EeseDharmaSanātana Library
699मण्डल 8 · सूक्त 79
9 shlokअ॒यं कृ॒त्नुरगृ॑भीतो विश्व॒जिदु॒द्भिदित्सोम॑: । ऋषि॒र्विप्र॒: काव्ये॑न ॥१॥
a॒yaṃ kṛ॒tnuragṛ॑bhīto viśva॒jidu॒dbhiditsoma॑: | ṛṣi॒rvipra॒: kāvye॑na || १ ||
अ॒भ्यू॑र्णोति॒ यन्न॒ग्नं भि॒षक्ति॒ विश्वं॒ यत्तु॒रम् । प्रेम॒न्धः ख्य॒न्निः श्रो॒णो भू॑त् ॥२॥
a॒bhyū॑rṇoti॒ yanna॒gnaṃ bhi॒ṣakti॒ viśvaṃ॒ yattu॒ram | prema॒ndhaḥ khya॒nniḥ śro॒ṇo bhū॑t || २ ||
त्वं सो॑म तनू॒कृद्भ्यो॒ द्वेषो॑भ्यो॒ऽन्यकृ॑तेभ्यः । उ॒रु य॒न्तासि॒ वरू॑थम् ॥३॥
tvaṃ so॑ma tanū॒kṛdbhyo॒ dveṣo॑bhyo॒’nyakṛ॑tebhyaḥ | u॒ru ya॒ntāsi॒ varū॑tham || ३ ||
त्वं चि॒त्ती तव॒ दक्षै॑र्दि॒व आ पृ॑थि॒व्या ऋ॑जीषिन् । यावी॑र॒घस्य॑ चि॒द्द्वेष॑: ॥४॥
tvaṃ ci॒ttī tava॒ dakṣai॑rdi॒va ā pṛ॑thi॒vyā ṛ॑jīṣin | yāvī॑ra॒ghasya॑ ci॒ddveṣa॑: || ४ ||
अ॒र्थिनो॒ यन्ति॒ चेदर्थं॒ गच्छा॒निद्द॒दुषो॑ रा॒तिम् । व॒वृ॒ज्युस्तृष्य॑त॒: काम॑म् ॥५॥
a॒rthino॒ yanti॒ cedarthaṃ॒ gacchā॒nidda॒duṣo॑ rā॒tim | va॒vṛ॒jyustṛṣya॑ta॒: kāma॑m || ५ ||
वि॒दद्यत्पू॒र्व्यं न॒ष्टमुदी॑मृता॒युमी॑रयत् । प्रेमायु॑स्तारी॒दती॑र्णम् ॥६॥
vi॒dadyatpū॒rvyaṃ na॒ṣṭamudī॑mṛtā॒yumī॑rayat | premāyu॑stārī॒datī॑rṇam || ६ ||
सु॒शेवो॑ नो मृळ॒याकु॒रदृ॑प्तक्रतुरवा॒तः । भवा॑ नः सोम॒ शं हृ॒दे ॥७॥
su॒śevo॑ no mṛḷa॒yāku॒radṛ॑ptakraturavā॒taḥ | bhavā॑ naḥ soma॒ śaṃ hṛ॒de || ७ ||
मा न॑: सोम॒ सं वी॑विजो॒ मा वि बी॑भिषथा राजन् । मा नो॒ हार्दि॑ त्वि॒षा व॑धीः ॥८॥
mā na॑: soma॒ saṃ vī॑vijo॒ mā vi bī॑bhiṣathā rājan | mā no॒ hārdi॑ tvi॒ṣā va॑dhīḥ || ८ ||
अव॒ यत्स्वे स॒धस्थे॑ दे॒वानां॑ दुर्म॒तीरीक्षे॑ । राज॒न्नप॒ द्विष॑: सेध॒ मीढ्वो॒ अप॒ स्रिध॑: सेध ॥९॥
ava॒ yatsve sa॒dhasthe॑ de॒vānāṃ॑ durma॒tīrīkṣe॑ | rāja॒nnapa॒ dviṣa॑: sedha॒ mīḍhvo॒ apa॒ sridha॑: sedha || ९ ||