॑ nare॒mā dā॑tama॒bhiṣṭa॑ye || १७ ||
आ वां॒ विश्वा॑भिरू॒तिभि॑: प्रि॒यमे॑धा अहूषत । राज॑न्तावध्व॒राणा॒मश्वि॑ना॒ याम॑हूतिषु ॥१८॥
ā vāṃ॒ viśvā॑bhirū॒tibhi॑: pri॒yame॑dhā ahūṣata | rāja॑ntāvadhva॒rāṇā॒maśvi॑nā॒ yāma॑hūtiṣu || १८ ||
आ नो॑ गन्तं मयो॒भुवाऽश्वि॑ना श॒म्भुवा॑ यु॒वम् । यो वां॑ विपन्यू धी॒तिभि॑र्गी॒र्भिर्व॒त्सो अवी॑वृधत् ॥१९॥
ā no॑ gantaṃ mayo॒bhuvā’śvi॑nā śa॒mbhuvā॑ yu॒vam | yo vāṃ॑ vipanyū dhī॒tibhi॑rgī॒rbhirva॒tso avī॑vṛdhat || १९ ||
याभि॒: कण्वं॒ मेधा॑तिथिं॒ याभि॒र्वशं॒ दश॑व्रजम् । याभि॒र्गोश॑र्य॒माव॑तं॒ ताभि॑र्नोऽवतं नरा ॥२०॥
yābhi॒: kaṇvaṃ॒ medhā॑tithiṃ॒ yābhi॒rvaśaṃ॒ daśa॑vrajam | yābhi॒rgośa॑rya॒māva॑taṃ॒ tābhi॑rno’vataṃ narā || २० ||
याभि॑र्नरा त्र॒सद॑स्यु॒माव॑तं॒ कृत्व्ये॒ धने॑ । ताभि॒: ष्व१स्माँ अ॑श्विना॒ प्राव॑तं॒ वाज॑सातये ॥२१॥
yābhi॑rnarā tra॒sada॑syu॒māva॑taṃ॒ kṛtvye॒ dhane॑ | tābhi॒: ṣva१smām̐ a॑śvinā॒ prāva॑taṃ॒ vāja॑sātaye || २१ ||
प्र वां॒ स्तोमा॑: सुवृ॒क्तयो॒ गिरो॑ वर्धन्त्वश्विना । पुरु॑त्रा॒ वृत्र॑हन्तमा॒ ता नो॑ भूतं पुरु॒स्पृहा॑ ॥२२॥
pra vāṃ॒ stomā॑: suvṛ॒ktayo॒ giro॑ vardhantvaśvinā | puru॑trā॒ vṛtra॑hantamā॒ tā no॑ bhūtaṃ puru॒spṛhā॑ || २२ ||
त्रीणि॑ प॒दान्य॒श्विनो॑रा॒विः सान्ति॒ गुहा॑ प॒रः । क॒वी ऋ॒तस्य॒ पत्म॑भिर॒र्वाग्जी॒वेभ्य॒स्परि॑ ॥२३॥
trīṇi॑ pa॒dānya॒śvino॑rā॒viḥ sānti॒ guhā॑ pa॒raḥ | ka॒vī ṛ॒tasya॒ patma॑bhira॒rvāgjī॒vebhya॒spari॑ || २३ ||