EeseDharmaSanātana Library
634मण्डल 8 · सूक्त 14
15 shlokयदि॑न्द्रा॒हं यथा॒ त्वमीशी॑य॒ वस्व॒ एक॒ इत् । स्तो॒ता मे॒ गोष॑खा स्यात् ॥१॥
yadi॑ndrā॒haṃ yathā॒ tvamīśī॑ya॒ vasva॒ eka॒ it | sto॒tā me॒ goṣa॑khā syāt || १ ||
शिक्षे॑यमस्मै॒ दित्से॑यं॒ शची॑पते मनी॒षिणे॑ । यद॒हं गोप॑ति॒: स्याम् ॥२॥
śikṣe॑yamasmai॒ ditse॑yaṃ॒ śacī॑pate manī॒ṣiṇe॑ | yada॒haṃ gopa॑ti॒: syām || २ ||
धे॒नुष्ट॑ इन्द्र सू॒नृता॒ यज॑मानाय सुन्व॒ते । गामश्वं॑ पि॒प्युषी॑ दुहे ॥३॥
dhe॒nuṣṭa॑ indra sū॒nṛtā॒ yaja॑mānāya sunva॒te | gāmaśvaṃ॑ pi॒pyuṣī॑ duhe || ३ ||
न ते॑ व॒र्तास्ति॒ राध॑स॒ इन्द्र॑ दे॒वो न मर्त्य॑: । यद्दित्स॑सि स्तु॒तो म॒घम् ॥४॥
na te॑ va॒rtāsti॒ rādha॑sa॒ indra॑ de॒vo na martya॑: | yadditsa॑si stu॒to ma॒gham || ४ ||
य॒ज्ञ इन्द्र॑मवर्धय॒द्यद्भूमिं॒ व्यव॑र्तयत् । च॒क्रा॒ण ओ॑प॒शं दि॒वि ॥५॥
ya॒jña indra॑mavardhaya॒dyadbhūmiṃ॒ vyava॑rtayat | ca॒krā॒ṇa o॑pa॒śaṃ di॒vi || ५ ||
वा॒वृ॒धा॒नस्य॑ ते व॒यं विश्वा॒ धना॑नि जि॒ग्युष॑: । ऊ॒तिमि॒न्द्रा वृ॑णीमहे ॥६॥
vā॒vṛ॒dhā॒nasya॑ te va॒yaṃ viśvā॒ dhanā॑ni ji॒gyuṣa॑: | ū॒timi॒ndrā vṛ॑ṇīmahe || ६ ||
व्य१न्तरि॑क्षमतिर॒न्मदे॒ सोम॑स्य रोच॒ना । इन्द्रो॒ यदभि॑नद्व॒लम् ॥७॥
vya१ntari॑kṣamatira॒nmade॒ soma॑sya roca॒nā | indro॒ yadabhi॑nadva॒lam || ७ ||
उद्गा आ॑ज॒दङ्गि॑रोभ्य आ॒विष्कृ॒ण्वन्गुहा॑ स॒तीः । अ॒र्वाञ्चं॑ नुनुदे व॒लम् ॥८॥
udgā ā॑ja॒daṅgi॑robhya ā॒viṣkṛ॒ṇvanguhā॑ sa॒tīḥ | a॒rvāñcaṃ॑ nunude va॒lam || ८ ||
इन्द्रे॑ण रोच॒ना दि॒वो दृ॒ळ्हानि॑ दृंहि॒तानि॑ च । स्थि॒राणि॒ न प॑रा॒णुदे॑ ॥९॥
indre॑ṇa roca॒nā di॒vo dṛ॒ḷhāni॑ dṛṃhi॒tāni॑ ca | sthi॒rāṇi॒ na pa॑rā॒ṇude॑ || ९ ||
अ॒पामू॒र्मिर्मद॑न्निव॒ स्तोम॑ इन्द्राजिरायते । वि ते॒ मदा॑ अराजिषुः ॥१०॥
a॒pāmū॒rmirmada॑nniva॒ stoma॑ indrājirāyate | vi te॒ madā॑ arājiṣuḥ || १० ||
त्वं हि स्तो॑म॒वर्ध॑न॒ इन्द्रास्यु॑क्थ॒वर्ध॑नः । स्तो॒तॄ॒णामु॒त भ॑द्र॒कृत् ॥११॥
tvaṃ hi sto॑ma॒vardha॑na॒ indrāsyu॑ktha॒vardha॑naḥ | sto॒tṝ॒ṇāmu॒ta bha॑dra॒kṛt || ११ ||
इन्द्र॒मित्के॒शिना॒ हरी॑ सोम॒पेया॑य वक्षतः । उप॑ य॒ज्ञं सु॒राध॑सम् ॥१२॥
indra॒mitke॒śinā॒ harī॑ soma॒peyā॑ya vakṣataḥ | upa॑ ya॒jñaṃ su॒rādha॑sam || १२ ||
अ॒पां फेने॑न॒ नमु॑चे॒: शिर॑ इ॒न्द्रोद॑वर्तयः । विश्वा॒ यदज॑य॒: स्पृध॑: ॥१३॥
a॒pāṃ phene॑na॒ namu॑ce॒: śira॑ i॒ndroda॑vartayaḥ | viśvā॒ yadaja॑ya॒: spṛdha॑: || १३ ||
मा॒याभि॑रु॒त्सिसृ॑प्सत॒ इन्द्र॒ द्यामा॒रुरु॑क्षतः । अव॒ दस्यूँ॑रधूनुथाः ॥१४॥
mā॒yābhi॑ru॒tsisṛ॑psata॒ indra॒ dyāmā॒ruru॑kṣataḥ | ava॒ dasyūm̐॑radhūnuthāḥ || १४ ||
अ॒सु॒न्वामि॑न्द्र सं॒सदं॒ विषू॑चीं॒ व्य॑नाशयः । सो॒म॒पा उत्त॑रो॒ भव॑न् ॥१५॥
a॒su॒nvāmi॑ndra saṃ॒sadaṃ॒ viṣū॑cīṃ॒ vya॑nāśayaḥ | so॒ma॒pā utta॑ro॒ bhava॑n || १५ ||