EeseDharmaSanātana Library
685मण्डल 8 · सूक्त 65
12 shlok१२ प्रगाथ: काण्व:। इन्द्र: । गायत्री ।
यदि॑न्द्र॒ प्रागपा॒गुद॒ङ्न्य॑ग्वा हू॒यसे॒ नृभि॑: । आ या॑हि॒ तूय॑मा॒शुभि॑: ॥१॥
१२ pragātha: kāṇva: | indra: | gāyatrī | yadi॑ndra॒ prāgapā॒guda॒ṅnya॑gvā hū॒yase॒ nṛbhi॑: | ā yā॑hi॒ tūya॑mā॒śubhi॑: || १ ||
यद्वा॑ प्र॒स्रव॑णे दि॒वो मा॒दया॑से॒ स्व॑र्णरे । यद्वा॑ समु॒द्रे अन्ध॑सः ॥२॥
yadvā॑ pra॒srava॑ṇe di॒vo mā॒dayā॑se॒ sva॑rṇare | yadvā॑ samu॒dre andha॑saḥ || २ ||
आ त्वा॑ गी॒र्भिर्म॒हामु॒रुं हु॒वे गामि॑व॒ भोज॑से । इन्द्र॒ सोम॑स्य पी॒तये॑ ॥३॥
ā tvā॑ gī॒rbhirma॒hāmu॒ruṃ hu॒ve gāmi॑va॒ bhoja॑se | indra॒ soma॑sya pī॒taye॑ || ३ ||
आ त॑ इन्द्र महि॒मानं॒ हर॑यो देव ते॒ मह॑: । रथे॑ वहन्तु॒ बिभ्र॑तः ॥४॥
ā ta॑ indra mahi॒mānaṃ॒ hara॑yo deva te॒ maha॑: | rathe॑ vahantu॒ bibhra॑taḥ || ४ ||
इन्द्र॑ गृणी॒ष उ॑ स्तु॒षे म॒हाँ उ॒ग्र ई॑शान॒कृत् । एहि॑ नः सु॒तं पिब॑ ॥५॥
indra॑ gṛṇī॒ṣa u॑ stu॒ṣe ma॒hām̐ u॒gra ī॑śāna॒kṛt | ehi॑ naḥ su॒taṃ piba॑ || ५ ||
सु॒ताव॑न्तस्त्वा व॒यं प्रय॑स्वन्तो हवामहे । इ॒दं नो॑ ब॒र्हिरा॒सदे॑ ॥६॥
su॒tāva॑ntastvā va॒yaṃ praya॑svanto havāmahe | i॒daṃ no॑ ba॒rhirā॒sade॑ || ६ ||
यच्चि॒द्धि शश्व॑ता॒मसीन्द्र॒ साधा॑रण॒स्त्वम् । तं त्वा॑ व॒यं ह॑वामहे ॥७॥
yacci॒ddhi śaśva॑tā॒masīndra॒ sādhā॑raṇa॒stvam | taṃ tvā॑ va॒yaṃ ha॑vāmahe || ७ ||
इ॒दं ते॑ सो॒म्यं मध्वधु॑क्ष॒न्नद्रि॑भि॒र्नर॑: । जु॒षा॒ण इ॑न्द्र॒ तत्पि॑ब ॥८॥
i॒daṃ te॑ so॒myaṃ madhvadhu॑kṣa॒nnadri॑bhi॒rnara॑: | ju॒ṣā॒ṇa i॑ndra॒ tatpi॑ba || ८ ||
विश्वाँ॑ अ॒र्यो वि॑प॒श्चितोऽति॑ ख्य॒स्तूय॒मा ग॑हि । अ॒स्मे धे॑हि॒ श्रवो॑ बृ॒हत् ॥९॥
viśvām̐॑ a॒ryo vi॑pa॒ścito’ti॑ khya॒stūya॒mā ga॑hi | a॒sme dhe॑hi॒ śravo॑ bṛ॒hat || ९ ||
दा॒ता मे॒ पृष॑तीनां॒ राजा॑ हिरण्य॒वीना॑म् । मा दे॑वा म॒घवा॑ रिषत् ॥१०॥
dā॒tā me॒ pṛṣa॑tīnāṃ॒ rājā॑ hiraṇya॒vīnā॑m | mā de॑vā ma॒ghavā॑ riṣat || १० ||
स॒हस्रे॒ पृष॑तीना॒मधि॑ श्च॒न्द्रं बृ॒हत्पृ॒थु । शु॒क्रं हिर॑ण्य॒मा द॑दे ॥११॥
sa॒hasre॒ pṛṣa॑tīnā॒madhi॑ śca॒ndraṃ bṛ॒hatpṛ॒thu | śu॒kraṃ hira॑ṇya॒mā da॑de || ११ ||
नपा॑तो दु॒र्गह॑स्य मे स॒हस्रे॑ण सु॒राध॑सः । श्रवो॑ दे॒वेष्व॑क्रत ॥१२॥
napā॑to du॒rgaha॑sya me sa॒hasre॑ṇa su॒rādha॑saḥ | śravo॑ de॒veṣva॑krata || १२ ||