EeseDharmaSanātana Library
664मण्डल 8 · सूक्त 44
30 shlokस॒मिधा॒ग्निं दु॑वस्यत घृ॒तैर्बो॑धय॒ताति॑थिम् । आस्मि॑न्ह॒व्या जु॑होतन ॥१॥
sa॒midhā॒gniṃ du॑vasyata ghṛ॒tairbo॑dhaya॒tāti॑thim | āsmi॑nha॒vyā ju॑hotana || १ ||
अग्ने॒ स्तोमं॑ जुषस्व मे॒ वर्ध॑स्वा॒नेन॒ मन्म॑ना । प्रति॑ सू॒क्तानि॑ हर्य नः ॥२॥
agne॒ stomaṃ॑ juṣasva me॒ vardha॑svā॒nena॒ manma॑nā | prati॑ sū॒ktāni॑ harya naḥ || २ ||
अ॒ग्निं दू॒तं पु॒रो द॑धे हव्य॒वाह॒मुप॑ ब्रुवे । दे॒वाँ आ सा॑दयादि॒ह ॥३॥
a॒gniṃ dū॒taṃ pu॒ro da॑dhe havya॒vāha॒mupa॑ bruve | de॒vām̐ ā sā॑dayādi॒ha || ३ ||
उत्ते॑ बृ॒हन्तो॑ अ॒र्चय॑: समिधा॒नस्य॑ दीदिवः । अग्ने॑ शु॒क्रास॑ ईरते ॥४॥
utte॑ bṛ॒hanto॑ a॒rcaya॑: samidhā॒nasya॑ dīdivaḥ | agne॑ śu॒krāsa॑ īrate || ४ ||
उप॑ त्वा जु॒ह्वो॒३ मम॑ घृ॒ताची॑र्यन्तु हर्यत । अग्ने॑ ह॒व्या जु॑षस्व नः ॥५॥
upa॑ tvā ju॒hvo॒३ mama॑ ghṛ॒tācī॑ryantu haryata | agne॑ ha॒vyā ju॑ṣasva naḥ || ५ ||
म॒न्द्रं होता॑रमृ॒त्विजं॑ चि॒त्रभा॑नुं वि॒भाव॑सुम् । अ॒ग्निमी॑ळे॒ स उ॑ श्रवत् ॥६॥
ma॒ndraṃ hotā॑ramṛ॒tvijaṃ॑ ci॒trabhā॑nuṃ vi॒bhāva॑sum | a॒gnimī॑ḷe॒ sa u॑ śravat || ६ ||
प्र॒त्नं होता॑र॒मीड्यं॒ जुष्ट॑म॒ग्निं क॒विक्र॑तुम् । अ॒ध्व॒राणा॑मभि॒श्रिय॑म् ॥७॥
pra॒tnaṃ hotā॑ra॒mīḍyaṃ॒ juṣṭa॑ma॒gniṃ ka॒vikra॑tum | a॒dhva॒rāṇā॑mabhi॒śriya॑m || ७ ||
जु॒षा॒णो अ॑ङ्गिरस्तमे॒मा ह॒व्यान्या॑नु॒षक् । अग्ने॑ य॒ज्ञं न॑य ऋतु॒था ॥८॥
ju॒ṣā॒ṇo a॑ṅgirastame॒mā ha॒vyānyā॑nu॒ṣak | agne॑ ya॒jñaṃ na॑ya ṛtu॒thā || ८ ||
स॒मि॒धा॒न उ॑ सन्त्य॒ शुक्र॑शोच इ॒हा व॑ह । चि॒कि॒त्वान्दैव्यं॒ जन॑म् ॥९॥
sa॒mi॒dhā॒na u॑ santya॒ śukra॑śoca i॒hā va॑ha | ci॒ki॒tvāndaivyaṃ॒ jana॑m || ९ ||
विप्रं॒ होता॑रम॒द्रुहं॑ धू॒मके॑तुं वि॒भाव॑सुम् । य॒ज्ञानां॑ के॒तुमी॑महे ॥१०॥
vipraṃ॒ hotā॑rama॒druhaṃ॑ dhū॒make॑tuṃ vi॒bhāva॑sum | ya॒jñānāṃ॑ ke॒tumī॑mahe || १० ||
