EeseDharmaSanātana Library
667मण्डल 8 · सूक्त 47
18 shlokमहि॑ वो मह॒तामवो॒ वरु॑ण॒ मित्र॑ दा॒शुषे॑ ।
यमा॑दित्या अ॒भि द्रु॒हो रक्ष॑था॒ नेम॒घं न॑शदने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१॥
mahi॑ vo maha॒tāmavo॒ varu॑ṇa॒ mitra॑ dā॒śuṣe॑ | yamā॑dityā a॒bhi dru॒ho rakṣa॑thā॒ nema॒ghaṃ na॑śadane॒haso॑ va ū॒taya॑: su॒ūtayo॑ va ū॒taya॑: || १ ||
वि॒दा दे॑वा अ॒घाना॒मादि॑त्यासो अ॒पाकृ॑तिम् ।
प॒क्षा वयो॒ यथो॒परि॒ व्य१स्मे शर्म॑ यच्छताने॒हसो॑ व ऊ॒तय॑: सु॒ऊतयो॑ व ऊ॒तय॑: ॥२॥
vi॒dā de॑vā a॒ghānā॒mādi॑tyāso a॒pākṛ॑tim | pa॒kṣā vayo॒ yatho॒pari॒ vya१sme śarma॑ yacchatāne॒haso॑ va ū॒taya॑: su॒ūtayo॑ va ū॒taya॑: || २ ||
व्य१स्मे अधि॒ शर्म॒ तत्प॒क्षा वयो॒ न य॑न्तन ।
विश्वा॑नि विश्ववेदसो वरू॒थ्या॑ मनामहेऽने॒हसो॑ व ऊ॒तय॑: सु॒ऊतयो॑ व ऊ॒तय॑: ॥३॥
vya१sme adhi॒ śarma॒ tatpa॒kṣā vayo॒ na ya॑ntana | viśvā॑ni viśvavedaso varū॒thyā॑ manāmahe’ne॒haso॑ va ū॒taya॑: su॒ūtayo॑ va ū॒taya॑: || ३ ||
यस्मा॒ अरा॑सत॒ क्षयं॑ जी॒वातुं॑ च॒ प्रचे॑तसः ।
मनो॒र्विश्व॑स्य॒ घेदि॒म आ॑दि॒त्या रा॒य ई॑शतेऽने॒हसो॑ व ऊ॒तय॑: सु॒ऊतयो॑ व ऊ॒तय॑: ॥४॥
yasmā॒ arā॑sata॒ kṣayaṃ॑ jī॒vātuṃ॑ ca॒ prace॑tasaḥ | mano॒rviśva॑sya॒ ghedi॒ma ā॑di॒tyā rā॒ya ī॑śate’ne॒haso॑ va ū॒taya॑: su॒ūtayo॑ va ū॒taya॑: || ४ ||
परि॑ णो वृणजन्न॒घा दु॒र्गाणि॑ र॒थ्यो॑ यथा ।
स्यामेदिन्द्र॑स्य॒ शर्म॑ण्यादि॒त्याना॑मु॒ताव॑स्यने॒हसो॑ व ऊ॒तय॑: सु॒ऊतयो॑ व ऊ॒तय॑: ॥५॥
pari॑ ṇo vṛṇajanna॒ghā du॒rgāṇi॑ ra॒thyo॑ yathā | syāmedindra॑sya॒ śarma॑ṇyādi॒tyānā॑mu॒tāva॑syane॒haso॑ va ū॒taya॑: su॒ūtayo॑ va ū॒taya॑: || ५ ||
प॒रि॒ह्वृ॒तेद॒ना जनो॑ यु॒ष्माद॑त्तस्य वायति ।
देवा॒ अद॑भ्रमाश वो॒ यमा॑दित्या॒ अहे॑तनाने॒हसो॑ व ऊ॒तय॑: सु॒ऊतयो॑ व ऊ॒तय॑: ॥६॥
pa॒ri॒hvṛ॒teda॒nā jano॑ yu॒ṣmāda॑ttasya vāyati | devā॒ ada॑bhramāśa vo॒ yamā॑dityā॒ ahe॑tanāne॒haso॑ va ū॒taya॑: su॒ūtayo॑ va ū॒taya॑: || ६ ||
न तं ति॒ग्मं च॒न त्यजो॒ न द्रा॑सद॒भि तं गु॒रु ।
