EeseDharmaSanātana Library
638मण्डल 8 · सूक्त 18
22 shlokइ॒दं ह॑ नू॒नमे॑षां सु॒म्नं भि॑क्षेत॒ मर्त्य॑: । आ॒दि॒त्याना॒मपू॑र्व्यं॒ सवी॑मनि ॥१॥
i॒daṃ ha॑ nū॒name॑ṣāṃ su॒mnaṃ bhi॑kṣeta॒ martya॑: | ā॒di॒tyānā॒mapū॑rvyaṃ॒ savī॑mani || १ ||
अ॒न॒र्वाणो॒ ह्ये॑षां॒ पन्था॑ आदि॒त्याना॑म् । अद॑ब्धा॒: सन्ति॑ पा॒यव॑: सुगे॒वृध॑: ॥२॥
a॒na॒rvāṇo॒ hye॑ṣāṃ॒ panthā॑ ādi॒tyānā॑m | ada॑bdhā॒: santi॑ pā॒yava॑: suge॒vṛdha॑: || २ ||
तत्सु न॑: सवि॒ता भगो॒ वरु॑णो मि॒त्रो अ॑र्य॒मा । शर्म॑ यच्छन्तु स॒प्रथो॒ यदीम॑हे ॥३॥
tatsu na॑: savi॒tā bhago॒ varu॑ṇo mi॒tro a॑rya॒mā | śarma॑ yacchantu sa॒pratho॒ yadīma॑he || ३ ||
दे॒वेभि॑र्देव्यदि॒तेऽरि॑ष्टभर्म॒न्ना ग॑हि । स्मत्सू॒रिभि॑: पुरुप्रिये सु॒शर्म॑भिः ॥४॥
de॒vebhi॑rdevyadi॒te’ri॑ṣṭabharma॒nnā ga॑hi | smatsū॒ribhi॑: purupriye su॒śarma॑bhiḥ || ४ ||
ते हि पु॒त्रासो॒ अदि॑तेर्वि॒दुर्द्वेषां॑सि॒ योत॑वे । अं॒होश्चि॑दुरु॒चक्र॑योऽने॒हस॑: ॥५॥
te hi pu॒trāso॒ adi॑tervi॒durdveṣāṃ॑si॒ yota॑ve | aṃ॒hości॑duru॒cakra॑yo’ne॒hasa॑: || ५ ||
अदि॑तिर्नो॒ दिवा॑ प॒शुमदि॑ति॒र्नक्त॒मद्व॑याः । अदि॑तिः पा॒त्वंह॑सः स॒दावृ॑धा ॥६॥
adi॑tirno॒ divā॑ pa॒śumadi॑ti॒rnakta॒madva॑yāḥ | adi॑tiḥ pā॒tvaṃha॑saḥ sa॒dāvṛ॑dhā || ६ ||
उ॒त स्या नो॒ दिवा॑ म॒तिरदि॑तिरू॒त्या ग॑मत् । सा शंता॑ति॒ मय॑स्कर॒दप॒ स्रिध॑: ॥७॥
u॒ta syā no॒ divā॑ ma॒tiradi॑tirū॒tyā ga॑mat | sā śaṃtā॑ti॒ maya॑skara॒dapa॒ sridha॑: || ७ ||
उ॒त त्या दैव्या॑ भि॒षजा॒ शं न॑: करतो अ॒श्विना॑ । यु॒यु॒याता॑मि॒तो रपो॒ अप॒ स्रिध॑: ॥८॥
u॒ta tyā daivyā॑ bhi॒ṣajā॒ śaṃ na॑: karato a॒śvinā॑ | yu॒yu॒yātā॑mi॒to rapo॒ apa॒ sridha॑: || ८ ||
शम॒ग्निर॒ग्निभि॑: कर॒च्छं न॑स्तपतु॒ सूर्य॑: । शं वातो॑ वात्वर॒पा अप॒ स्रिध॑: ॥९॥
śama॒gnira॒gnibhi॑: kara॒cchaṃ na॑stapatu॒ sūrya॑: | śaṃ vāto॑ vātvara॒pā apa॒ sridha॑: || ९ ||
अपामी॑वा॒मप॒ स्रिध॒मप॑ सेधत दुर्म॒तिम् । आदि॑त्यासो यु॒योत॑ना नो॒ अंह॑सः ॥१०॥
apāmī॑vā॒mapa॒ sridha॒mapa॑ sedhata durma॒tim | ādi॑tyāso yu॒yota॑nā no॒ aṃha॑saḥ || १० ||
यु॒योता॒ शरु॑म॒स्मदाँ आदि॑त्यास उ॒ताम॑तिम् । ऋध॒ग्द्वेष॑: कृणुत विश्ववेदसः ॥११॥
yu॒yotā॒ śaru॑ma॒smadām̐ ādi॑tyāsa u॒tāma॑tim | ṛdha॒gdveṣa॑: kṛṇuta viśvavedasaḥ || ११ ||
