EeseDharmaSanātana Library
645मण्डल 8 · सूक्त 25
23 shlokता वां॒ विश्व॑स्य गो॒पा दे॒वा दे॒वेषु॑ य॒ज्ञिया॑ । ऋ॒तावा॑ना यजसे पू॒तद॑क्षसा ॥१॥
tā vāṃ॒ viśva॑sya go॒pā de॒vā de॒veṣu॑ ya॒jñiyā॑ | ṛ॒tāvā॑nā yajase pū॒tada॑kṣasā || १ ||
मि॒त्रा तना॒ न र॒थ्या॒३ वरु॑णो॒ यश्च॑ सु॒क्रतु॑: । स॒नात्सु॑जा॒ता तन॑या धृ॒तव्र॑ता ॥२॥
mi॒trā tanā॒ na ra॒thyā॒३ varu॑ṇo॒ yaśca॑ su॒kratu॑: | sa॒nātsu॑jā॒tā tana॑yā dhṛ॒tavra॑tā || २ ||
ता मा॒ता वि॒श्ववे॑दसाऽसु॒र्या॑य॒ प्रम॑हसा । म॒ही ज॑जा॒नादि॑तिॠ॒ताव॑री ॥३॥
tā mā॒tā vi॒śvave॑dasā’su॒ryā॑ya॒ prama॑hasā | ma॒hī ja॑jā॒nādi॑tiṝ॒tāva॑rī || ३ ||
म॒हान्ता॑ मि॒त्रावरु॑णा स॒म्राजा॑ दे॒वावसु॑रा । ऋ॒तावा॑नावृ॒तमा घो॑षतो बृ॒हत् ॥४॥
ma॒hāntā॑ mi॒trāvaru॑ṇā sa॒mrājā॑ de॒vāvasu॑rā | ṛ॒tāvā॑nāvṛ॒tamā gho॑ṣato bṛ॒hat || ४ ||
नपा॑ता॒ शव॑सो म॒हः सू॒नू दक्ष॑स्य सु॒क्रतू॑ । सृ॒प्रदा॑नू इ॒षो वास्त्वधि॑ क्षितः ॥५॥
napā॑tā॒ śava॑so ma॒haḥ sū॒nū dakṣa॑sya su॒kratū॑ | sṛ॒pradā॑nū i॒ṣo vāstvadhi॑ kṣitaḥ || ५ ||
सं या दानू॑नि ये॒मथु॑र्दि॒व्याः पार्थि॑वी॒रिष॑: । नभ॑स्वती॒रा वां॑ चरन्तु वृ॒ष्टय॑: ॥६॥
saṃ yā dānū॑ni ye॒mathu॑rdi॒vyāḥ pārthi॑vī॒riṣa॑: | nabha॑svatī॒rā vāṃ॑ carantu vṛ॒ṣṭaya॑: || ६ ||
अधि॒ या बृ॑ह॒तो दि॒वो॒३ऽभि यू॒थेव॒ पश्य॑तः । ऋ॒तावा॑ना स॒म्राजा॒ नम॑से हि॒ता ॥७॥
adhi॒ yā bṛ॑ha॒to di॒vo॒३’bhi yū॒theva॒ paśya॑taḥ | ṛ॒tāvā॑nā sa॒mrājā॒ nama॑se hi॒tā || ७ ||
ऋ॒तावा॑ना॒ नि षे॑दतु॒: साम्रा॑ज्याय सु॒क्रतू॑ । धृ॒तव्र॑ता क्ष॒त्रिया॑ क्ष॒त्रमा॑शतुः ॥८॥
ṛ॒tāvā॑nā॒ ni ṣe॑datu॒: sāmrā॑jyāya su॒kratū॑ | dhṛ॒tavra॑tā kṣa॒triyā॑ kṣa॒tramā॑śatuḥ || ८ ||
अ॒क्ष्णश्चि॑द्गातु॒वित्त॑रानुल्ब॒णेन॒ चक्ष॑सा । नि चि॑न्मि॒षन्ता॑ निचि॒रा नि चि॑क्यतुः ॥९॥
a॒kṣṇaści॑dgātu॒vitta॑rānulba॒ṇena॒ cakṣa॑sā | ni ci॑nmi॒ṣantā॑ nici॒rā ni ci॑kyatuḥ || ९ ||
उ॒त नो॑ दे॒व्यदि॑तिरुरु॒ष्यतां॒ नास॑त्या । उ॒रु॒ष्यन्तु॑ म॒रुतो॑ वृ॒द्धश॑वसः ॥१०॥
u॒ta no॑ de॒vyadi॑tiruru॒ṣyatāṃ॒ nāsa॑tyā | u॒ru॒ṣyantu॑ ma॒ruto॑ vṛ॒ddhaśa॑vasaḥ || १० ||
ते नो॑ ना॒वमु॑रुष्यत॒ दिवा॒ नक्तं॑ सुदानवः । अरि॑ष्यन्तो॒ नि पा॒युभि॑: सचेमहि ॥११॥
te no॑ nā॒vamu॑ruṣyata॒ divā॒ naktaṃ॑ sudānavaḥ | ari॑ṣyanto॒ ni pā॒yubhi॑: sacemahi || ११ ||
अघ्न॑ते॒ विष्ण॑वे व॒यमरि॑ष्यन्तः सु॒दान॑वे । श्रु॒धि स्व॑यावन्त्सिन्धो पू॒र्वचि॑त्तये ॥१२॥
aghna॑te॒ viṣṇa॑ve va॒yamari॑ṣyantaḥ su॒dāna॑ve | śru॒dhi sva॑yāvantsindho pū॒rvaci॑ttaye || १२ ||
