EeseDharmaSanātana Library
722मण्डल 8 · सूक्त 102
22 shlokत्वम॑ग्ने बृ॒हद्वयो॒ दधा॑सि देव दा॒शुषे॑ । क॒विर्गृ॒हप॑ति॒र्युवा॑ ॥१॥
tvama॑gne bṛ॒hadvayo॒ dadhā॑si deva dā॒śuṣe॑ | ka॒virgṛ॒hapa॑ti॒ryuvā॑ || १ ||
स न॒ ईळा॑नया स॒ह दे॒वाँ अ॑ग्ने दुव॒स्युवा॑ । चि॒किद्वि॑भान॒वा व॑ह ॥२॥
sa na॒ īḷā॑nayā sa॒ha de॒vām̐ a॑gne duva॒syuvā॑ | ci॒kidvi॑bhāna॒vā va॑ha || २ ||
त्वया॑ ह स्विद्यु॒जा व॒यं चोदि॑ष्ठेन यविष्ठ्य । अ॒भि ष्मो॒ वाज॑सातये ॥३॥
tvayā॑ ha svidyu॒jā va॒yaṃ codi॑ṣṭhena yaviṣṭhya | a॒bhi ṣmo॒ vāja॑sātaye || ३ ||
औ॒र्व॒भृ॒गु॒वच्छुचि॑मप्नवान॒वदा हु॑वे । अ॒ग्निं स॑मु॒द्रवा॑ससम् ॥४॥
au॒rva॒bhṛ॒gu॒vacchuci॑mapnavāna॒vadā hu॑ve | a॒gniṃ sa॑mu॒dravā॑sasam || ४ ||
हु॒वे वात॑स्वनं क॒विं प॒र्जन्य॑क्रन्द्यं॒ सह॑: । अ॒ग्निं स॑मु॒द्रवा॑ससम् ॥५॥
hu॒ve vāta॑svanaṃ ka॒viṃ pa॒rjanya॑krandyaṃ॒ saha॑: | a॒gniṃ sa॑mu॒dravā॑sasam || ५ ||
आ स॒वं स॑वि॒तुर्य॑था॒ भग॑स्येव भु॒जिं हु॑वे । अ॒ग्निं स॑मु॒द्रवा॑ससम् ॥६॥
ā sa॒vaṃ sa॑vi॒turya॑thā॒ bhaga॑syeva bhu॒jiṃ hu॑ve | a॒gniṃ sa॑mu॒dravā॑sasam || ६ ||
अ॒ग्निं वो॑ वृ॒धन्त॑मध्व॒राणां॑ पुरू॒तम॑म् । अच्छा॒ नप्त्रे॒ सह॑स्वते ॥७॥
a॒gniṃ vo॑ vṛ॒dhanta॑madhva॒rāṇāṃ॑ purū॒tama॑m | acchā॒ naptre॒ saha॑svate || ७ ||
अ॒यं यथा॑ न आ॒भुव॒त्त्वष्टा॑ रू॒पेव॒ तक्ष्या॑ । अ॒स्य क्रत्वा॒ यश॑स्वतः ॥८॥
a॒yaṃ yathā॑ na ā॒bhuva॒ttvaṣṭā॑ rū॒peva॒ takṣyā॑ | a॒sya kratvā॒ yaśa॑svataḥ || ८ ||
अ॒यं विश्वा॑ अ॒भि श्रियो॒ऽग्निर्दे॒वेषु॑ पत्यते । आ वाजै॒रुप॑ नो गमत् ॥९॥
a॒yaṃ viśvā॑ a॒bhi śriyo॒’gnirde॒veṣu॑ patyate | ā vājai॒rupa॑ no gamat || ९ ||
विश्वे॑षामि॒ह स्तु॑हि॒ होतॄ॑णां य॒शस्त॑मम् । अ॒ग्निं य॒ज्ञेषु॑ पू॒र्व्यम् ॥१०॥
viśve॑ṣāmi॒ha stu॑hi॒ hotṝ॑ṇāṃ ya॒śasta॑mam | a॒gniṃ ya॒jñeṣu॑ pū॒rvyam || १० ||
शी॒रं पा॑व॒कशो॑चिषं॒ ज्येष्ठो॒ यो दमे॒ष्वा । दी॒दाय॑ दीर्घ॒श्रुत्त॑मः ॥११॥
śī॒raṃ pā॑va॒kaśo॑ciṣaṃ॒ jyeṣṭho॒ yo dame॒ṣvā | dī॒dāya॑ dīrgha॒śrutta॑maḥ || ११ ||
