EeseDharmaSanātana Library
688मण्डल 8 · सूक्त 68
19 shlokआ त्वा॒ रथं॒ यथो॒तये॑ सु॒म्नाय॑ वर्तयामसि । तु॒वि॒कू॒र्मिमृ॑ती॒षह॒मिन्द्र॒ शवि॑ष्ठ॒ सत्प॑ते ॥१॥
ā tvā॒ rathaṃ॒ yatho॒taye॑ su॒mnāya॑ vartayāmasi | tu॒vi॒kū॒rmimṛ॑tī॒ṣaha॒mindra॒ śavi॑ṣṭha॒ satpa॑te || १ ||
तुवि॑शुष्म॒ तुवि॑क्रतो॒ शची॑वो॒ विश्व॑या मते । आ प॑प्राथ महित्व॒ना ॥२॥
tuvi॑śuṣma॒ tuvi॑krato॒ śacī॑vo॒ viśva॑yā mate | ā pa॑prātha mahitva॒nā || २ ||
यस्य॑ ते महि॒ना म॒हः परि॑ ज्मा॒यन्त॑मी॒यतु॑: । हस्ता॒ वज्रं॑ हिर॒ण्यय॑म् ॥३॥
yasya॑ te mahi॒nā ma॒haḥ pari॑ jmā॒yanta॑mī॒yatu॑: | hastā॒ vajraṃ॑ hira॒ṇyaya॑m || ३ ||
वि॒श्वान॑रस्य व॒स्पति॒मना॑नतस्य॒ शव॑सः । एवै॑श्च चर्षणी॒नामू॒ती हु॑वे॒ रथा॑नाम् ॥४॥
vi॒śvāna॑rasya va॒spati॒manā॑natasya॒ śava॑saḥ | evai॑śca carṣaṇī॒nāmū॒tī hu॑ve॒ rathā॑nām || ४ ||
अ॒भिष्ट॑ये स॒दावृ॑धं॒ स्व॑र्मीळ्हेषु॒ यं नर॑: । नाना॒ हव॑न्त ऊ॒तये॑ ॥५॥
a॒bhiṣṭa॑ye sa॒dāvṛ॑dhaṃ॒ sva॑rmīḷheṣu॒ yaṃ nara॑: | nānā॒ hava॑nta ū॒taye॑ || ५ ||
प॒रोमा॑त्र॒मृची॑षम॒मिन्द्र॑मु॒ग्रं सु॒राध॑सम् । ईशा॑नं चि॒द्वसू॑नाम् ॥६॥
pa॒romā॑tra॒mṛcī॑ṣama॒mindra॑mu॒graṃ su॒rādha॑sam | īśā॑naṃ ci॒dvasū॑nām || ६ ||
तंत॒मिद्राध॑से म॒ह इन्द्रं॑ चोदामि पी॒तये॑ । यः पू॒र्व्यामनु॑ष्टुति॒मीशे॑ कृष्टी॒नां नृ॒तुः ॥७॥
taṃta॒midrādha॑se ma॒ha indraṃ॑ codāmi pī॒taye॑ | yaḥ pū॒rvyāmanu॑ṣṭuti॒mīśe॑ kṛṣṭī॒nāṃ nṛ॒tuḥ || ७ ||
न यस्य॑ ते शवसान स॒ख्यमा॒नंश॒ मर्त्य॑: । नकि॒: शवां॑सि ते नशत् ॥८॥
na yasya॑ te śavasāna sa॒khyamā॒naṃśa॒ martya॑: | naki॒: śavāṃ॑si te naśat || ८ ||
त्वोता॑स॒स्त्वा यु॒जाऽप्सु सूर्ये॑ म॒हद्धन॑म् । जये॑म पृ॒त्सु व॑ज्रिवः ॥९॥
tvotā॑sa॒stvā yu॒jā’psu sūrye॑ ma॒haddhana॑m | jaye॑ma pṛ॒tsu va॑jrivaḥ || ९ ||