तद्वार्यं॑ वृणीमहे॒ वरि॑ष्ठं गोप॒यत्य॑म् । मि॒त्रो यत्पान्ति॒ वरु॑णो॒ यद॑र्य॒मा ॥१३॥
tadvāryaṃ॑ vṛṇīmahe॒ vari॑ṣṭhaṃ gopa॒yatya॑m | mi॒tro yatpānti॒ varu॑ṇo॒ yada॑rya॒mā || १३ ||
उ॒त न॒: सिन्धु॑र॒पां तन्म॒रुत॒स्तद॒श्विना॑ । इन्द्रो॒ विष्णु॑र्मी॒ढ्वांस॑: स॒जोष॑सः ॥१४॥
u॒ta na॒: sindhu॑ra॒pāṃ tanma॒ruta॒stada॒śvinā॑ | indro॒ viṣṇu॑rmī॒ḍhvāṃsa॑: sa॒joṣa॑saḥ || १४ ||
ते हि ष्मा॑ व॒नुषो॒ नरो॒ऽभिमा॑तिं॒ कय॑स्य चित् । ति॒ग्मं न क्षोद॑: प्रति॒घ्नन्ति॒ भूर्ण॑यः ॥१५॥
te hi ṣmā॑ va॒nuṣo॒ naro॒’bhimā॑tiṃ॒ kaya॑sya cit | ti॒gmaṃ na kṣoda॑: prati॒ghnanti॒ bhūrṇa॑yaḥ || १५ ||
अ॒यमेक॑ इ॒त्था पु॒रूरु च॑ष्टे॒ वि वि॒श्पति॑: । तस्य॑ व्र॒तान्यनु॑ वश्चरामसि ॥१६
अनु॒ पूर्वा॑ण्यो॒क्या॑ साम्रा॒ज्यस्य॑ सश्चिम । मि॒त्रस्य॑ व्र॒ता वरु॑णस्य दीर्घ॒श्रुत् ॥१७॥
a॒yameka॑ i॒tthā pu॒rūru ca॑ṣṭe॒ vi vi॒śpati॑: | tasya॑ vra॒tānyanu॑ vaścarāmasi || १६ anu॒ pūrvā॑ṇyo॒kyā॑ sāmrā॒jyasya॑ saścima | mi॒trasya॑ vra॒tā varu॑ṇasya dīrgha॒śrut || १७ ||
परि॒ यो र॒श्मिना॑ दि॒वोऽन्ता॑न्म॒मे पृ॑थि॒व्याः । उ॒भे आ प॑प्रौ॒ रोद॑सी महि॒त्वा ॥१८॥
pari॒ yo ra॒śminā॑ di॒vo’ntā॑nma॒me pṛ॑thi॒vyāḥ | u॒bhe ā pa॑prau॒ roda॑sī mahi॒tvā || १८ ||
उदु॒ ष्य श॑र॒णे दि॒वो ज्योति॑रयंस्त॒ सूर्य॑: । अ॒ग्निर्न शु॒क्रः स॑मिधा॒न आहु॑तः ॥१९॥
udu॒ ṣya śa॑ra॒ṇe di॒vo jyoti॑rayaṃsta॒ sūrya॑: | a॒gnirna śu॒kraḥ sa॑midhā॒na āhu॑taḥ || १९ ||
वचो॑ दी॒र्घप्र॑सद्म॒नीशे॒ वाज॑स्य॒ गोम॑तः । ईशे॒ हि पि॒त्वो॑ऽवि॒षस्य॑ दा॒वने॑ ॥२०॥
vaco॑ dī॒rghapra॑sadma॒nīśe॒ vāja॑sya॒ goma॑taḥ | īśe॒ hi pi॒tvo॑’vi॒ṣasya॑ dā॒vane॑ || २० ||
तत्सूर्यं॒ रोद॑सी उ॒भे दो॒षा वस्तो॒रुप॑ ब्रुवे । भो॒जेष्व॒स्माँ अ॒भ्युच्च॑रा॒ सदा॑ ॥२१॥
tatsūryaṃ॒ roda॑sī u॒bhe do॒ṣā vasto॒rupa॑ bruve | bho॒jeṣva॒smām̐ a॒bhyucca॑rā॒ sadā॑ || २१ ||
ऋ॒ज्रमु॑क्ष॒ण्याय॑ने रज॒तं हर॑याणे । रथं॑ यु॒क्तम॑सनाम सु॒षाम॑णि ॥२२॥
ṛ॒jramu॑kṣa॒ṇyāya॑ne raja॒taṃ hara॑yāṇe | rathaṃ॑ yu॒ktama॑sanāma su॒ṣāma॑ṇi || २२ ||
ता मे॒ अश्व्या॑नां॒ हरी॑णां नि॒तोश॑ना । उ॒तो नु कृत्व्या॑नां नृ॒वाह॑सा ॥२३॥
tā me॒ aśvyā॑nāṃ॒ harī॑ṇāṃ ni॒tośa॑nā | u॒to nu kṛtvyā॑nāṃ nṛ॒vāha॑sā || २३ ||
स्मद॑भीशू॒ कशा॑वन्ता॒ विप्रा॒ नवि॑ष्ठया म॒ती । म॒हो वा॒जिना॒वर्व॑न्ता॒ सचा॑सनम् ॥२४॥
smada॑bhīśū॒ kaśā॑vantā॒ viprā॒ navi॑ṣṭhayā ma॒tī | ma॒ho vā॒jinā॒varva॑ntā॒ sacā॑sanam || २४ ||