अग्ने॒ नि पा॑हि न॒स्त्वं प्रति॑ ष्म देव॒ रीष॑तः । भि॒न्धि द्वेष॑: सहस्कृत ॥११॥
agne॒ ni pā॑hi na॒stvaṃ prati॑ ṣma deva॒ rīṣa॑taḥ | bhi॒ndhi dveṣa॑: sahaskṛta || ११ ||
अ॒ग्निः प्र॒त्नेन॒ मन्म॑ना॒ शुम्भा॑नस्त॒न्वं१ स्वाम् । क॒विर्विप्रे॑ण वावृधे ॥१२॥
a॒gniḥ pra॒tnena॒ manma॑nā॒ śumbhā॑nasta॒nvaṃ१ svām | ka॒virvipre॑ṇa vāvṛdhe || १२ ||
ऊ॒र्जो नपा॑त॒मा हु॑वे॒ऽग्निं पा॑व॒कशो॑चिषम् । अ॒स्मिन्य॒ज्ञे स्व॑ध्व॒रे ॥१३॥
ū॒rjo napā॑ta॒mā hu॑ve॒’gniṃ pā॑va॒kaśo॑ciṣam | a॒sminya॒jñe sva॑dhva॒re || १३ ||
स नो॑ मित्रमह॒स्त्वमग्ने॑ शु॒क्रेण॑ शो॒चिषा॑ । दे॒वैरा स॑त्सि ब॒र्हिषि॑ ॥१४॥
sa no॑ mitramaha॒stvamagne॑ śu॒kreṇa॑ śo॒ciṣā॑ | de॒vairā sa॑tsi ba॒rhiṣi॑ || १४ ||
यो अ॒ग्निं त॒न्वो॒३ दमे॑ दे॒वं मर्त॑: सप॒र्यति॑ । तस्मा॒ इद्दी॑दय॒द्वसु॑ ॥१५॥
yo a॒gniṃ ta॒nvo॒३ dame॑ de॒vaṃ marta॑: sapa॒ryati॑ | tasmā॒ iddī॑daya॒dvasu॑ || १५ ||
अ॒ग्निर्मू॒र्धा दि॒वः क॒कुत्पति॑: पृथि॒व्या अ॒यम् । अ॒पां रेतां॑सि जिन्वति ॥१६॥
a॒gnirmū॒rdhā di॒vaḥ ka॒kutpati॑: pṛthi॒vyā a॒yam | a॒pāṃ retāṃ॑si jinvati || १६ ||
उद॑ग्ने॒ शुच॑य॒स्तव॑ शु॒क्रा भ्राज॑न्त ईरते । तव॒ ज्योतीं॑ष्य॒र्चय॑: ॥१७॥
uda॑gne॒ śuca॑ya॒stava॑ śu॒krā bhrāja॑nta īrate | tava॒ jyotīṃ॑ṣya॒rcaya॑: || १७ ||
ईशि॑षे॒ वार्य॑स्य॒ हि दा॒त्रस्या॑ग्ने॒ स्व॑र्पतिः । स्तो॒ता स्यां॒ तव॒ शर्म॑णि ॥१८॥
īśi॑ṣe॒ vārya॑sya॒ hi dā॒trasyā॑gne॒ sva॑rpatiḥ | sto॒tā syāṃ॒ tava॒ śarma॑ṇi || १८ ||
त्वाम॑ग्ने मनी॒षिण॒स्त्वां हि॑न्वन्ति॒ चित्ति॑भिः । त्वां व॑र्धन्तु नो॒ गिर॑: ॥१९॥
tvāma॑gne manī॒ṣiṇa॒stvāṃ hi॑nvanti॒ citti॑bhiḥ | tvāṃ va॑rdhantu no॒ gira॑: || १९ ||
अद॑ब्धस्य स्व॒धाव॑तो दू॒तस्य॒ रेभ॑त॒: सदा॑ । अ॒ग्नेः स॒ख्यं वृ॑णीमहे ॥२०॥
ada॑bdhasya sva॒dhāva॑to dū॒tasya॒ rebha॑ta॒: sadā॑ | a॒gneḥ sa॒khyaṃ vṛ॑ṇīmahe || २० ||
