EeseDharmaSanātana Library
690मण्डल 8 · सूक्त 70
15 shlokयो राजा॑ चर्षणी॒नां याता॒ रथे॑भि॒रध्रि॑गुः । विश्वा॑सां तरु॒ता पृत॑नानां॒ ज्येष्ठो॒ यो वृ॑त्र॒हा गृ॒णे ॥१॥
yo rājā॑ carṣaṇī॒nāṃ yātā॒ rathe॑bhi॒radhri॑guḥ | viśvā॑sāṃ taru॒tā pṛta॑nānāṃ॒ jyeṣṭho॒ yo vṛ॑tra॒hā gṛ॒ṇe || १ ||
इन्द्रं॒ तं शु॑म्भ पुरुहन्म॒न्नव॑से॒ यस्य॑ द्वि॒ता वि॑ध॒र्तरि॑ । हस्ता॑य॒ वज्र॒: प्रति॑ धायि दर्श॒तो म॒हो दि॒वे न सूर्य॑: ॥२॥
indraṃ॒ taṃ śu॑mbha puruhanma॒nnava॑se॒ yasya॑ dvi॒tā vi॑dha॒rtari॑ | hastā॑ya॒ vajra॒: prati॑ dhāyi darśa॒to ma॒ho di॒ve na sūrya॑: || २ ||
नकि॒ष्टं कर्म॑णा नश॒द्यश्च॒कार॑ स॒दावृ॑धम् । इन्द्रं॒ न य॒ज्ञैर्वि॒श्वगू॑र्त॒मृभ्व॑स॒मधृ॑ष्टं धृ॒ष्ण्वो॑जसम् ॥३॥
naki॒ṣṭaṃ karma॑ṇā naśa॒dyaśca॒kāra॑ sa॒dāvṛ॑dham | indraṃ॒ na ya॒jñairvi॒śvagū॑rta॒mṛbhva॑sa॒madhṛ॑ṣṭaṃ dhṛ॒ṣṇvo॑jasam || ३ ||
अषा॑ळ्हमु॒ग्रं पृत॑नासु सास॒हिं यस्मि॑न्म॒हीरु॑रु॒ज्रय॑: । सं धे॒नवो॒ जाय॑माने अनोनवु॒र्द्याव॒: क्षामो॑ अनोनवुः ॥४॥
aṣā॑ḷhamu॒graṃ pṛta॑nāsu sāsa॒hiṃ yasmi॑nma॒hīru॑ru॒jraya॑: | saṃ dhe॒navo॒ jāya॑māne anonavu॒rdyāva॒: kṣāmo॑ anonavuḥ || ४ ||
यद्द्याव॑ इन्द्र ते श॒तं श॒तं भूमी॑रु॒त स्युः । न त्वा॑ वज्रिन्त्स॒हस्रं॒ सूर्या॒ अनु॒ न जा॒तम॑ष्ट॒ रोद॑सी ॥५॥
yaddyāva॑ indra te śa॒taṃ śa॒taṃ bhūmī॑ru॒ta syuḥ | na tvā॑ vajrintsa॒hasraṃ॒ sūryā॒ anu॒ na jā॒tama॑ṣṭa॒ roda॑sī || ५ ||
आ प॑प्राथ महि॒ना वृष्ण्या॑ वृष॒न्विश्वा॑ शविष्ठ॒ शव॑सा । अ॒स्माँ अ॑व मघव॒न्गोम॑ति व्र॒जे वज्रि॑ञ्चि॒त्राभि॑रू॒तिभि॑: ॥६॥
ā pa॑prātha mahi॒nā vṛṣṇyā॑ vṛṣa॒nviśvā॑ śaviṣṭha॒ śava॑sā | a॒smām̐ a॑va maghava॒ngoma॑ti vra॒je vajri॑ñci॒trābhi॑rū॒tibhi॑: || ६ ||
न सी॒मदे॑व आप॒दिषं॑ दीर्घायो॒ मर्त्य॑: । एत॑ग्वा चि॒द्य एत॑शा यु॒योज॑ते॒ हरी॒ इन्द्रो॑ यु॒योज॑ते ॥७॥
na sī॒made॑va āpa॒diṣaṃ॑ dīrghāyo॒ martya॑: | eta॑gvā ci॒dya eta॑śā yu॒yoja॑te॒ harī॒ indro॑ yu॒yoja॑te || ७ ||
