EeseDharmaSanātana Library
646मण्डल 8 · सूक्त 26
25 shlok१६-१९,२१,२५ गायत्री; २० अनुष्टुप् ।
यु॒वोरु॒ षू रथं॑ हुवे स॒धस्तु॑त्याय सू॒रिषु॑ । अतू॑र्तदक्षा वृषणा वृषण्वसू ॥१॥
१६-१९,२१,२५ gāyatrī; २० anuṣṭup | yu॒voru॒ ṣū rathaṃ॑ huve sa॒dhastu॑tyāya sū॒riṣu॑ | atū॑rtadakṣā vṛṣaṇā vṛṣaṇvasū || १ ||
यु॒वं व॑रो सु॒षाम्णे॑ म॒हे तने॑ नासत्या । अवो॑भिर्याथो वृषणा वृषण्वसू ॥२॥
yu॒vaṃ va॑ro su॒ṣāmṇe॑ ma॒he tane॑ nāsatyā | avo॑bhiryātho vṛṣaṇā vṛṣaṇvasū || २ ||
ता वा॑म॒द्य ह॑वामहे ह॒व्येभि॑र्वाजिनीवसू । पू॒र्वीरि॒ष इ॒षय॑न्ता॒वति॑ क्ष॒पः ॥३॥
tā vā॑ma॒dya ha॑vāmahe ha॒vyebhi॑rvājinīvasū | pū॒rvīri॒ṣa i॒ṣaya॑ntā॒vati॑ kṣa॒paḥ || ३ ||
आ वां॒ वाहि॑ष्ठो अश्विना॒ रथो॑ यातु श्रु॒तो न॑रा । उप॒ स्तोमा॑न्तु॒रस्य॑ दर्शथः श्रि॒ये ॥४॥
ā vāṃ॒ vāhi॑ṣṭho aśvinā॒ ratho॑ yātu śru॒to na॑rā | upa॒ stomā॑ntu॒rasya॑ darśathaḥ śri॒ye || ४ ||
जु॒हु॒रा॒णा चि॑दश्वि॒ना ऽऽम॑न्येथां वृषण्वसू । यु॒वं हि रु॑द्रा॒ पर्ष॑थो॒ अति॒ द्विष॑: ॥५॥
ju॒hu॒rā॒ṇā ci॑daśvi॒nā ’’ma॑nyethāṃ vṛṣaṇvasū | yu॒vaṃ hi ru॑drā॒ parṣa॑tho॒ ati॒ dviṣa॑: || ५ ||
द॒स्रा हि विश्व॑मानु॒षङ्म॒क्षूभि॑: परि॒दीय॑थः । धि॒यं॒जि॒न्वा मधु॑वर्णा शु॒भस्पती॑ ॥६॥
da॒srā hi viśva॑mānu॒ṣaṅma॒kṣūbhi॑: pari॒dīya॑thaḥ | dhi॒yaṃ॒ji॒nvā madhu॑varṇā śu॒bhaspatī॑ || ६ ||
उप॑ नो यातमश्विना रा॒या वि॑श्व॒पुषा॑ स॒ह । म॒घवा॑ना सु॒वीरा॒वन॑पच्युता ॥७॥
upa॑ no yātamaśvinā rā॒yā vi॑śva॒puṣā॑ sa॒ha | ma॒ghavā॑nā su॒vīrā॒vana॑pacyutā || ७ ||
आ मे॑ अ॒स्य प्र॑ती॒व्य१मिन्द्र॑नासत्या गतम् । दे॒वा दे॒वेभि॑र॒द्य स॒चन॑स्तमा ॥८॥
ā me॑ a॒sya pra॑tī॒vya१mindra॑nāsatyā gatam | de॒vā de॒vebhi॑ra॒dya sa॒cana॑stamā || ८ ||
व॒यं हि वां॒ हवा॑मह उक्ष॒ण्यन्तो॑ व्यश्व॒वत् । सु॒म॒तिभि॒रुप॑ विप्रावि॒हा ग॑तम् ॥९॥
va॒yaṃ hi vāṃ॒ havā॑maha ukṣa॒ṇyanto॑ vyaśva॒vat | su॒ma॒tibhi॒rupa॑ viprāvi॒hā ga॑tam || ९ ||
अ॒श्विना॒ स्वृ॑षे स्तुहि कु॒वित्ते॒ श्रव॑तो॒ हव॑म् । नेदी॑यसः कूळयातः प॒णीँरु॒त ॥१०॥
a॒śvinā॒ svṛ॑ṣe stuhi ku॒vitte॒ śrava॑to॒ hava॑m | nedī॑yasaḥ kūḷayātaḥ pa॒ṇīm̐ru॒ta || १० ||
वै॒य॒श्वस्य॑ श्रुतं नरो॒तो मे॑ अ॒स्य वे॑दथः । स॒जोष॑सा॒ वरु॑णो मि॒त्रो अ॑र्य॒मा ॥११॥
vai॒ya॒śvasya॑ śrutaṃ naro॒to me॑ a॒sya ve॑dathaḥ | sa॒joṣa॑sā॒ varu॑ṇo mi॒tro a॑rya॒mā || ११ ||
यु॒वाद॑त्तस्य धिष्ण्या यु॒वानी॑तस्य सू॒रिभि॑: । अह॑रहर्वृषण॒ मह्यं॑ शिक्षतम् ॥१२॥
yu॒vāda॑ttasya dhiṣṇyā yu॒vānī॑tasya sū॒ribhi॑: | aha॑raharvṛṣaṇa॒ mahyaṃ॑ śikṣatam || १२ ||
