EeseDharmaSanātana Library
684मण्डल 8 · सूक्त 64
12 shlokउत्त्वा॑ मन्दन्तु॒ स्तोमा॑: कृणु॒ष्व राधो॑ अद्रिवः । अव॑ ब्रह्म॒द्विषो॑ जहि ॥१॥
uttvā॑ mandantu॒ stomā॑: kṛṇu॒ṣva rādho॑ adrivaḥ | ava॑ brahma॒dviṣo॑ jahi || १ ||
प॒दा प॒णीँर॑रा॒धसो॒ नि बा॑धस्व म॒हाँ अ॑सि । न॒हि त्वा॒ कश्च॒न प्रति॑ ॥२॥
pa॒dā pa॒ṇīm̐ra॑rā॒dhaso॒ ni bā॑dhasva ma॒hām̐ a॑si | na॒hi tvā॒ kaśca॒na prati॑ || २ ||
त्वमी॑शिषे सु॒ताना॒मिन्द्र॒ त्वमसु॑तानाम् । त्वं राजा॒ जना॑नाम् ॥३॥
tvamī॑śiṣe su॒tānā॒mindra॒ tvamasu॑tānām | tvaṃ rājā॒ janā॑nām || ३ ||
एहि॒ प्रेहि॒ क्षयो॑ दि॒व्या॒३घोष॑ञ्चर्षणी॒नाम् । ओभे पृ॑णासि॒ रोद॑सी ॥४॥
ehi॒ prehi॒ kṣayo॑ di॒vyā॒३ghoṣa॑ñcarṣaṇī॒nām | obhe pṛ॑ṇāsi॒ roda॑sī || ४ ||
त्यं चि॒त्पर्व॑तं गि॒रिं श॒तव॑न्तं सह॒स्रिण॑म् । वि स्तो॒तृभ्यो॑ रुरोजिथ ॥५॥
tyaṃ ci॒tparva॑taṃ gi॒riṃ śa॒tava॑ntaṃ saha॒sriṇa॑m | vi sto॒tṛbhyo॑ rurojitha || ५ ||
व॒यमु॑ त्वा॒ दिवा॑ सु॒ते व॒यं नक्तं॑ हवामहे । अ॒स्माकं॒ काम॒मा पृ॑ण ॥६॥
va॒yamu॑ tvā॒ divā॑ su॒te va॒yaṃ naktaṃ॑ havāmahe | a॒smākaṃ॒ kāma॒mā pṛ॑ṇa || ६ ||
क्व१ स्य वृ॑ष॒भो युवा॑ तुवि॒ग्रीवो॒ अना॑नतः । ब्र॒ह्मा कस्तं स॑पर्यति ॥७॥
kva१ sya vṛ॑ṣa॒bho yuvā॑ tuvi॒grīvo॒ anā॑nataḥ | bra॒hmā kastaṃ sa॑paryati || ७ ||
कस्य॑ स्वि॒त्सव॑नं॒ वृषा॑ जुजु॒ष्वाँ अव॑ गच्छति । इन्द्रं॒ क उ॑ स्वि॒दा च॑के ॥८॥
kasya॑ svi॒tsava॑naṃ॒ vṛṣā॑ juju॒ṣvām̐ ava॑ gacchati | indraṃ॒ ka u॑ svi॒dā ca॑ke || ८ ||
कं ते॑ दा॒ना अ॑सक्षत॒ वृत्र॑ह॒न्कं सु॒वीर्या॑ । उ॒क्थे क उ॑ स्वि॒दन्त॑मः ॥९॥
kaṃ te॑ dā॒nā a॑sakṣata॒ vṛtra॑ha॒nkaṃ su॒vīryā॑ | u॒kthe ka u॑ svi॒danta॑maḥ || ९ ||
अ॒यं ते॒ मानु॑षे॒ जने॒ सोम॑: पू॒रुषु॑ सूयते । तस्येहि॒ प्र द्र॑वा॒ पिब॑ ॥१०॥
a॒yaṃ te॒ mānu॑ṣe॒ jane॒ soma॑: pū॒ruṣu॑ sūyate | tasyehi॒ pra dra॑vā॒ piba॑ || १० ||
अ॒यं ते॑ शर्य॒णाव॑ति सु॒षोमा॑या॒मधि॑ प्रि॒यः । आ॒र्जी॒कीये॑ म॒दिन्त॑मः ॥११॥
a॒yaṃ te॑ śarya॒ṇāva॑ti su॒ṣomā॑yā॒madhi॑ pri॒yaḥ | ā॒rjī॒kīye॑ ma॒dinta॑maḥ || ११ ||
तम॒द्य राध॑से म॒हे चारुं॒ मदा॑य॒ घृष्व॑ये । एही॑मिन्द्र॒ द्रवा॒ पिब॑ ॥१२॥
tama॒dya rādha॑se ma॒he cāruṃ॒ madā॑ya॒ ghṛṣva॑ye | ehī॑mindra॒ dravā॒ piba॑ || १२ ||