तं त्वा॑ य॒ज्ञेभि॑रीमहे॒ तं गी॒र्भिर्गि॑र्वणस्तम । इन्द्र॒ यथा॑ चि॒दावि॑थ॒ वाजे॑षु पुरु॒माय्य॑म् ॥१०॥
taṃ tvā॑ ya॒jñebhi॑rīmahe॒ taṃ gī॒rbhirgi॑rvaṇastama | indra॒ yathā॑ ci॒dāvi॑tha॒ vāje॑ṣu puru॒māyya॑m || १० ||
यस्य॑ ते स्वा॒दु स॒ख्यं स्वा॒द्वी प्रणी॑तिरद्रिवः । य॒ज्ञो वि॑तन्त॒साय्य॑: ॥११॥
yasya॑ te svā॒du sa॒khyaṃ svā॒dvī praṇī॑tiradrivaḥ | ya॒jño vi॑tanta॒sāyya॑: || ११ ||
उ॒रु ण॑स्त॒न्वे॒३ तन॑ उ॒रु क्षया॑य नस्कृधि । उ॒रु णो॑ यन्धि जी॒वसे॑ ॥१२॥
u॒ru ṇa॑sta॒nve॒३ tana॑ u॒ru kṣayā॑ya naskṛdhi | u॒ru ṇo॑ yandhi jī॒vase॑ || १२ ||
उ॒रुं नृभ्य॑ उ॒रुं गव॑ उ॒रुं रथा॑य॒ पन्था॑म् । दे॒ववी॑तिं मनामहे ॥१३॥
u॒ruṃ nṛbhya॑ u॒ruṃ gava॑ u॒ruṃ rathā॑ya॒ panthā॑m | de॒vavī॑tiṃ manāmahe || १३ ||
उप॑ मा॒ षड्द्वाद्वा॒ नर॒: सोम॑स्य॒ हर्ष्या॑ । तिष्ठ॑न्ति स्वादुरा॒तय॑: ॥१४॥
upa॑ mā॒ ṣaḍdvādvā॒ nara॒: soma॑sya॒ harṣyā॑ | tiṣṭha॑nti svādurā॒taya॑: || १४ ||
ऋ॒ज्रावि॑न्द्रो॒त आ द॑दे॒ हरी॒ ऋक्ष॑स्य सू॒नवि॑ । आ॒श्व॒मे॒धस्य॒ रोहि॑ता ॥१५॥
ṛ॒jrāvi॑ndro॒ta ā da॑de॒ harī॒ ṛkṣa॑sya sū॒navi॑ | ā॒śva॒me॒dhasya॒ rohi॑tā || १५ ||
सु॒रथाँ॑ आतिथि॒ग्वे स्व॑भी॒शूँरा॒र्क्षे । आ॒श्व॒मे॒धे सु॒पेश॑सः ॥१६॥
su॒rathām̐॑ ātithi॒gve sva॑bhī॒śūm̐rā॒rkṣe | ā॒śva॒me॒dhe su॒peśa॑saḥ || १६ ||
षळश्वाँ॑ आतिथि॒ग्व इ॑न्द्रो॒ते व॒धूम॑तः । सचा॑ पू॒तक्र॑तौ सनम् ॥१७॥
ṣaḷaśvām̐॑ ātithi॒gva i॑ndro॒te va॒dhūma॑taḥ | sacā॑ pū॒takra॑tau sanam || १७ ||
ऐषु॑ चेत॒द्वृष॑ण्वत्य॒न्तॠ॒ज्रेष्वरु॑षी । स्व॒भी॒शुः कशा॑वती ॥१८॥
aiṣu॑ ceta॒dvṛṣa॑ṇvatya॒ntaṝ॒jreṣvaru॑ṣī | sva॒bhī॒śuḥ kaśā॑vatī || १८ ||
न यु॒ष्मे वा॑जबन्धवो निनि॒त्सुश्च॒न मर्त्य॑: । अ॒व॒द्यमधि॑ दीधरत् ॥१९॥
na yu॒ṣme vā॑jabandhavo nini॒tsuśca॒na martya॑: | a॒va॒dyamadhi॑ dīdharat || १९ ||