EeseDharmaSanātana Library
723मण्डल 8 · सूक्त 103
14 shlokअद॑र्शि गातु॒वित्त॑मो॒ यस्मि॑न्व्र॒तान्या॑द॒धुः । उपो॒ षु जा॒तमार्य॑स्य॒ वर्ध॑नम॒ग्निं न॑क्षन्त नो॒ गिर॑: ॥१॥
ada॑rśi gātu॒vitta॑mo॒ yasmi॑nvra॒tānyā॑da॒dhuḥ | upo॒ ṣu jā॒tamārya॑sya॒ vardha॑nama॒gniṃ na॑kṣanta no॒ gira॑: || १ ||
प्र दैवो॑दासो अ॒ग्निर्दे॒वाँ अच्छा॒ न म॒ज्मना॑ । अनु॑ मा॒तरं॑ पृथि॒वीं वि वा॑वृते त॒स्थौ नाक॑स्य॒ सान॑वि ॥२॥
pra daivo॑dāso a॒gnirde॒vām̐ acchā॒ na ma॒jmanā॑ | anu॑ mā॒taraṃ॑ pṛthi॒vīṃ vi vā॑vṛte ta॒sthau nāka॑sya॒ sāna॑vi || २ ||
यस्मा॒द्रेज॑न्त कृ॒ष्टय॑श्च॒र्कृत्या॑नि कृण्व॒तः । स॒ह॒स्र॒सां मे॒धसा॑ताविव॒ त्मना॒ऽग्निं धी॒भिः स॑पर्यत ॥३॥
yasmā॒dreja॑nta kṛ॒ṣṭaya॑śca॒rkṛtyā॑ni kṛṇva॒taḥ | sa॒ha॒sra॒sāṃ me॒dhasā॑tāviva॒ tmanā॒’gniṃ dhī॒bhiḥ sa॑paryata || ३ ||
प्र यं रा॒ये निनी॑षसि॒ मर्तो॒ यस्ते॑ वसो॒ दाश॑त् । स वी॒रं ध॑त्ते अग्न उक्थशं॒सिनं॒ त्मना॑ सहस्रपो॒षिण॑म् ॥४॥
pra yaṃ rā॒ye ninī॑ṣasi॒ marto॒ yaste॑ vaso॒ dāśa॑t | sa vī॒raṃ dha॑tte agna ukthaśaṃ॒sinaṃ॒ tmanā॑ sahasrapo॒ṣiṇa॑m || ४ ||
स दृ॒ळ्हे चि॑द॒भि तृ॑णत्ति॒ वाज॒मर्व॑ता॒ स ध॑त्ते॒ अक्षि॑ति॒ श्रव॑: ।
त्वे दे॑व॒त्रा सदा॑ पुरूवसो॒ विश्वा॑ वा॒मानि॑ धीमहि ॥५॥
sa dṛ॒ḷhe ci॑da॒bhi tṛ॑ṇatti॒ vāja॒marva॑tā॒ sa dha॑tte॒ akṣi॑ti॒ śrava॑: | tve de॑va॒trā sadā॑ purūvaso॒ viśvā॑ vā॒māni॑ dhīmahi || ५ ||
यो विश्वा॒ दय॑ते॒ वसु॒ होता॑ म॒न्द्रो जना॑नाम् । मधो॒र्न पात्रा॑ प्रथ॒मान्य॑स्मै॒ प्र स्तोमा॑ यन्त्य॒ग्नये॑ ॥६॥
yo viśvā॒ daya॑te॒ vasu॒ hotā॑ ma॒ndro janā॑nām | madho॒rna pātrā॑ pratha॒mānya॑smai॒ pra stomā॑ yantya॒gnaye॑ || ६ ||
अश्वं॒ न गी॒र्भी र॒थ्यं॑ सु॒दान॑वो मर्मृ॒ज्यन्ते॑ देव॒यव॑: । उ॒भे तो॒के तन॑ये दस्म विश्पते॒ पर्षि॒ राधो॑ म॒घोना॑म् ॥७॥
