EeseDharmaSanātana Library
627मण्डल 8 · सूक्त 7
36 shlokप्र यद्व॑स्त्रि॒ष्टुभ॒मिषं॒ मरु॑तो॒ विप्रो॒ अक्ष॑रत् । वि पर्व॑तेषु राजथ ॥१॥
pra yadva॑stri॒ṣṭubha॒miṣaṃ॒ maru॑to॒ vipro॒ akṣa॑rat | vi parva॑teṣu rājatha || १ ||
यद॒ङ्ग त॑विषीयवो॒ यामं॑ शुभ्रा॒ अचि॑ध्वम् । नि पर्व॑ता अहासत ॥२॥
yada॒ṅga ta॑viṣīyavo॒ yāmaṃ॑ śubhrā॒ aci॑dhvam | ni parva॑tā ahāsata || २ ||
उदी॑रयन्त वा॒युभि॑र्वा॒श्रास॒: पृश्नि॑मातरः । धु॒क्षन्त॑ पि॒प्युषी॒मिष॑म् ॥३॥
udī॑rayanta vā॒yubhi॑rvā॒śrāsa॒: pṛśni॑mātaraḥ | dhu॒kṣanta॑ pi॒pyuṣī॒miṣa॑m || ३ ||
वप॑न्ति म॒रुतो॒ मिहं॒ प्र वे॑पयन्ति॒ पर्व॑तान् । यद्यामं॒ यान्ति॑ वा॒युभि॑: ॥४॥
vapa॑nti ma॒ruto॒ mihaṃ॒ pra ve॑payanti॒ parva॑tān | yadyāmaṃ॒ yānti॑ vā॒yubhi॑: || ४ ||
नि यद्यामा॑य वो गि॒रिर्नि सिन्ध॑वो॒ विध॑र्मणे । म॒हे शुष्मा॑य येमि॒रे ॥५॥
ni yadyāmā॑ya vo gi॒rirni sindha॑vo॒ vidha॑rmaṇe | ma॒he śuṣmā॑ya yemi॒re || ५ ||
यु॒ष्माँ उ॒ नक्त॑मू॒तये॑ यु॒ष्मान्दिवा॑ हवामहे । यु॒ष्मान्प्र॑य॒त्य॑ध्व॒रे ॥६॥
yu॒ṣmām̐ u॒ nakta॑mū॒taye॑ yu॒ṣmāndivā॑ havāmahe | yu॒ṣmānpra॑ya॒tya॑dhva॒re || ६ ||
उदु॒ त्ये अ॑रु॒णप्स॑वश्चि॒त्रा यामे॑भिरीरते । वा॒श्रा अधि॒ ष्णुना॑ दि॒वः ॥७॥
udu॒ tye a॑ru॒ṇapsa॑vaści॒trā yāme॑bhirīrate | vā॒śrā adhi॒ ṣṇunā॑ di॒vaḥ || ७ ||
सृ॒जन्ति॑ र॒श्मिमोज॑सा॒ पन्थां॒ सूर्या॑य॒ यात॑वे । ते भा॒नुभि॒र्वि त॑स्थिरे ॥८॥
sṛ॒janti॑ ra॒śmimoja॑sā॒ panthāṃ॒ sūryā॑ya॒ yāta॑ve | te bhā॒nubhi॒rvi ta॑sthire || ८ ||
इ॒मां मे॑ मरुतो॒ गिर॑मि॒मं स्तोम॑मृभुक्षणः । इ॒मं मे॑ वनता॒ हव॑म् ॥९॥
i॒māṃ me॑ maruto॒ gira॑mi॒maṃ stoma॑mṛbhukṣaṇaḥ | i॒maṃ me॑ vanatā॒ hava॑m || ९ ||
त्रीणि॒ सरां॑सि॒ पृश्न॑यो दुदु॒ह्रे व॒ज्रिणे॒ मधु॑ । उत्सं॒ कव॑न्धमु॒द्रिण॑म् ॥१०॥
trīṇi॒ sarāṃ॑si॒ pṛśna॑yo dudu॒hre va॒jriṇe॒ madhu॑ | utsaṃ॒ kava॑ndhamu॒driṇa॑m || १० ||
मरु॑तो॒ यद्ध॑ वो दि॒वः सु॑म्ना॒यन्तो॒ हवा॑महे । आ तू न॒ उप॑ गन्तन ॥११॥
maru॑to॒ yaddha॑ vo di॒vaḥ su॑mnā॒yanto॒ havā॑mahe | ā tū na॒ upa॑ gantana || ११ ||
यू॒यं हि ष्ठा सु॑दानवो॒ रुद्रा॑ ऋभुक्षणो॒ दमे॑ । उ॒त प्रचे॑तसो॒ मदे॑ ॥१२॥
yū॒yaṃ hi ṣṭhā su॑dānavo॒ rudrā॑ ṛbhukṣaṇo॒ dame॑ | u॒ta prace॑taso॒ made॑ || १२ ||