तत्सु न॒: शर्म॑ यच्छ॒ताऽऽदि॑त्या॒ यन्मुमो॑चति । एन॑स्वन्तं चि॒देन॑सः सुदानवः ॥१२॥
tatsu na॒: śarma॑ yaccha॒tā’’di॑tyā॒ yanmumo॑cati | ena॑svantaṃ ci॒dena॑saḥ sudānavaḥ || १२ ||
यो न॒: कश्चि॒द्रिरि॑क्षति रक्ष॒स्त्वेन॒ मर्त्य॑: । स्वैः ष एवै॑ रिरिषीष्ट॒ युर्जन॑: ॥१३॥
yo na॒: kaści॒driri॑kṣati rakṣa॒stvena॒ martya॑: | svaiḥ ṣa evai॑ ririṣīṣṭa॒ yurjana॑: || १३ ||
समित्तम॒घम॑श्नवद्दु॒:शंसं॒ मर्त्यं॑ रि॒पुम् । यो अ॑स्म॒त्रा दु॒र्हणा॑वाँ॒ उप॑ द्व॒युः ॥१४॥
samittama॒ghama॑śnavaddu॒:śaṃsaṃ॒ martyaṃ॑ ri॒pum | yo a॑sma॒trā du॒rhaṇā॑vām॒̐ upa॑ dva॒yuḥ || १४ ||
पा॒क॒त्रा स्थ॑न देवा हृ॒त्सु जा॑नीथ॒ मर्त्य॑म् । उप॑ द्व॒युं चाद्व॑युं च वसवः ॥१५॥
pā॒ka॒trā stha॑na devā hṛ॒tsu jā॑nītha॒ martya॑m | upa॑ dva॒yuṃ cādva॑yuṃ ca vasavaḥ || १५ ||
आ शर्म॒ पर्व॑ताना॒मोतापां वृ॑णीमहे । द्यावा॑क्षामा॒रे अ॒स्मद्रप॑स्कृतम् ॥१६॥
ā śarma॒ parva॑tānā॒motāpāṃ vṛ॑ṇīmahe | dyāvā॑kṣāmā॒re a॒smadrapa॑skṛtam || १६ ||
ते नो॑ भ॒द्रेण॒ शर्म॑णा यु॒ष्माकं॑ ना॒वा व॑सवः । अति॒ विश्वा॑नि दुरि॒ता पि॑पर्तन ॥१७॥
te no॑ bha॒dreṇa॒ śarma॑ṇā yu॒ṣmākaṃ॑ nā॒vā va॑savaḥ | ati॒ viśvā॑ni duri॒tā pi॑partana || १७ ||
तु॒चे तना॑य॒ तत्सु नो॒ द्राघी॑य॒ आयु॑र्जी॒वसे॑ । आदि॑त्यासः सुमहसः कृ॒णोत॑न ॥१८॥
tu॒ce tanā॑ya॒ tatsu no॒ drāghī॑ya॒ āyu॑rjī॒vase॑ | ādi॑tyāsaḥ sumahasaḥ kṛ॒ṇota॑na || १८ ||
य॒ज्ञो ही॒ळो वो॒ अन्त॑र॒ आदि॑त्या॒ अस्ति॑ मृ॒ळत॑ । यु॒ष्मे इद्वो॒ अपि॑ ष्मसि सजा॒त्ये॑ ॥१९॥
ya॒jño hī॒ḷo vo॒ anta॑ra॒ ādi॑tyā॒ asti॑ mṛ॒ḷata॑ | yu॒ṣme idvo॒ api॑ ṣmasi sajā॒tye॑ || १९ ||
बृ॒हद्वरू॑थं म॒रुतां॑ दे॒वं त्रा॒तार॑म॒श्विना॑ । मि॒त्रमी॑महे॒ वरु॑णं स्व॒स्तये॑ ॥२०॥
bṛ॒hadvarū॑thaṃ ma॒rutāṃ॑ de॒vaṃ trā॒tāra॑ma॒śvinā॑ | mi॒tramī॑mahe॒ varu॑ṇaṃ sva॒staye॑ || २० ||
अ॒ने॒हो मि॑त्रार्यमन्नृ॒वद्व॑रुण॒ शंस्य॑म् । त्रि॒वरू॑थं मरुतो यन्त नश्छ॒र्दिः ॥२१॥
a॒ne॒ho mi॑trāryamannṛ॒vadva॑ruṇa॒ śaṃsya॑m | tri॒varū॑thaṃ maruto yanta naścha॒rdiḥ || २१ ||
ये चि॒द्धि मृ॒त्युब॑न्धव॒ आदि॑त्या॒ मन॑व॒: स्मसि॑ । प्र सू न॒ आयु॑र्जी॒वसे॑ तिरेतन ॥२२॥
ye ci॒ddhi mṛ॒tyuba॑ndhava॒ ādi॑tyā॒ mana॑va॒: smasi॑ | pra sū na॒ āyu॑rjī॒vase॑ tiretana || २२ ||