EeseDharmaSanātana Library
669मण्डल 8 · सूक्त 49
10 shlokअ॒भि प्र व॑: सु॒राध॑स॒मिन्द्र॑मर्च॒ यथा॑ वि॒दे । यो ज॑रि॒तृभ्यो॑ म॒घवा॑ पुरू॒वसु॑: स॒हस्रे॑णेव॒ शिक्ष॑ति ॥१॥
a॒bhi pra va॑: su॒rādha॑sa॒mindra॑marca॒ yathā॑ vi॒de | yo ja॑ri॒tṛbhyo॑ ma॒ghavā॑ purū॒vasu॑: sa॒hasre॑ṇeva॒ śikṣa॑ti || १ ||
श॒तानी॑केव॒ प्र जि॑गाति धृष्णु॒या हन्ति॑ वृ॒त्राणि॑ दा॒शुषे॑ ।
गि॒रेरि॑व॒ प्र रसा॑ अस्य पिन्विरे॒ दत्रा॑णि पुरु॒भोज॑सः ॥२॥
śa॒tānī॑keva॒ pra ji॑gāti dhṛṣṇu॒yā hanti॑ vṛ॒trāṇi॑ dā॒śuṣe॑ | gi॒reri॑va॒ pra rasā॑ asya pinvire॒ datrā॑ṇi puru॒bhoja॑saḥ || २ ||
आ त्वा॑ सु॒तास॒ इन्द॑वो॒ मदा॒ य इ॑न्द्र गिर्वणः । आपो॒ न व॑ज्रि॒न्नन्वो॒क्यं१ सर॑: पृ॒णन्ति॑ शूर॒ राध॑से ॥३॥
ā tvā॑ su॒tāsa॒ inda॑vo॒ madā॒ ya i॑ndra girvaṇaḥ | āpo॒ na va॑jri॒nnanvo॒kyaṃ१ sara॑: pṛ॒ṇanti॑ śūra॒ rādha॑se || ३ ||
अ॒ने॒हसं॑ प्र॒तर॑णं वि॒वक्ष॑णं॒ मध्व॒: स्वादि॑ष्ठमीं पिब । आ यथा॑ मन्दसा॒नः कि॒रासि॑ न॒: प्र क्षु॒द्रेव॒ त्मना॑ धृ॒षत् ॥४॥
a॒ne॒hasaṃ॑ pra॒tara॑ṇaṃ vi॒vakṣa॑ṇaṃ॒ madhva॒: svādi॑ṣṭhamīṃ piba | ā yathā॑ mandasā॒naḥ ki॒rāsi॑ na॒: pra kṣu॒dreva॒ tmanā॑ dhṛ॒ṣat || ४ ||
आ न॒: स्तोम॒मुप॑ द्र॒वद्धि॑या॒नो अश्वो॒ न सोतृ॑भिः । यं ते॑ स्वधावन्त्स्व॒दय॑न्ति धे॒नव॒ इन्द्र॒ कण्वे॑षु रा॒तय॑: ॥५॥
ā na॒: stoma॒mupa॑ dra॒vaddhi॑yā॒no aśvo॒ na sotṛ॑bhiḥ | yaṃ te॑ svadhāvantsva॒daya॑nti dhe॒nava॒ indra॒ kaṇve॑ṣu rā॒taya॑: || ५ ||
उ॒ग्रं न वी॒रं नम॒सोप॑ सेदिम॒ विभू॑ति॒मक्षि॑तावसुम् । उ॒द्रीव॑ वज्रिन्नव॒तो न सि॑ञ्च॒ते क्षर॑न्तीन्द्र धी॒तय॑: ॥६॥
u॒graṃ na vī॒raṃ nama॒sopa॑ sedima॒ vibhū॑ti॒makṣi॑tāvasum | u॒drīva॑ vajrinnava॒to na si॑ñca॒te kṣara॑ntīndra dhī॒taya॑: || ६ ||
यद्ध॑ नू॒नं यद्वा॑ य॒ज्ञे यद्वा॑ पृथि॒व्यामधि॑ । अतो॑ नो य॒ज्ञमा॒शुभि॑र्महेमत उ॒ग्र उ॒ग्रेभि॒रा ग॑हि ॥७॥
yaddha॑ nū॒naṃ yadvā॑ ya॒jñe yadvā॑ pṛthi॒vyāmadhi॑ | ato॑ no ya॒jñamā॒śubhi॑rmahemata u॒gra u॒grebhi॒rā ga॑hi || ७ ||
अ॒जि॒रासो॒ हर॑यो॒ ये त॑ आ॒शवो॒ वाता॑ इव प्रस॒क्षिण॑: । येभि॒रप॑त्यं॒ मनु॑षः प॒रीय॑से॒ येभि॒र्विश्वं॒ स्व॑र्दृ॒शे ॥८॥
a॒ji॒rāso॒ hara॑yo॒ ye ta॑ ā॒śavo॒ vātā॑ iva prasa॒kṣiṇa॑: | yebhi॒rapa॑tyaṃ॒ manu॑ṣaḥ pa॒rīya॑se॒ yebhi॒rviśvaṃ॒ sva॑rdṛ॒śe || ८ ||
ए॒ताव॑तस्त ईमह॒ इन्द्र॑ सु॒म्नस्य॒ गोम॑तः । यथा॒ प्रावो॑ मघव॒न्मेध्या॑तिथिं॒ यथा॒ नीपा॑तिथिं॒ धने॑ ॥९॥
e॒tāva॑tasta īmaha॒ indra॑ su॒mnasya॒ goma॑taḥ | yathā॒ prāvo॑ maghava॒nmedhyā॑tithiṃ॒ yathā॒ nīpā॑tithiṃ॒ dhane॑ || ९ ||
यथा॒ कण्वे॑ मघवन्त्र॒सद॑स्यवि॒ यथा॑ प॒क्थे दश॑व्रजे । यथा॒ गोश॑र्ये॒ अस॑नोॠ॒जिश्व॒नीन्द्र॒ गोम॒द्धिर॑ण्यवत् ॥१०॥
yathā॒ kaṇve॑ maghavantra॒sada॑syavi॒ yathā॑ pa॒kthe daśa॑vraje | yathā॒ gośa॑rye॒ asa॑noṝ॒jiśva॒nīndra॒ goma॒ddhira॑ṇyavat || १० ||