EeseDharmaSanātana Library
668मण्डल 8 · सूक्त 48
15 shlokस्वा॒दोर॑भक्षि॒ वय॑सः सुमे॒धाः स्वा॒ध्यो॑ वरिवो॒वित्त॑रस्य ।
विश्वे॒ यं दे॒वा उ॒त मर्त्या॑सो॒ मधु॑ ब्रु॒वन्तो॑ अ॒भि सं॒चर॑न्ति ॥१॥
svā॒dora॑bhakṣi॒ vaya॑saḥ sume॒dhāḥ svā॒dhyo॑ varivo॒vitta॑rasya | viśve॒ yaṃ de॒vā u॒ta martyā॑so॒ madhu॑ bru॒vanto॑ a॒bhi saṃ॒cara॑nti || १ ||
अ॒न्तश्च॒ प्रागा॒ अदि॑तिर्भवास्यवया॒ता हर॑सो॒ दैव्य॑स्य ।
इन्द॒विन्द्र॑स्य स॒ख्यं जु॑षा॒णः श्रौष्टी॑व॒ धुर॒मनु॑ रा॒य ऋ॑ध्याः ॥२॥
a॒ntaśca॒ prāgā॒ adi॑tirbhavāsyavayā॒tā hara॑so॒ daivya॑sya | inda॒vindra॑sya sa॒khyaṃ ju॑ṣā॒ṇaḥ śrauṣṭī॑va॒ dhura॒manu॑ rā॒ya ṛ॑dhyāḥ || २ ||
अपा॑म॒ सोम॑म॒मृता॑ अभू॒माग॑न्म॒ ज्योति॒रवि॑दाम दे॒वान् ।
किं नू॒नम॒स्मान्कृ॑णव॒दरा॑ति॒: किमु॑ धू॒र्तिर॑मृत॒ मर्त्य॑स्य ॥३॥
apā॑ma॒ soma॑ma॒mṛtā॑ abhū॒māga॑nma॒ jyoti॒ravi॑dāma de॒vān | kiṃ nū॒nama॒smānkṛ॑ṇava॒darā॑ti॒: kimu॑ dhū॒rtira॑mṛta॒ martya॑sya || ३ ||
शं नो॑ भव हृ॒द आ पी॒त इ॑न्दो पि॒तेव॑ सोम सू॒नवे॑ सु॒शेव॑: ।
सखे॑व॒ सख्य॑ उरुशंस॒ धीर॒: प्र ण॒ आयु॑र्जी॒वसे॑ सोम तारीः ॥४॥
śaṃ no॑ bhava hṛ॒da ā pī॒ta i॑ndo pi॒teva॑ soma sū॒nave॑ su॒śeva॑: | sakhe॑va॒ sakhya॑ uruśaṃsa॒ dhīra॒: pra ṇa॒ āyu॑rjī॒vase॑ soma tārīḥ || ४ ||
इ॒मे मा॑ पी॒ता य॒शस॑ उरु॒ष्यवो॒ रथं॒ न गाव॒: सम॑नाह॒ पर्व॑सु ।
ते मा॑ रक्षन्तु वि॒स्रस॑श्च॒रित्रा॑दु॒त मा॒ स्रामा॑द्यवय॒न्त्विन्द॑वः ॥५॥
i॒me mā॑ pī॒tā ya॒śasa॑ uru॒ṣyavo॒ rathaṃ॒ na gāva॒: sama॑nāha॒ parva॑su | te mā॑ rakṣantu vi॒srasa॑śca॒ritrā॑du॒ta mā॒ srāmā॑dyavaya॒ntvinda॑vaḥ || ५ ||
अ॒ग्निं न मा॑ मथि॒तं सं दि॑दीप॒: प्र च॑क्षय कृणु॒हि वस्य॑सो नः ।
अथा॒ हि ते॒ मद॒ आ सो॑म॒ मन्ये॑ रे॒वाँ इ॑व॒ प्र च॑रा पु॒ष्टिमच्छ॑ ॥६॥
a॒gniṃ na mā॑ mathi॒taṃ saṃ di॑dīpa॒: pra ca॑kṣaya kṛṇu॒hi vasya॑so naḥ | athā॒ hi te॒ mada॒ ā so॑ma॒ manye॑ re॒vām̐ i॑va॒ pra ca॑rā pu॒ṣṭimaccha॑ || ६ ||
इ॒षि॒रेण॑ ते॒ मन॑सा सु॒तस्य॑ भक्षी॒महि॒ पित्र्य॑स्येव रा॒यः ।
सोम॑ राज॒न्प्र ण॒ आयूं॑षि तारी॒रहा॑नीव॒ सूर्यो॑ वास॒राणि॑ ॥७॥
i॒ṣi॒reṇa॑ te॒ mana॑sā su॒tasya॑ bhakṣī॒mahi॒ pitrya॑syeva rā॒yaḥ | soma॑ rāja॒npra ṇa॒ āyūṃ॑ṣi tārī॒rahā॑nīva॒ sūryo॑ vāsa॒rāṇi॑ || ७ ||
सोम॑ राजन्मृ॒ळया॑ नः स्व॒स्ति तव॑ स्मसि व्र॒त्या॒३स्तस्य॑ विद्धि ।
अल॑र्ति॒ दक्ष॑ उ॒त म॒न्युरि॑न्दो॒ मा नो॑ अ॒र्यो अ॑नुका॒मं परा॑ दाः ॥८॥