आ नो॑ र॒यिं म॑द॒च्युतं॑ पुरु॒क्षुं वि॒श्वधा॑यसम् । इय॑र्ता मरुतो दि॒वः ॥१३॥
ā no॑ ra॒yiṃ ma॑da॒cyutaṃ॑ puru॒kṣuṃ vi॒śvadhā॑yasam | iya॑rtā maruto di॒vaḥ || १३ ||
अधी॑व॒ यद्गि॑री॒णां यामं॑ शुभ्रा॒ अचि॑ध्वम् । सु॒वा॒नैर्म॑न्दध्व॒ इन्दु॑भिः ॥१४॥
adhī॑va॒ yadgi॑rī॒ṇāṃ yāmaṃ॑ śubhrā॒ aci॑dhvam | su॒vā॒nairma॑ndadhva॒ indu॑bhiḥ || १४ ||
ए॒ताव॑तश्चिदेषां सु॒म्नं भि॑क्षेत॒ मर्त्य॑: । अदा॑भ्यस्य॒ मन्म॑भिः ॥१५॥
e॒tāva॑taścideṣāṃ su॒mnaṃ bhi॑kṣeta॒ martya॑: | adā॑bhyasya॒ manma॑bhiḥ || १५ ||
ये द्र॒प्सा इ॑व॒ रोद॑सी॒ धम॒न्त्यनु॑ वृ॒ष्टिभि॑: । उत्सं॑ दु॒हन्तो॒ अक्षि॑तम् ॥१६॥
ye dra॒psā i॑va॒ roda॑sī॒ dhama॒ntyanu॑ vṛ॒ṣṭibhi॑: | utsaṃ॑ du॒hanto॒ akṣi॑tam || १६ ||
उदु॑ स्वा॒नेभि॑रीरत॒ उद्रथै॒रुदु॑ वा॒युभि॑: । उत्स्तोमै॒: पृश्नि॑मातरः ॥१७॥
udu॑ svā॒nebhi॑rīrata॒ udrathai॒rudu॑ vā॒yubhi॑: | utstomai॒: pṛśni॑mātaraḥ || १७ ||
येना॒व तु॒र्वशं॒ यदुं॒ येन॒ कण्वं॑ धन॒स्पृत॑म् । रा॒ये सु तस्य॑ धीमहि ॥१८॥
yenā॒va tu॒rvaśaṃ॒ yaduṃ॒ yena॒ kaṇvaṃ॑ dhana॒spṛta॑m | rā॒ye su tasya॑ dhīmahi || १८ ||
इ॒मा उ॑ वः सुदानवो घृ॒तं न पि॒प्युषी॒रिष॑: । वर्धा॑न्का॒ण्वस्य॒ मन्म॑भिः ॥१९॥
i॒mā u॑ vaḥ sudānavo ghṛ॒taṃ na pi॒pyuṣī॒riṣa॑: | vardhā॑nkā॒ṇvasya॒ manma॑bhiḥ || १९ ||
क्व॑ नू॒नं सु॑दानवो॒ मद॑था वृक्तबर्हिषः । ब्र॒ह्मा को व॑: सपर्यति ॥२०॥
kva॑ nū॒naṃ su॑dānavo॒ mada॑thā vṛktabarhiṣaḥ | bra॒hmā ko va॑: saparyati || २० ||
न॒हि ष्म॒ यद्ध॑ वः पु॒रा स्तोमे॑भिर्वृक्तबर्हिषः । शर्धाँ॑ ऋ॒तस्य॒ जिन्व॑थ ॥२१॥
na॒hi ṣma॒ yaddha॑ vaḥ pu॒rā stome॑bhirvṛktabarhiṣaḥ | śardhām̐॑ ṛ॒tasya॒ jinva॑tha || २१ ||
समु॒ त्ये म॑ह॒तीर॒पः सं क्षो॒णी समु॒ सूर्य॑म् । सं वज्रं॑ पर्व॒शो द॑धुः ॥२२॥
samu॒ tye ma॑ha॒tīra॒paḥ saṃ kṣo॒ṇī samu॒ sūrya॑m | saṃ vajraṃ॑ parva॒śo da॑dhuḥ || २२ ||
वि वृ॒त्रं प॑र्व॒शो य॑यु॒र्वि पर्व॑ताँ अरा॒जिन॑: । च॒क्रा॒णा वृष्णि॒ पौंस्य॑म् ॥२३॥
vi vṛ॒traṃ pa॑rva॒śo ya॑yu॒rvi parva॑tām̐ arā॒jina॑: | ca॒krā॒ṇā vṛṣṇi॒ pauṃsya॑m || २३ ||
अनु॑ त्रि॒तस्य॒ युध्य॑त॒: शुष्म॑मावन्नु॒त क्रतु॑म् । अन्विन्द्रं॑ वृत्र॒तूर्ये॑ ॥२४॥
anu॑ tri॒tasya॒ yudhya॑ta॒: śuṣma॑māvannu॒ta kratu॑m | anvindraṃ॑ vṛtra॒tūrye॑ || २४ ||
