EeseDharmaSanātana Library
697मण्डल 8 · सूक्त 77
11 shlokज॒ज्ञा॒नो नु श॒तक्र॑तु॒र्वि पृ॑च्छ॒दिति॑ मा॒तर॑म् । क उ॒ग्राः के ह॑ शृण्विरे ॥१॥
ja॒jñā॒no nu śa॒takra॑tu॒rvi pṛ॑ccha॒diti॑ mā॒tara॑m | ka u॒grāḥ ke ha॑ śṛṇvire || १ ||
आदीं॑ शव॒स्य॑ब्रवीदौर्णवा॒भम॑ही॒शुव॑म् । ते पु॑त्र सन्तु नि॒ष्टुर॑: ॥२॥
ādīṃ॑ śava॒sya॑bravīdaurṇavā॒bhama॑hī॒śuva॑m | te pu॑tra santu ni॒ṣṭura॑: || २ ||
समित्तान्वृ॑त्र॒हाखि॑द॒त्खे अ॒राँ इ॑व॒ खेद॑या । प्रवृ॑द्धो दस्यु॒हाभ॑वत् ॥३॥
samittānvṛ॑tra॒hākhi॑da॒tkhe a॒rām̐ i॑va॒ kheda॑yā | pravṛ॑ddho dasyu॒hābha॑vat || ३ ||
एक॑या प्रति॒धापि॑बत्सा॒कं सरां॑सि त्रिं॒शत॑म् । इन्द्र॒: सोम॑स्य काणु॒का ॥४॥
eka॑yā prati॒dhāpi॑batsā॒kaṃ sarāṃ॑si triṃ॒śata॑m | indra॒: soma॑sya kāṇu॒kā || ४ ||
अ॒भि ग॑न्ध॒र्वम॑तृणदबु॒ध्नेषु॒ रज॒स्स्वा । इन्द्रो॑ ब्र॒ह्मभ्य॒ इद्वृ॒धे ॥५॥
a॒bhi ga॑ndha॒rvama॑tṛṇadabu॒dhneṣu॒ raja॒ssvā | indro॑ bra॒hmabhya॒ idvṛ॒dhe || ५ ||
निरा॑विध्यद्गि॒रिभ्य॒ आ धा॒रय॑त्प॒क्वमो॑द॒नम् । इन्द्रो॑ बु॒न्दं स्वा॑ततम् ॥६॥
nirā॑vidhyadgi॒ribhya॒ ā dhā॒raya॑tpa॒kvamo॑da॒nam | indro॑ bu॒ndaṃ svā॑tatam || ६ ||
श॒तब्र॑ध्न॒ इषु॒स्तव॑ स॒हस्र॑पर्ण॒ एक॒ इत् । यमि॑न्द्र चकृ॒षे युज॑म् ॥७॥
śa॒tabra॑dhna॒ iṣu॒stava॑ sa॒hasra॑parṇa॒ eka॒ it | yami॑ndra cakṛ॒ṣe yuja॑m || ७ ||
तेन॑ स्तो॒तृभ्य॒ आ भ॑र॒ नृभ्यो॒ नारि॑भ्यो॒ अत्त॑वे । स॒द्यो जा॒त ऋ॑भुष्ठिर ॥८॥
tena॑ sto॒tṛbhya॒ ā bha॑ra॒ nṛbhyo॒ nāri॑bhyo॒ atta॑ve | sa॒dyo jā॒ta ṛ॑bhuṣṭhira || ८ ||
ए॒ता च्यौ॒त्नानि॑ ते कृ॒ता वर्षि॑ष्ठानि॒ परी॑णसा । हृ॒दा वी॒ड्व॑धारयः ॥९॥
e॒tā cyau॒tnāni॑ te kṛ॒tā varṣi॑ṣṭhāni॒ parī॑ṇasā | hṛ॒dā vī॒ḍva॑dhārayaḥ || ९ ||
विश्वेत्ता विष्णु॒राभ॑रदुरुक्र॒मस्त्वेषि॑तः । श॒तं म॑हि॒षान्क्षी॑रपा॒कमो॑द॒नं व॑रा॒हमिन्द्र॑ एमु॒षम् ॥१०॥
viśvettā viṣṇu॒rābha॑radurukra॒mastveṣi॑taḥ | śa॒taṃ ma॑hi॒ṣānkṣī॑rapā॒kamo॑da॒naṃ va॑rā॒hamindra॑ emu॒ṣam || १० ||
तु॒वि॒क्षं ते॒ सुकृ॑तं सू॒मयं॒ धनु॑: सा॒धुर्बु॒न्दो हि॑र॒ण्यय॑: । उ॒भा ते॑ बा॒हू रण्या॒ सुसं॑स्कृत ऋदू॒पे चि॑दृदू॒वृधा॑ ॥११॥
tu॒vi॒kṣaṃ te॒ sukṛ॑taṃ sū॒mayaṃ॒ dhanu॑: sā॒dhurbu॒ndo hi॑ra॒ṇyaya॑: | u॒bhā te॑ bā॒hū raṇyā॒ susaṃ॑skṛta ṛdū॒pe ci॑dṛdū॒vṛdhā॑ || ११ ||