अ॒ग्निः शुचि॑व्रततम॒: शुचि॒र्विप्र॒: शुचि॑: क॒विः । शुची॑ रोचत॒ आहु॑तः ॥२१॥
a॒gniḥ śuci॑vratatama॒: śuci॒rvipra॒: śuci॑: ka॒viḥ | śucī॑ rocata॒ āhu॑taḥ || २१ ||
उ॒त त्वा॑ धी॒तयो॒ मम॒ गिरो॑ वर्धन्तु वि॒श्वहा॑ । अग्ने॑ स॒ख्यस्य॑ बोधि नः ॥२२॥
u॒ta tvā॑ dhī॒tayo॒ mama॒ giro॑ vardhantu vi॒śvahā॑ | agne॑ sa॒khyasya॑ bodhi naḥ || २२ ||
यद॑ग्ने॒ स्याम॒हं त्वं त्वं वा॑ घा॒ स्या अ॒हम् । स्युष्टे॑ स॒त्या इ॒हाशिष॑: ॥२३॥
yada॑gne॒ syāma॒haṃ tvaṃ tvaṃ vā॑ ghā॒ syā a॒ham | syuṣṭe॑ sa॒tyā i॒hāśiṣa॑: || २३ ||
वसु॒र्वसु॑पति॒र्हि क॒मस्य॑ग्ने वि॒भाव॑सुः । स्याम॑ ते सुम॒तावपि॑ ॥२४॥
vasu॒rvasu॑pati॒rhi ka॒masya॑gne vi॒bhāva॑suḥ | syāma॑ te suma॒tāvapi॑ || २४ ||
अग्ने॑ धृ॒तव्र॑ताय ते समु॒द्राये॑व॒ सिन्ध॑वः । गिरो॑ वा॒श्रास॑ ईरते ॥२५॥
agne॑ dhṛ॒tavra॑tāya te samu॒drāye॑va॒ sindha॑vaḥ | giro॑ vā॒śrāsa॑ īrate || २५ ||
युवा॑नं वि॒श्पतिं॑ क॒विं वि॒श्वादं॑ पुरु॒वेप॑सम् । अ॒ग्निं शु॑म्भामि॒ मन्म॑भिः ॥२६॥
yuvā॑naṃ vi॒śpatiṃ॑ ka॒viṃ vi॒śvādaṃ॑ puru॒vepa॑sam | a॒gniṃ śu॑mbhāmi॒ manma॑bhiḥ || २६ ||
य॒ज्ञानां॑ र॒थ्ये॑ व॒यं ति॒ग्मज॑म्भाय वी॒ळवे॑ । स्तोमै॑रिषेमा॒ग्नये॑ ॥२७॥
ya॒jñānāṃ॑ ra॒thye॑ va॒yaṃ ti॒gmaja॑mbhāya vī॒ḷave॑ | stomai॑riṣemā॒gnaye॑ || २७ ||
अ॒यम॑ग्ने॒ त्वे अपि॑ जरि॒ता भू॑तु सन्त्य । तस्मै॑ पावक मृळय ॥२८॥
a॒yama॑gne॒ tve api॑ jari॒tā bhū॑tu santya | tasmai॑ pāvaka mṛḷaya || २८ ||
धीरो॒ ह्यस्य॑द्म॒सद्विप्रो॒ न जागृ॑वि॒: सदा॑ । अग्ने॑ दी॒दय॑सि॒ द्यवि॑ ॥२९॥
dhīro॒ hyasya॑dma॒sadvipro॒ na jāgṛ॑vi॒: sadā॑ | agne॑ dī॒daya॑si॒ dyavi॑ || २९ ||
पु॒राग्ने॑ दुरि॒तेभ्य॑: पु॒रा मृ॒ध्रेभ्य॑: कवे । प्र ण॒ आयु॑र्वसो तिर ॥३०॥
pu॒rāgne॑ duri॒tebhya॑: pu॒rā mṛ॒dhrebhya॑: kave | pra ṇa॒ āyu॑rvaso tira || ३० ||