यो वां॑ य॒ज्ञेभि॒रावृ॒तोऽधि॑वस्त्रा व॒धूरि॑व । स॒प॒र्यन्ता॑ शु॒भे च॑क्राते अ॒श्विना॑ ॥१३॥
yo vāṃ॑ ya॒jñebhi॒rāvṛ॒to’dhi॑vastrā va॒dhūri॑va | sa॒pa॒ryantā॑ śu॒bhe ca॑krāte a॒śvinā॑ || १३ ||
यो वा॑मुरु॒व्यच॑स्तमं॒ चिके॑तति नृ॒पाय्य॑म् । व॒र्तिर॑श्विना॒ परि॑ यातमस्म॒यू ॥१४॥
yo vā॑muru॒vyaca॑stamaṃ॒ cike॑tati nṛ॒pāyya॑m | va॒rtira॑śvinā॒ pari॑ yātamasma॒yū || १४ ||
अ॒स्मभ्यं॒ सु वृ॑षण्वसू या॒तं व॒र्तिर्नृ॒पाय्य॑म् । वि॒षु॒द्रुहे॑व य॒ज्ञमू॑हथुर्गि॒रा ॥१५॥
a॒smabhyaṃ॒ su vṛ॑ṣaṇvasū yā॒taṃ va॒rtirnṛ॒pāyya॑m | vi॒ṣu॒druhe॑va ya॒jñamū॑hathurgi॒rā || १५ ||
वाहि॑ष्ठो वां॒ हवा॑नां॒ स्तोमो॑ दू॒तो हु॑वन्नरा । यु॒वाभ्यां॑ भूत्वश्विना ॥१६॥
vāhi॑ṣṭho vāṃ॒ havā॑nāṃ॒ stomo॑ dū॒to hu॑vannarā | yu॒vābhyāṃ॑ bhūtvaśvinā || १६ ||
यद॒दो दि॒वो अ॑र्ण॒व इ॒षो वा॒ मद॑थो गृ॒हे । श्रु॒तमिन्मे॑ अमर्त्या ॥१७॥
yada॒do di॒vo a॑rṇa॒va i॒ṣo vā॒ mada॑tho gṛ॒he | śru॒taminme॑ amartyā || १७ ||
उ॒त स्या श्वे॑त॒याव॑री॒ वाहि॑ष्ठा वां न॒दीना॑म् । सिन्धु॒र्हिर॑ण्यवर्तनिः ॥१८॥
u॒ta syā śve॑ta॒yāva॑rī॒ vāhi॑ṣṭhā vāṃ na॒dīnā॑m | sindhu॒rhira॑ṇyavartaniḥ || १८ ||
स्मदे॒तया॑ सुकी॒र्त्याऽश्वि॑ना श्वे॒तया॑ धि॒या । वहे॑थे शुभ्रयावाना ॥१९॥
smade॒tayā॑ sukī॒rtyā’śvi॑nā śve॒tayā॑ dhi॒yā | vahe॑the śubhrayāvānā || १९ ||
यु॒क्ष्वा हि त्वं र॑था॒सहा॑ यु॒वस्व॒ पोष्या॑ वसो । आन्नो॑ वायो॒ मधु॑ पिबा॒ऽस्माकं॒ सव॒ना ग॑हि ॥२०॥
yu॒kṣvā hi tvaṃ ra॑thā॒sahā॑ yu॒vasva॒ poṣyā॑ vaso | ānno॑ vāyo॒ madhu॑ pibā॒’smākaṃ॒ sava॒nā ga॑hi || २० ||
तव॑ वायवृतस्पते॒ त्वष्टु॑र्जामातरद्भुत । अवां॒स्या वृ॑णीमहे ॥२१॥
tava॑ vāyavṛtaspate॒ tvaṣṭu॑rjāmātaradbhuta | avāṃ॒syā vṛ॑ṇīmahe || २१ ||
त्वष्टु॒र्जामा॑तरं व॒यमीशा॑नं रा॒य ई॑महे । सु॒ताव॑न्तो वा॒युं द्यु॒म्ना जना॑सः ॥२२॥
tvaṣṭu॒rjāmā॑taraṃ va॒yamīśā॑naṃ rā॒ya ī॑mahe | su॒tāva॑nto vā॒yuṃ dyu॒mnā janā॑saḥ || २२ ||
वायो॑ या॒हि शि॒वा दि॒वो वह॑स्वा॒ सु स्वश्व्य॑म् । वह॑स्व म॒हः पृ॑थु॒पक्ष॑सा॒ रथे॑ ॥२३॥
vāyo॑ yā॒hi śi॒vā di॒vo vaha॑svā॒ su svaśvya॑m | vaha॑sva ma॒haḥ pṛ॑thu॒pakṣa॑sā॒ rathe॑ || २३ ||
त्वां हि सु॒प्सर॑स्तमं नृ॒षद॑नेषु हू॒महे॑ । ग्रावा॑णं॒ नाश्व॑पृष्ठं मं॒हना॑ ॥२४॥
tvāṃ hi su॒psara॑stamaṃ nṛ॒ṣada॑neṣu hū॒mahe॑ | grāvā॑ṇaṃ॒ nāśva॑pṛṣṭhaṃ maṃ॒hanā॑ || २४ ||
स त्वं नो॑ देव॒ मन॑सा॒ वायो॑ मन्दा॒नो अ॑ग्रि॒यः । कृ॒धि वाजाँ॑ अ॒पो धिय॑: ॥२५॥
sa tvaṃ no॑ deva॒ mana॑sā॒ vāyo॑ mandā॒no a॑gri॒yaḥ | kṛ॒dhi vājām̐॑ a॒po dhiya॑: || २५ ||