तमर्व॑न्तं॒ न सा॑न॒सिं गृ॑णी॒हि वि॑प्र शु॒ष्मिण॑म् । मि॒त्रं न या॑त॒यज्ज॑नम् ॥१२॥
tamarva॑ntaṃ॒ na sā॑na॒siṃ gṛ॑ṇī॒hi vi॑pra śu॒ṣmiṇa॑m | mi॒traṃ na yā॑ta॒yajja॑nam || १२ ||
उप॑ त्वा जा॒मयो॒ गिरो॒ देदि॑शतीर्हवि॒ष्कृत॑: । वा॒योरनी॑के अस्थिरन् ॥१३॥
upa॑ tvā jā॒mayo॒ giro॒ dedi॑śatīrhavi॒ṣkṛta॑: | vā॒yoranī॑ke asthiran || १३ ||
यस्य॑ त्रि॒धात्ववृ॑तं ब॒र्हिस्त॒स्थावसं॑दिनम् । आप॑श्चि॒न्नि द॑धा प॒दम् ॥१४॥
yasya॑ tri॒dhātvavṛ॑taṃ ba॒rhista॒sthāvasaṃ॑dinam | āpa॑ści॒nni da॑dhā pa॒dam || १४ ||
प॒दं दे॒वस्य॑ मी॒ळ्हुषोऽना॑धृष्टाभिरू॒तिभि॑: । भ॒द्रा सूर्य॑ इवोप॒दृक् ॥१५॥
pa॒daṃ de॒vasya॑ mī॒ḷhuṣo’nā॑dhṛṣṭābhirū॒tibhi॑: | bha॒drā sūrya॑ ivopa॒dṛk || १५ ||
अग्ने॑ घृ॒तस्य॑ धी॒तिभि॑स्तेपा॒नो दे॑व शो॒चिषा॑ । आ दे॒वान्व॑क्षि॒ यक्षि॑ च ॥१६॥
agne॑ ghṛ॒tasya॑ dhī॒tibhi॑stepā॒no de॑va śo॒ciṣā॑ | ā de॒vānva॑kṣi॒ yakṣi॑ ca || १६ ||
तं त्वा॑जनन्त मा॒तर॑: क॒विं दे॒वासो॑ अङ्गिरः । ह॒व्य॒वाह॒मम॑र्त्यम् ॥१७॥
taṃ tvā॑jananta mā॒tara॑: ka॒viṃ de॒vāso॑ aṅgiraḥ | ha॒vya॒vāha॒mama॑rtyam || १७ ||
प्रचे॑तसं त्वा क॒वेऽग्ने॑ दू॒तं वरे॑ण्यम् । ह॒व्य॒वाहं॒ नि षे॑दिरे ॥१८॥
prace॑tasaṃ tvā ka॒ve’gne॑ dū॒taṃ vare॑ṇyam | ha॒vya॒vāhaṃ॒ ni ṣe॑dire || १८ ||
न॒हि मे॒ अस्त्यघ्न्या॒ न स्वधि॑ति॒र्वन॑न्वति । अथै॑ता॒दृग्भ॑रामि ते ॥१९॥
na॒hi me॒ astyaghnyā॒ na svadhi॑ti॒rvana॑nvati | athai॑tā॒dṛgbha॑rāmi te || १९ ||
यद॑ग्ने॒ कानि॒ कानि॑ चि॒दा ते॒ दारू॑णि द॒ध्मसि॑ । ता जु॑षस्व यविष्ठ्य ॥२०॥
yada॑gne॒ kāni॒ kāni॑ ci॒dā te॒ dārū॑ṇi da॒dhmasi॑ | tā ju॑ṣasva yaviṣṭhya || २० ||
यदत्त्यु॑प॒जिह्वि॑का॒ यद्व॒म्रो अ॑ति॒सर्प॑ति । सर्वं॒ तद॑स्तु ते घृ॒तम् ॥२१॥
yadattyu॑pa॒jihvi॑kā॒ yadva॒mro a॑ti॒sarpa॑ti | sarvaṃ॒ tada॑stu te ghṛ॒tam || २१ ||
अ॒ग्निमिन्धा॑नो॒ मन॑सा॒ धियं॑ सचेत॒ मर्त्य॑: । अ॒ग्निमी॑धे वि॒वस्व॑भिः ॥२२॥
a॒gnimindhā॑no॒ mana॑sā॒ dhiyaṃ॑ saceta॒ martya॑: | a॒gnimī॑dhe vi॒vasva॑bhiḥ || २२ ||