soma॑ rājanmṛ॒ḷayā॑ naḥ sva॒sti tava॑ smasi vra॒tyā॒३stasya॑ viddhi | ala॑rti॒ dakṣa॑ u॒ta ma॒nyuri॑ndo॒ mā no॑ a॒ryo a॑nukā॒maṃ parā॑ dāḥ || ८ ||
त्वं हि न॑स्त॒न्व॑: सोम गो॒पा गात्रे॑गात्रे निष॒सत्था॑ नृ॒चक्षा॑: ।
यत्ते॑ व॒यं प्र॑मि॒नाम॑ व्र॒तानि॒ स नो॑ मृळ सुष॒खा दे॑व॒ वस्य॑: ॥९॥
tvaṃ hi na॑sta॒nva॑: soma go॒pā gātre॑gātre niṣa॒satthā॑ nṛ॒cakṣā॑: | yatte॑ va॒yaṃ pra॑mi॒nāma॑ vra॒tāni॒ sa no॑ mṛḷa suṣa॒khā de॑va॒ vasya॑: || ९ ||
ऋ॒दू॒दरे॑ण॒ सख्या॑ सचेय॒ यो मा॒ न रिष्ये॑द्धर्यश्व पी॒तः ।
अ॒यं यः सोमो॒ न्यधा॑य्य॒स्मे तस्मा॒ इन्द्रं॑ प्र॒तिर॑मे॒म्यायु॑: ॥१०॥
ṛ॒dū॒dare॑ṇa॒ sakhyā॑ saceya॒ yo mā॒ na riṣye॑ddharyaśva pī॒taḥ | a॒yaṃ yaḥ somo॒ nyadhā॑yya॒sme tasmā॒ indraṃ॑ pra॒tira॑me॒myāyu॑: || १० ||
अप॒ त्या अ॑स्थु॒रनि॑रा॒ अमी॑वा॒ निर॑त्रस॒न्तमि॑षीची॒रभै॑षुः ।
आ सोमो॑ अ॒स्माँ अ॑रुह॒द्विहा॑या॒ अग॑न्म॒ यत्र॑ प्रति॒रन्त॒ आयु॑: ॥११॥
apa॒ tyā a॑sthu॒rani॑rā॒ amī॑vā॒ nira॑trasa॒ntami॑ṣīcī॒rabhai॑ṣuḥ | ā somo॑ a॒smām̐ a॑ruha॒dvihā॑yā॒ aga॑nma॒ yatra॑ prati॒ranta॒ āyu॑: || ११ ||
यो न॒ इन्दु॑: पितरो हृ॒त्सु पी॒तोऽम॑र्त्यो॒ मर्त्याँ॑ आवि॒वेश॑ ।
तस्मै॒ सोमा॑य ह॒विषा॑ विधेम मृळी॒के अ॑स्य सुम॒तौ स्या॑म ॥१२॥
yo na॒ indu॑: pitaro hṛ॒tsu pī॒to’ma॑rtyo॒ martyām̐॑ āvi॒veśa॑ | tasmai॒ somā॑ya ha॒viṣā॑ vidhema mṛḷī॒ke a॑sya suma॒tau syā॑ma || १२ ||
त्वं सो॑म पि॒तृभि॑: संविदा॒नोऽनु॒ द्यावा॑पृथि॒वी आ त॑तन्थ ।
तस्मै॑ त इन्दो ह॒विषा॑ विधेम व॒यं स्या॑म॒ पत॑यो रयी॒णाम् ॥१३॥
tvaṃ so॑ma pi॒tṛbhi॑: saṃvidā॒no’nu॒ dyāvā॑pṛthi॒vī ā ta॑tantha | tasmai॑ ta indo ha॒viṣā॑ vidhema va॒yaṃ syā॑ma॒ pata॑yo rayī॒ṇām || १३ ||
त्राता॑रो देवा॒ अधि॑ वोचता नो॒ मा नो॑ नि॒द्रा ई॑शत॒ मोत
जल्पि॑: । व॒यं सोम॑स्य वि॒श्वह॑ प्रि॒यास॑: सु॒वीरा॑सो वि॒दथ॒मा व॑देम ॥१४॥
trātā॑ro devā॒ adhi॑ vocatā no॒ mā no॑ ni॒drā ī॑śata॒ mota jalpi॑: | va॒yaṃ soma॑sya vi॒śvaha॑ pri॒yāsa॑: su॒vīrā॑so vi॒datha॒mā va॑dema || १४ ||
त्वं न॑: सोम वि॒श्वतो॑ वयो॒धास्त्वं स्व॒र्विदा वि॑शा नृ॒चक्षा॑: ।
त्वं न॑ इन्द ऊ॒तिभि॑: स॒जोषा॑: पा॒हि प॒श्चाता॑दु॒त वा॑ पु॒रस्ता॑त् ॥१५॥
tvaṃ na॑: soma vi॒śvato॑ vayo॒dhāstvaṃ sva॒rvidā vi॑śā nṛ॒cakṣā॑: | tvaṃ na॑ inda ū॒tibhi॑: sa॒joṣā॑: pā॒hi pa॒ścātā॑du॒ta vā॑ pu॒rastā॑t || १५ ||