EeseDharmaSanātana Library
696मण्डल 8 · सूक्त 76
12 shlokइ॒मं नु मा॒यिनं॑ हुव॒ इन्द्र॒मीशा॑न॒मोज॑सा । म॒रुत्व॑न्तं॒ न वृ॒ञ्जसे॑ ॥१॥
i॒maṃ nu mā॒yinaṃ॑ huva॒ indra॒mīśā॑na॒moja॑sā | ma॒rutva॑ntaṃ॒ na vṛ॒ñjase॑ || १ ||
अ॒यमिन्द्रो॑ म॒रुत्स॑खा॒ वि वृ॒त्रस्या॑भिन॒च्छिर॑: । वज्रे॑ण श॒तप॑र्वणा ॥२॥
a॒yamindro॑ ma॒rutsa॑khā॒ vi vṛ॒trasyā॑bhina॒cchira॑: | vajre॑ṇa śa॒tapa॑rvaṇā || २ ||
वा॒वृ॒धा॒नो म॒रुत्स॒खेन्द्रो॒ वि वृ॒त्रमै॑रयत् । सृ॒जन्त्स॑मु॒द्रिया॑ अ॒पः ॥३॥
vā॒vṛ॒dhā॒no ma॒rutsa॒khendro॒ vi vṛ॒tramai॑rayat | sṛ॒jantsa॑mu॒driyā॑ a॒paḥ || ३ ||
अ॒यं ह॒ येन॒ वा इ॒दं स्व॑र्म॒रुत्व॑ता जि॒तम् । इन्द्रे॑ण॒ सोम॑पीतये ॥४॥
a॒yaṃ ha॒ yena॒ vā i॒daṃ sva॑rma॒rutva॑tā ji॒tam | indre॑ṇa॒ soma॑pītaye || ४ ||
म॒रुत्व॑न्तमृजी॒षिण॒मोज॑स्वन्तं विर॒प्शिन॑म् । इन्द्रं॑ गी॒र्भिर्ह॑वामहे ॥५॥
ma॒rutva॑ntamṛjī॒ṣiṇa॒moja॑svantaṃ vira॒pśina॑m | indraṃ॑ gī॒rbhirha॑vāmahe || ५ ||
इन्द्रं॑ प्र॒त्नेन॒ मन्म॑ना म॒रुत्व॑न्तं हवामहे । अ॒स्य सोम॑स्य पी॒तये॑ ॥६॥
indraṃ॑ pra॒tnena॒ manma॑nā ma॒rutva॑ntaṃ havāmahe | a॒sya soma॑sya pī॒taye॑ || ६ ||
म॒रुत्वाँ॑ इन्द्र मीढ्व॒: पिबा॒ सोमं॑ शतक्रतो । अ॒स्मिन्य॒ज्ञे पु॑रुष्टुत ॥७॥
ma॒rutvām̐॑ indra mīḍhva॒: pibā॒ somaṃ॑ śatakrato | a॒sminya॒jñe pu॑ruṣṭuta || ७ ||
तुभ्येदि॑न्द्र म॒रुत्व॑ते सु॒ताः सोमा॑सो अद्रिवः । हृ॒दा हू॑यन्त उ॒क्थिन॑: ॥८॥
tubhyedi॑ndra ma॒rutva॑te su॒tāḥ somā॑so adrivaḥ | hṛ॒dā hū॑yanta u॒kthina॑: || ८ ||
पिबेदि॑न्द्र म॒रुत्स॑खा सु॒तं सोमं॒ दिवि॑ष्टिषु । वज्रं॒ शिशा॑न॒ ओज॑सा ॥९॥
pibedi॑ndra ma॒rutsa॑khā su॒taṃ somaṃ॒ divi॑ṣṭiṣu | vajraṃ॒ śiśā॑na॒ oja॑sā || ९ ||
उ॒त्तिष्ठ॒न्नोज॑सा स॒ह पी॒त्वी शिप्रे॑ अवेपयः । सोम॑मिन्द्र च॒मू सु॒तम् ॥१०॥
u॒ttiṣṭha॒nnoja॑sā sa॒ha pī॒tvī śipre॑ avepayaḥ | soma॑mindra ca॒mū su॒tam || १० ||
अनु॑ त्वा॒ रोद॑सी उ॒भे क्रक्ष॑माणमकृपेताम् । इन्द्र॒ यद्द॑स्यु॒हाभ॑वः ॥११॥
anu॑ tvā॒ roda॑sī u॒bhe krakṣa॑māṇamakṛpetām | indra॒ yadda॑syu॒hābha॑vaḥ || ११ ||
वाच॑म॒ष्टाप॑दीम॒हं नव॑स्रक्तिमृत॒स्पृश॑म् । इन्द्रा॒त्परि॑ त॒न्वं॑ ममे ॥१२॥
vāca॑ma॒ṣṭāpa॑dīma॒haṃ nava॑sraktimṛta॒spṛśa॑m | indrā॒tpari॑ ta॒nvaṃ॑ mame || १२ ||