तं वो॑ म॒हो म॒हाय्य॒मिन्द्रं॑ दा॒नाय॑ स॒क्षणि॑म् । यो गा॒धेषु॒ य आर॑णेषु॒ हव्यो॒ वाजे॒ष्वस्ति॒ हव्य॑: ॥८॥
taṃ vo॑ ma॒ho ma॒hāyya॒mindraṃ॑ dā॒nāya॑ sa॒kṣaṇi॑m | yo gā॒dheṣu॒ ya āra॑ṇeṣu॒ havyo॒ vāje॒ṣvasti॒ havya॑: || ८ ||
उदू॒ षु णो॑ वसो म॒हे मृ॒शस्व॑ शूर॒ राध॑से । उदू॒ षु म॒ह्यै म॑घवन्म॒घत्त॑य॒ उदि॑न्द्र॒ श्रव॑से म॒हे ॥९॥
udū॒ ṣu ṇo॑ vaso ma॒he mṛ॒śasva॑ śūra॒ rādha॑se | udū॒ ṣu ma॒hyai ma॑ghavanma॒ghatta॑ya॒ udi॑ndra॒ śrava॑se ma॒he || ९ ||
त्वं न॑ इन्द्र ऋत॒युस्त्वा॒निदो॒ नि तृ॑म्पसि । मध्ये॑ वसिष्व तुविनृम्णो॒र्वोर्नि दा॒सं शि॑श्नथो॒ हथै॑: ॥१०॥
tvaṃ na॑ indra ṛta॒yustvā॒nido॒ ni tṛ॑mpasi | madhye॑ vasiṣva tuvinṛmṇo॒rvorni dā॒saṃ śi॑śnatho॒ hathai॑: || १० ||
अ॒न्यव्र॑त॒ममा॑नुष॒मय॑ज्वान॒मदे॑वयुम् । अव॒ स्वः सखा॑ दुधुवीत॒ पर्व॑तः सु॒घ्नाय॒ दस्युं॒ पर्व॑तः ॥११॥
a॒nyavra॑ta॒mamā॑nuṣa॒maya॑jvāna॒made॑vayum | ava॒ svaḥ sakhā॑ dudhuvīta॒ parva॑taḥ su॒ghnāya॒ dasyuṃ॒ parva॑taḥ || ११ ||
त्वं न॑ इन्द्रासां॒ हस्ते॑ शविष्ठ दा॒वने॑ । धा॒नानां॒ न सं गृ॑भायास्म॒युर्द्विः सं गृ॑भायास्म॒युः ॥१२॥
tvaṃ na॑ indrāsāṃ॒ haste॑ śaviṣṭha dā॒vane॑ | dhā॒nānāṃ॒ na saṃ gṛ॑bhāyāsma॒yurdviḥ saṃ gṛ॑bhāyāsma॒yuḥ || १२ ||
सखा॑य॒: क्रतु॑मिच्छत क॒था रा॑धाम श॒रस्य॑ । उप॑स्तुतिं भो॒जः सू॒रिर्यो अह्र॑यः ॥१३॥
sakhā॑ya॒: kratu॑micchata ka॒thā rā॑dhāma śa॒rasya॑ | upa॑stutiṃ bho॒jaḥ sū॒riryo ahra॑yaḥ || १३ ||
भूरि॑भिः समह॒ ऋषि॑भिर्ब॒र्हिष्म॑द्भिः स्तविष्यसे । यदि॒त्थमेक॑मेक॒मिच्छर॑ व॒त्सान्प॑रा॒दद॑: ॥१४॥
bhūri॑bhiḥ samaha॒ ṛṣi॑bhirba॒rhiṣma॑dbhiḥ staviṣyase | yadi॒tthameka॑meka॒micchara॑ va॒tsānpa॑rā॒dada॑: || १४ ||
क॒र्ण॒गृह्या॑ म॒घवा॑ शौरदे॒व्यो व॒त्सं न॑स्त्रि॒भ्य आन॑यत् । अ॒जां सू॒रिर्न धात॑वे ॥१५॥
ka॒rṇa॒gṛhyā॑ ma॒ghavā॑ śaurade॒vyo va॒tsaṃ na॑stri॒bhya āna॑yat | a॒jāṃ sū॒rirna dhāta॑ve || १५ ||