aśvaṃ॒ na gī॒rbhī ra॒thyaṃ॑ su॒dāna॑vo marmṛ॒jyante॑ deva॒yava॑: | u॒bhe to॒ke tana॑ye dasma viśpate॒ parṣi॒ rādho॑ ma॒ghonā॑m || ७ ||
प्र मंहि॑ष्ठाय गायत ऋ॒ताव्ने॑ बृह॒ते शु॒क्रशो॑चिषे । उप॑स्तुतासो अ॒ग्नये॑ ॥८॥
pra maṃhi॑ṣṭhāya gāyata ṛ॒tāvne॑ bṛha॒te śu॒kraśo॑ciṣe | upa॑stutāso a॒gnaye॑ || ८ ||
आ वं॑सते म॒घवा॑ वी॒रव॒द्यश॒: समि॑द्धो द्यु॒म्न्याहु॑तः । कु॒विन्नो॑ अस्य सुम॒तिर्नवी॑य॒स्यच्छा॒ वाजे॑भिरा॒गम॑त् ॥९॥
ā vaṃ॑sate ma॒ghavā॑ vī॒rava॒dyaśa॒: sami॑ddho dyu॒mnyāhu॑taḥ | ku॒vinno॑ asya suma॒tirnavī॑ya॒syacchā॒ vāje॑bhirā॒gama॑t || ९ ||
प्रेष्ठ॑मु प्रि॒याणां॑ स्तु॒ह्या॑सा॒वाति॑थिम् । अ॒ग्निं रथा॑नां॒ यम॑म् ॥१०॥
preṣṭha॑mu pri॒yāṇāṃ॑ stu॒hyā॑sā॒vāti॑thim | a॒gniṃ rathā॑nāṃ॒ yama॑m || १० ||
उदि॑ता॒ यो निदि॑ता॒ वेदि॑ता॒ वस्वा य॒ज्ञियो॑ व॒वर्त॑ति । दु॒ष्टरा॒ यस्य॑ प्रव॒णे नोर्मयो॑ धि॒या वाज॒ सिषा॑सतः ॥११॥
udi॑tā॒ yo nidi॑tā॒ vedi॑tā॒ vasvā ya॒jñiyo॑ va॒varta॑ti | du॒ṣṭarā॒ yasya॑ prava॒ṇe normayo॑ dhi॒yā vāja॒ siṣā॑sataḥ || ११ ||
मा नो॑ हृणीता॒मति॑थि॒र्वसु॑र॒ग्निः पु॑रुप्रश॒स्त ए॒षः । यः सु॒होता॑ स्वध्व॒रः ॥१२॥
mā no॑ hṛṇītā॒mati॑thi॒rvasu॑ra॒gniḥ pu॑rupraśa॒sta e॒ṣaḥ | yaḥ su॒hotā॑ svadhva॒raḥ || १२ ||
मो ते रि॑ष॒न्ये अच्छो॑क्तिभिर्व॒सोऽग्ने॒ केभि॑श्चि॒देवै॑: । की॒रिश्चि॒द्धि त्वामीट्टे॑ दू॒त्या॑य रा॒तह॑व्यः स्वध्व॒रः ॥१३॥
mo te ri॑ṣa॒nye accho॑ktibhirva॒so’gne॒ kebhi॑ści॒devai॑: | kī॒riści॒ddhi tvāmīṭṭe॑ dū॒tyā॑ya rā॒taha॑vyaḥ svadhva॒raḥ || १३ ||
आग्ने॑ याहि म॒रुत्स॑खा रु॒द्रेभि॒: सोम॑पीतये । सोभ॑र्या॒ उप॑ सुष्टु॒तिं मा॒दय॑स्व॒ स्व॑र्णरे ॥१४॥
āgne॑ yāhi ma॒rutsa॑khā ru॒drebhi॒: soma॑pītaye | sobha॑ryā॒ upa॑ suṣṭu॒tiṃ mā॒daya॑sva॒ sva॑rṇare || १४ ||