यस्मा॑ उ॒ शर्म॑ स॒प्रथ॒ आदि॑त्यासो॒ अरा॑ध्वमने॒हसो॑ व ऊ॒तय॑: सु॒ऊतयो॑ व ऊ॒तय॑: ॥७॥
na taṃ ti॒gmaṃ ca॒na tyajo॒ na drā॑sada॒bhi taṃ gu॒ru | yasmā॑ u॒ śarma॑ sa॒pratha॒ ādi॑tyāso॒ arā॑dhvamane॒haso॑ va ū॒taya॑: su॒ūtayo॑ va ū॒taya॑: || ७ ||
यु॒ष्मे दे॑वा॒ अपि॑ ष्मसि॒ युध्य॑न्त इव॒ वर्म॑सु ।
यू॒यं म॒हो न॒ एन॑सो यू॒यमर्भा॑दुरुष्यताने॒हसो॑ व ऊ॒तय॑: सु॒ऊतयो॑ व ऊ॒तय॑: ॥८॥
yu॒ṣme de॑vā॒ api॑ ṣmasi॒ yudhya॑nta iva॒ varma॑su | yū॒yaṃ ma॒ho na॒ ena॑so yū॒yamarbhā॑duruṣyatāne॒haso॑ va ū॒taya॑: su॒ūtayo॑ va ū॒taya॑: || ८ ||
अदि॑तिर्न उरुष्य॒त्वदि॑ति॒: शर्म॑ यच्छतु ।
मा॒ता मि॒त्रस्य॑ रे॒वतो॑ऽर्य॒म्णो वरु॑णस्य चाने॒हसो॑ व ऊ॒तय॑: सु॒ऊतयो॑ व ऊ॒तय॑: ॥९॥
adi॑tirna uruṣya॒tvadi॑ti॒: śarma॑ yacchatu | mā॒tā mi॒trasya॑ re॒vato॑’rya॒mṇo varu॑ṇasya cāne॒haso॑ va ū॒taya॑: su॒ūtayo॑ va ū॒taya॑: || ९ ||
यद्दे॑वा॒: शर्म॑ शर॒णं यद्भ॒द्रं यद॑नातु॒रम् ।
त्रि॒धातु॒ यद्व॑रू॒थ्यं१ तद॒स्मासु॒ वि य॑न्तनाने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१०॥
yadde॑vā॒: śarma॑ śara॒ṇaṃ yadbha॒draṃ yada॑nātu॒ram | tri॒dhātu॒ yadva॑rū॒thyaṃ१ tada॒smāsu॒ vi ya॑ntanāne॒haso॑ va ū॒taya॑: su॒ūtayo॑ va ū॒taya॑: || १० ||
आदि॑त्या॒ अव॒ हि ख्यताधि॒ कूला॑दिव॒ स्पश॑: ।
सु॒ती॒र्थमर्व॑तो य॒थानु॑ नो नेषथा सु॒गम॑ने॒हसो॑ व ऊ॒तय॑: सु॒तयो॑ व ऊ॒तय॑: ॥११॥
ādi॑tyā॒ ava॒ hi khyatādhi॒ kūlā॑diva॒ spaśa॑: | su॒tī॒rthamarva॑to ya॒thānu॑ no neṣathā su॒gama॑ne॒haso॑ va ū॒taya॑: su॒tayo॑ va ū॒taya॑: || ११ ||
नेह भ॒द्रं र॑क्ष॒स्विने॒ नाव॒यै नोप॒या उ॒त ।
गवे॑ च भ॒द्रं धे॒नवे॑ वी॒राय॑ च श्रवस्य॒ते॑ऽने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१२॥
neha bha॒draṃ ra॑kṣa॒svine॒ nāva॒yai nopa॒yā u॒ta | gave॑ ca bha॒draṃ dhe॒nave॑ vī॒rāya॑ ca śravasya॒te॑’ne॒haso॑ va ū॒taya॑: su॒ūtayo॑ va ū॒taya॑: || १२ ||
यदा॒विर्यद॑पी॒च्यं१ देवा॑सो॒ अस्ति॑ दुष्कृ॒तम् ।
