EeseDharmaSanātana Library
695मण्डल 8 · सूक्त 75
16 shlokयु॒क्ष्वा हि दे॑व॒हूत॑माँ॒ अश्वाँ॑ अग्ने र॒थीरि॑व । नि होता॑ पू॒र्व्यः स॑दः ॥१॥
yu॒kṣvā hi de॑va॒hūta॑mām॒̐ aśvām̐॑ agne ra॒thīri॑va | ni hotā॑ pū॒rvyaḥ sa॑daḥ || १ ||
उ॒त नो॑ देव दे॒वाँ अच्छा॑ वोचो वि॒दुष्ट॑रः । श्रद्विश्वा॒ वार्या॑ कृधि ॥२॥
u॒ta no॑ deva de॒vām̐ acchā॑ voco vi॒duṣṭa॑raḥ | śradviśvā॒ vāryā॑ kṛdhi || २ ||
त्वं ह॒ यद्य॑विष्ठ्य॒ सह॑सः सूनवाहुत । ऋ॒तावा॑ य॒ज्ञियो॒ भुव॑: ॥३॥
tvaṃ ha॒ yadya॑viṣṭhya॒ saha॑saḥ sūnavāhuta | ṛ॒tāvā॑ ya॒jñiyo॒ bhuva॑: || ३ ||
अ॒यम॒ग्निः स॑ह॒स्रिणो॒ वाज॑स्य श॒तिन॒स्पति॑: । मू॒र्धा क॒वी र॑यी॒णाम् ॥४॥
a॒yama॒gniḥ sa॑ha॒sriṇo॒ vāja॑sya śa॒tina॒spati॑: | mū॒rdhā ka॒vī ra॑yī॒ṇām || ४ ||
तं ने॒मिमृ॒भवो॑ य॒था ऽऽन॑मस्व॒ सहू॑तिभिः । नेदी॑यो य॒ज्ञम॑ङ्गिरः ॥५॥
taṃ ne॒mimṛ॒bhavo॑ ya॒thā ’’na॑masva॒ sahū॑tibhiḥ | nedī॑yo ya॒jñama॑ṅgiraḥ || ५ ||
तस्मै॑ नू॒नम॒भिद्य॑वे वा॒चा वि॑रूप॒ नित्य॑या । वृष्णे॑ चोदस्व सुष्टु॒तिम् ॥६॥
tasmai॑ nū॒nama॒bhidya॑ve vā॒cā vi॑rūpa॒ nitya॑yā | vṛṣṇe॑ codasva suṣṭu॒tim || ६ ||
कमु॑ ष्विदस्य॒ सेन॑या॒ग्नेरपा॑कचक्षसः । प॒णिं गोषु॑ स्तरामहे ॥७॥
kamu॑ ṣvidasya॒ sena॑yā॒gnerapā॑kacakṣasaḥ | pa॒ṇiṃ goṣu॑ starāmahe || ७ ||
मा नो॑ दे॒वानां॒ विश॑: प्रस्ना॒तीरि॑वो॒स्राः । कृ॒शं न हा॑सु॒रघ्न्या॑: ॥८॥
mā no॑ de॒vānāṃ॒ viśa॑: prasnā॒tīri॑vo॒srāḥ | kṛ॒śaṃ na hā॑su॒raghnyā॑: || ८ ||
मा न॑: समस्य दू॒ढ्य१: परि॑द्वेषसो अंह॒तिः । ऊ॒र्मिर्न नाव॒मा व॑धीत् ॥९॥
mā na॑: samasya dū॒ḍhya१: pari॑dveṣaso aṃha॒tiḥ | ū॒rmirna nāva॒mā va॑dhīt || ९ ||
नम॑स्ते अग्न॒ ओज॑से गृ॒णन्ति॑ देव कृ॒ष्टय॑: । अमै॑र॒मित्र॑मर्दय ॥१०॥
nama॑ste agna॒ oja॑se gṛ॒ṇanti॑ deva kṛ॒ṣṭaya॑: | amai॑ra॒mitra॑mardaya || १० ||
कु॒वित्सु नो॒ गवि॑ष्ट॒येऽग्ने॑ सं॒वेषि॑षो र॒यिम् । उरु॑कृदु॒रु ण॑स्कृधि ॥११॥
ku॒vitsu no॒ gavi॑ṣṭa॒ye’gne॑ saṃ॒veṣi॑ṣo ra॒yim | uru॑kṛdu॒ru ṇa॑skṛdhi || ११ ||
मा नो॑ अ॒स्मिन्म॑हाध॒ने परा॑ वर्ग्भार॒भृद्य॑था । सं॒वर्गं॒ सं र॒यिं ज॑य ॥१२॥
mā no॑ a॒sminma॑hādha॒ne parā॑ vargbhāra॒bhṛdya॑thā | saṃ॒vargaṃ॒ saṃ ra॒yiṃ ja॑ya || १२ ||
अ॒न्यम॒स्मद्भि॒या इ॒यमग्ने॒ सिष॑क्तु दु॒च्छुना॑ । वर्धा॑ नो॒ अम॑व॒च्छव॑: ॥१३॥
a॒nyama॒smadbhi॒yā i॒yamagne॒ siṣa॑ktu du॒cchunā॑ | vardhā॑ no॒ ama॑va॒cchava॑: || १३ ||
यस्याजु॑षन्नम॒स्विन॒: शमी॒मदु॑र्मखस्य वा । तं घेद॒ग्निर्वृ॒धाव॑ति ॥१४॥
yasyāju॑ṣannama॒svina॒: śamī॒madu॑rmakhasya vā | taṃ gheda॒gnirvṛ॒dhāva॑ti || १४ ||
पर॑स्या॒ अधि॑ सं॒वतोऽव॑राँ अ॒भ्या त॑र । यत्रा॒हमस्मि॒ ताँ अ॑व ॥१५॥
para॑syā॒ adhi॑ saṃ॒vato’va॑rām̐ a॒bhyā ta॑ra | yatrā॒hamasmi॒ tām̐ a॑va || १५ ||
वि॒द्मा हि ते॑ पु॒रा व॒यमग्ने॑ पि॒तुर्यथाव॑सः । अधा॑ ते सु॒म्नमी॑महे ॥१६॥
vi॒dmā hi te॑ pu॒rā va॒yamagne॑ pi॒turyathāva॑saḥ | adhā॑ te su॒mnamī॑mahe || १६ ||