EeseDharmaSanātana Library
698मण्डल 8 · सूक्त 78
10 shlokपु॒रो॒ळाशं॑ नो॒ अन्ध॑स॒ इन्द्र॑ स॒हस्र॒मा भ॑र । श॒ता च॑ शूर॒ गोना॑म् ॥१॥
pu॒ro॒ḷāśaṃ॑ no॒ andha॑sa॒ indra॑ sa॒hasra॒mā bha॑ra | śa॒tā ca॑ śūra॒ gonā॑m || १ ||
आ नो॑ भर॒ व्यञ्ज॑नं॒ गामश्व॑म॒भ्यञ्ज॑नम् । सचा॑ म॒ना हि॑र॒ण्यया॑ ॥२॥
ā no॑ bhara॒ vyañja॑naṃ॒ gāmaśva॑ma॒bhyañja॑nam | sacā॑ ma॒nā hi॑ra॒ṇyayā॑ || २ ||
उ॒त न॑: कर्ण॒शोभ॑ना पु॒रूणि॑ धृष्ण॒वा भ॑र । त्वं हि शृ॑ण्वि॒षे व॑सो ॥३॥
u॒ta na॑: karṇa॒śobha॑nā pu॒rūṇi॑ dhṛṣṇa॒vā bha॑ra | tvaṃ hi śṛ॑ṇvi॒ṣe va॑so || ३ ||
नकीं॑ वृधी॒क इ॑न्द्र ते॒ न सु॒षा न सु॒दा उ॒त । नान्यस्त्वच्छू॑र वा॒घत॑: ॥४॥
nakīṃ॑ vṛdhī॒ka i॑ndra te॒ na su॒ṣā na su॒dā u॒ta | nānyastvacchū॑ra vā॒ghata॑: || ४ ||
नकी॒मिन्द्रो॒ निक॑र्तवे॒ न श॒क्रः परि॑शक्तवे । विश्वं॑ शृणोति॒ पश्य॑ति ॥५॥
nakī॒mindro॒ nika॑rtave॒ na śa॒kraḥ pari॑śaktave | viśvaṃ॑ śṛṇoti॒ paśya॑ti || ५ ||
स म॒न्युं मर्त्या॑ना॒मद॑ब्धो॒ नि चि॑कीषते । पु॒रा नि॒दश्चि॑कीषते ॥६॥
sa ma॒nyuṃ martyā॑nā॒mada॑bdho॒ ni ci॑kīṣate | pu॒rā ni॒daści॑kīṣate || ६ ||
क्रत्व॒ इत्पू॒र्णमु॒दरं॑ तु॒रस्या॑स्ति विध॒तः । वृ॒त्र॒घ्नः सो॑म॒पाव्न॑: ॥७॥
kratva॒ itpū॒rṇamu॒daraṃ॑ tu॒rasyā॑sti vidha॒taḥ | vṛ॒tra॒ghnaḥ so॑ma॒pāvna॑: || ७ ||
त्वे वसू॑नि॒ संग॑ता॒ विश्वा॑ च सोम॒ सौभ॑गा । सु॒दात्वप॑रिह्वृता ॥८॥
tve vasū॑ni॒ saṃga॑tā॒ viśvā॑ ca soma॒ saubha॑gā | su॒dātvapa॑rihvṛtā || ८ ||
त्वामिद्य॑व॒युर्मम॒ कामो॑ ग॒व्युर्हि॑रण्य॒युः । त्वाम॑श्व॒युरेष॑ते ॥९॥
tvāmidya॑va॒yurmama॒ kāmo॑ ga॒vyurhi॑raṇya॒yuḥ | tvāma॑śva॒yureṣa॑te || ९ ||
तवेदि॑न्द्रा॒हमा॒शसा॒ हस्ते॒ दात्रं॑ च॒ना द॑दे । दि॒नस्य॑ वा मघव॒न्त्सम्भृ॑तस्य वा पू॒र्धि यव॑स्य का॒शिना॑ ॥१०॥
tavedi॑ndrā॒hamā॒śasā॒ haste॒ dātraṃ॑ ca॒nā da॑de | di॒nasya॑ vā maghava॒ntsambhṛ॑tasya vā pū॒rdhi yava॑sya kā॒śinā॑ || १० ||