त्रि॒ते तद्विश्व॑मा॒प्त्य आ॒रे अ॒स्मद्द॑धातनाने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१३॥
yadā॒viryada॑pī॒cyaṃ१ devā॑so॒ asti॑ duṣkṛ॒tam | tri॒te tadviśva॑mā॒ptya ā॒re a॒smadda॑dhātanāne॒haso॑ va ū॒taya॑: su॒ūtayo॑ va ū॒taya॑: || १३ ||
यच्च॒ गोषु॑ दु॒ष्ष्वप्न्यं॒ यच्चा॒स्मे दु॑हितर्दिवः ।
त्रि॒ताय॒ तद्वि॑भावर्या॒प्त्याय॒ परा॑ वहाने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१४॥
yacca॒ goṣu॑ du॒ṣṣvapnyaṃ॒ yaccā॒sme du॑hitardivaḥ | tri॒tāya॒ tadvi॑bhāvaryā॒ptyāya॒ parā॑ vahāne॒haso॑ va ū॒taya॑: su॒ūtayo॑ va ū॒taya॑: || १४ ||
नि॒ष्कं वा॑ घा कृ॒णव॑ते॒ स्रजं॑ वा दुहितर्दिवः ।
त्रि॒ते दु॒ष्ष्वप्न्यं॒ सर्व॑मा॒प्त्ये परि॑ दद्मस्यने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१५॥
ni॒ṣkaṃ vā॑ ghā kṛ॒ṇava॑te॒ srajaṃ॑ vā duhitardivaḥ | tri॒te du॒ṣṣvapnyaṃ॒ sarva॑mā॒ptye pari॑ dadmasyane॒haso॑ va ū॒taya॑: su॒ūtayo॑ va ū॒taya॑: || १५ ||
तद॑न्नाय॒ तद॑पसे॒ तं भा॒गमु॑पसे॒दुषे॑ ।
त्रि॒ताय॑ च द्वि॒ताय॒ चोषो॑ दु॒ष्ष्वप्न्यं॑ वहाने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१६॥
tada॑nnāya॒ tada॑pase॒ taṃ bhā॒gamu॑pase॒duṣe॑ | tri॒tāya॑ ca dvi॒tāya॒ coṣo॑ du॒ṣṣvapnyaṃ॑ vahāne॒haso॑ va ū॒taya॑: su॒ūtayo॑ va ū॒taya॑: || १६ ||
यथा॑ क॒लां यथा॑ श॒फं यथ॑ ऋ॒णं सं॒नया॑मसि ।
ए॒वा दु॒ष्ष्वप्न्यं॒ सर्व॑मा॒प्त्ये सं न॑यामस्यने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१७॥
yathā॑ ka॒lāṃ yathā॑ śa॒phaṃ yatha॑ ṛ॒ṇaṃ saṃ॒nayā॑masi | e॒vā du॒ṣṣvapnyaṃ॒ sarva॑mā॒ptye saṃ na॑yāmasyane॒haso॑ va ū॒taya॑: su॒ūtayo॑ va ū॒taya॑: || १७ ||
अजै॑ष्मा॒द्यास॑नाम॒ चाभू॒माना॑गसो व॒यम् ।
उषो॒ यस्मा॑द्दु॒ष्ष्वप्न्या॒दभै॒ष्माप॒ तदु॑च्छत्वने॒हसो॑ व ऊ॒तय॑: सु॒ऊतयो॑ व ऊ॒तय॑: ॥१८॥
ajai॑ṣmā॒dyāsa॑nāma॒ cābhū॒mānā॑gaso va॒yam | uṣo॒ yasmā॑ddu॒ṣṣvapnyā॒dabhai॒ṣmāpa॒ tadu॑cchatvane॒haso॑ va ū॒taya॑: su॒ūtayo॑ va ū॒taya॑: || १८ ||