EeseDharmaSanātana Library
683मण्डल 8 · सूक्त 63
12 shlokस पू॒र्व्यो म॒हानां॑ वे॒नः क्रतु॑भिरानजे । यस्य॒ द्वारा॒ मनु॑ष्पि॒ता दे॒वेषु॒ धिय॑ आन॒जे ॥१॥
sa pū॒rvyo ma॒hānāṃ॑ ve॒naḥ kratu॑bhirānaje | yasya॒ dvārā॒ manu॑ṣpi॒tā de॒veṣu॒ dhiya॑ āna॒je || १ ||
दि॒वो मानं॒ नोत्स॑द॒न्त्सोम॑पृष्ठासो॒ अद्र॑यः । उ॒क्था ब्रह्म॑ च॒ शंस्या॑ ॥२॥
di॒vo mānaṃ॒ notsa॑da॒ntsoma॑pṛṣṭhāso॒ adra॑yaḥ | u॒kthā brahma॑ ca॒ śaṃsyā॑ || २ ||
स वि॒द्वाँ अङ्गि॑रोभ्य॒ इन्द्रो॒ गा अ॑वृणो॒दप॑ । स्तु॒षे तद॑स्य॒ पौंस्य॑म् ॥३॥
sa vi॒dvām̐ aṅgi॑robhya॒ indro॒ gā a॑vṛṇo॒dapa॑ | stu॒ṣe tada॑sya॒ pauṃsya॑m || ३ ||
स प्र॒त्नथा॑ कविवृ॒ध इन्द्रो॑ वा॒कस्य॑ व॒क्षणि॑: । शि॒वो अ॒र्कस्य॒ होम॑न्यस्म॒त्रा ग॒न्त्वव॑से ॥४॥
sa pra॒tnathā॑ kavivṛ॒dha indro॑ vā॒kasya॑ va॒kṣaṇi॑: | śi॒vo a॒rkasya॒ homa॑nyasma॒trā ga॒ntvava॑se || ४ ||
आदू॒ नु ते॒ अनु॒ क्रतुं॒ स्वाहा॒ वर॑स्य॒ यज्य॑वः । श्वा॒त्रम॒र्का अ॑नूष॒तेन्द्र॑ गो॒त्रस्य॑ दा॒वने॑ ॥५॥
ādū॒ nu te॒ anu॒ kratuṃ॒ svāhā॒ vara॑sya॒ yajya॑vaḥ | śvā॒trama॒rkā a॑nūṣa॒tendra॑ go॒trasya॑ dā॒vane॑ || ५ ||
इन्द्रे॒ विश्वा॑नि वी॒र्या॑ कृ॒तानि॒ कर्त्वा॑नि च । यम॒र्का अ॑ध्व॒रं वि॒दुः ॥६॥
indre॒ viśvā॑ni vī॒ryā॑ kṛ॒tāni॒ kartvā॑ni ca | yama॒rkā a॑dhva॒raṃ vi॒duḥ || ६ ||
यत्पाञ्च॑जन्यया वि॒शेन्द्रे॒ घोषा॒ असृ॑क्षत । अस्तृ॑णाद्ब॒र्हणा॑ वि॒पो॒३ऽर्यो मान॑स्य॒ स क्षय॑: ॥७॥
yatpāñca॑janyayā vi॒śendre॒ ghoṣā॒ asṛ॑kṣata | astṛ॑ṇādba॒rhaṇā॑ vi॒po॒३’ryo māna॑sya॒ sa kṣaya॑: || ७ ||
इ॒यमु॑ ते॒ अनु॑ष्टुतिश्चकृ॒षे तानि॒ पौंस्या॑ । प्राव॑श्च॒क्रस्य॑ वर्त॒निम् ॥८॥
i॒yamu॑ te॒ anu॑ṣṭutiścakṛ॒ṣe tāni॒ pauṃsyā॑ | prāva॑śca॒krasya॑ varta॒nim || ८ ||
अ॒स्य वृष्णो॒ व्योद॑न उ॒रु क्र॑मिष्ट जी॒वसे॑ । यवं॒ न प॒श्व आ द॑दे ॥९॥
a॒sya vṛṣṇo॒ vyoda॑na u॒ru kra॑miṣṭa jī॒vase॑ | yavaṃ॒ na pa॒śva ā da॑de || ९ ||
तद्दधा॑ना अव॒स्यवो॑ यु॒ष्माभि॒र्दक्ष॑पितरः । स्याम॑ म॒रुत्व॑तो वृ॒धे ॥१०॥
taddadhā॑nā ava॒syavo॑ yu॒ṣmābhi॒rdakṣa॑pitaraḥ | syāma॑ ma॒rutva॑to vṛ॒dhe || १० ||
बळृ॒त्विया॑य॒ धाम्न॒ ऋक्व॑भिः शूर नोनुमः । जेषा॑मेन्द्र॒ त्वया॑ यु॒जा ॥११॥
baḷṛ॒tviyā॑ya॒ dhāmna॒ ṛkva॑bhiḥ śūra nonumaḥ | jeṣā॑mendra॒ tvayā॑ yu॒jā || ११ ||
अ॒स्मे रु॒द्रा मे॒हना॒ पर्व॑तासो वृत्र॒हत्ये॒ भर॑हूतौ स॒जोषा॑: ।
यः शंस॑ते स्तुव॒ते धायि॑ प॒ज्र इन्द्र॑ज्येष्ठा अ॒स्माँ अ॑वन्तु दे॒वाः ॥१२॥
a॒sme ru॒drā me॒hanā॒ parva॑tāso vṛtra॒hatye॒ bhara॑hūtau sa॒joṣā॑: | yaḥ śaṃsa॑te stuva॒te dhāyi॑ pa॒jra indra॑jyeṣṭhā a॒smām̐ a॑vantu de॒vāḥ || १२ ||