वि॒द्युद्ध॑स्ता अ॒भिद्य॑व॒: शिप्रा॑: शी॒र्षन्हि॑र॒ण्ययी॑: । शु॒भ्रा व्य॑ञ्जत श्रि॒ये ॥२५॥
vi॒dyuddha॑stā a॒bhidya॑va॒: śiprā॑: śī॒rṣanhi॑ra॒ṇyayī॑: | śu॒bhrā vya॑ñjata śri॒ye || २५ ||
उ॒शना॒ यत्प॑रा॒वत॑ उ॒क्ष्णो रन्ध्र॒मया॑तन । द्यौर्न च॑क्रदद्भि॒या ॥२६॥
u॒śanā॒ yatpa॑rā॒vata॑ u॒kṣṇo randhra॒mayā॑tana | dyaurna ca॑kradadbhi॒yā || २६ ||
आ नो॑ म॒खस्य॑ दा॒वनेऽश्वै॒र्हिर॑ण्यपाणिभिः । देवा॑स॒ उप॑ गन्तन ॥२७॥
ā no॑ ma॒khasya॑ dā॒vane’śvai॒rhira॑ṇyapāṇibhiḥ | devā॑sa॒ upa॑ gantana || २७ ||
यदे॑षां॒ पृष॑ती॒ रथे॒ प्रष्टि॒र्वह॑ति॒ रोहि॑तः । यान्ति॑ शु॒भ्रा रि॒णन्न॒पः ॥२८॥
yade॑ṣāṃ॒ pṛṣa॑tī॒ rathe॒ praṣṭi॒rvaha॑ti॒ rohi॑taḥ | yānti॑ śu॒bhrā ri॒ṇanna॒paḥ || २८ ||
सु॒षोमे॑ शर्य॒णाव॑त्यार्जी॒के प॒स्त्या॑वति । य॒युर्निच॑क्रया॒ नर॑: ॥२९॥
su॒ṣome॑ śarya॒ṇāva॑tyārjī॒ke pa॒styā॑vati | ya॒yurnica॑krayā॒ nara॑: || २९ ||
क॒दा ग॑च्छाथ मरुत इ॒त्था विप्रं॒ हव॑मानम् । मा॒र्डी॒केभि॒र्नाध॑मानम् ॥३०॥
ka॒dā ga॑cchātha maruta i॒tthā vipraṃ॒ hava॑mānam | mā॒rḍī॒kebhi॒rnādha॑mānam || ३० ||
कद्ध॑ नू॒नं क॑धप्रियो॒ यदिन्द्र॒मज॑हातन । को व॑: सखि॒त्व ओ॑हते ॥३१॥
kaddha॑ nū॒naṃ ka॑dhapriyo॒ yadindra॒maja॑hātana | ko va॑: sakhi॒tva o॑hate || ३१ ||
स॒हो षु णो॒ वज्र॑हस्तै॒: कण्वा॑सो अ॒ग्निं म॒रुद्भि॑: । स्तु॒षे हिर॑ण्यवाशीभिः ॥३२॥
sa॒ho ṣu ṇo॒ vajra॑hastai॒: kaṇvā॑so a॒gniṃ ma॒rudbhi॑: | stu॒ṣe hira॑ṇyavāśībhiḥ || ३२ ||
ओ षु वृष्ण॒: प्रय॑ज्यू॒ना नव्य॑से सुवि॒ताय॑ । व॒वृ॒त्यां चि॒त्रवा॑जान् ॥३३॥
o ṣu vṛṣṇa॒: praya॑jyū॒nā navya॑se suvi॒tāya॑ | va॒vṛ॒tyāṃ ci॒travā॑jān || ३३ ||
गि॒रय॑श्चि॒न्नि जि॑हते॒ पर्शा॑नासो॒ मन्य॑मानाः । पर्व॑ताश्चि॒न्नि ये॑मिरे ॥३४॥
gi॒raya॑ści॒nni ji॑hate॒ parśā॑nāso॒ manya॑mānāḥ | parva॑tāści॒nni ye॑mire || ३४ ||
आक्ष्ण॒यावा॑नो वहन्त्य॒न्तरि॑क्षेण॒ पत॑तः । धाता॑रः स्तुव॒ते वय॑: ॥३५॥
ākṣṇa॒yāvā॑no vahantya॒ntari॑kṣeṇa॒ pata॑taḥ | dhātā॑raḥ stuva॒te vaya॑: || ३५ ||
अ॒ग्निर्हि जानि॑ पू॒र्व्यश्छन्दो॒ न सूरो॑ अ॒र्चिषा॑ । ते भा॒नुभि॒र्वि त॑स्थिरे ॥३६॥
a॒gnirhi jāni॑ pū॒rvyaśchando॒ na sūro॑ a॒rciṣā॑ | te bhā॒nubhi॒rvi ta॑sthire || ३६ ||