EeseDharmaSanātana Library
682मण्डल 8 · सूक्त 62
10 shlokप्रो अ॑स्मा॒ उप॑स्तुतिं॒ भर॑ता॒ यज्जुजो॑षति ।
उ॒क्थैरिन्द्र॑स्य॒ माहि॑नं॒ वयो॑ वर्धन्ति सो॒मिनो॑ भ॒द्रा इन्द्र॑स्य रा॒तय॑: ॥१॥
pro a॑smā॒ upa॑stutiṃ॒ bhara॑tā॒ yajjujo॑ṣati | u॒kthairindra॑sya॒ māhi॑naṃ॒ vayo॑ vardhanti so॒mino॑ bha॒drā indra॑sya rā॒taya॑: || १ ||
अ॒यु॒जो अस॑मो॒ नृभि॒रेक॑: कृ॒ष्टीर॒यास्य॑: । पू॒र्वीरति॒ प्र वा॑वृधे॒ विश्वा॑ जा॒तान्योज॑सा भ॒द्रा इन्द्र॑स्य रा॒तय॑: ॥२॥
a॒yu॒jo asa॑mo॒ nṛbhi॒reka॑: kṛ॒ṣṭīra॒yāsya॑: | pū॒rvīrati॒ pra vā॑vṛdhe॒ viśvā॑ jā॒tānyoja॑sā bha॒drā indra॑sya rā॒taya॑: || २ ||
अहि॑तेन चि॒दर्व॑ता जी॒रदा॑नुः सिषासति । प्र॒वाच्य॑मिन्द्र॒ तत्तव॑ वी॒र्या॑णि करिष्य॒तो भ॒द्रा इन्द्र॑स्य रा॒तय॑: ॥३॥
ahi॑tena ci॒darva॑tā jī॒radā॑nuḥ siṣāsati | pra॒vācya॑mindra॒ tattava॑ vī॒ryā॑ṇi kariṣya॒to bha॒drā indra॑sya rā॒taya॑: || ३ ||
आ या॑हि कृ॒णवा॑म त॒ इन्द्र॒ ब्रह्मा॑णि॒ वर्ध॑ना ।
येभि॑: शविष्ठ चा॒कनो॑ भ॒द्रमि॒ह श्र॑वस्य॒ते भ॒द्रा इन्द्र॑स्य रा॒तय॑: ॥४॥
ā yā॑hi kṛ॒ṇavā॑ma ta॒ indra॒ brahmā॑ṇi॒ vardha॑nā | yebhi॑: śaviṣṭha cā॒kano॑ bha॒drami॒ha śra॑vasya॒te bha॒drā indra॑sya rā॒taya॑: || ४ ||
धृ॒ष॒तश्चि॑द्धृ॒षन्मन॑: कृ॒णोषी॑न्द्र॒ यत्त्वम् । ती॒व्रैः सोमै॑: सपर्य॒तो नमो॑भिः प्रति॒भूष॑तो भ॒द्रा इन्द्र॑स्य रा॒तय॑: ॥५॥
dhṛ॒ṣa॒taści॑ddhṛ॒ṣanmana॑: kṛ॒ṇoṣī॑ndra॒ yattvam | tī॒vraiḥ somai॑: saparya॒to namo॑bhiḥ prati॒bhūṣa॑to bha॒drā indra॑sya rā॒taya॑: || ५ ||
अव॑ चष्ट॒ ऋची॑षमोऽव॒ताँ इ॑व॒ मानु॑षः । जु॒ष्ट्वी दक्ष॑स्य सो॒मिन॒: सखा॑यं कृणुते॒ युजं॑ भ॒द्रा इन्द्र॑स्य रा॒तय॑: ॥६॥
ava॑ caṣṭa॒ ṛcī॑ṣamo’va॒tām̐ i॑va॒ mānu॑ṣaḥ | ju॒ṣṭvī dakṣa॑sya so॒mina॒: sakhā॑yaṃ kṛṇute॒ yujaṃ॑ bha॒drā indra॑sya rā॒taya॑: || ६ ||
विश्वे॑ त इन्द्र वी॒र्यं॑ दे॒वा अनु॒ क्रतुं॑ ददुः । भुवो॒ विश्व॑स्य॒ गोप॑तिः पुरुष्टुत भ॒द्रा इन्द्र॑स्य रा॒तय॑: ॥७॥
viśve॑ ta indra vī॒ryaṃ॑ de॒vā anu॒ kratuṃ॑ daduḥ | bhuvo॒ viśva॑sya॒ gopa॑tiḥ puruṣṭuta bha॒drā indra॑sya rā॒taya॑: || ७ ||
गृ॒णे तदि॑न्द्र ते॒ शव॑ उप॒मं दे॒वता॑तये । यद्धंसि॑ वृ॒त्रमोज॑सा शचीपते भ॒द्रा इन्द्र॑स्य रा॒तय॑: ॥८॥
gṛ॒ṇe tadi॑ndra te॒ śava॑ upa॒maṃ de॒vatā॑taye | yaddhaṃsi॑ vṛ॒tramoja॑sā śacīpate bha॒drā indra॑sya rā॒taya॑: || ८ ||
सम॑नेव वपुष्य॒तः कृ॒णव॒न्मानु॑षा यु॒गा । वि॒दे तदिन्द्र॒श्चेत॑न॒मध॑ श्रु॒तो भ॒द्रा इन्द्र॑स्य रा॒तय॑: ॥९॥
sama॑neva vapuṣya॒taḥ kṛ॒ṇava॒nmānu॑ṣā yu॒gā | vi॒de tadindra॒śceta॑na॒madha॑ śru॒to bha॒drā indra॑sya rā॒taya॑: || ९ ||
उज्जा॒तमि॑न्द्र ते॒ शव॒ उत्त्वामुत्तव॒ क्रतु॑म् । भूरि॑गो॒ भूरि॑ वावृधु॒र्मघ॑व॒न्तव॒ शर्म॑णि भ॒द्रा इन्द्र॑स्य रा॒तय॑: ॥१०॥
ujjā॒tami॑ndra te॒ śava॒ uttvāmuttava॒ kratu॑m | bhūri॑go॒ bhūri॑ vāvṛdhu॒rmagha॑va॒ntava॒ śarma॑ṇi bha॒drā indra॑sya rā॒taya॑: || १० ||