EeseDharmaSanātana Library
614मण्डल 7 · सूक्त 98
7 shlokअध्व॑र्यवोऽरु॒णं दु॒ग्धमं॒शुं जु॒होत॑न वृष॒भाय॑ क्षिती॒नाम् ।
गौ॒राद्वेदी॑याँ अव॒पान॒मिन्द्रो॑ वि॒श्वाहेद्या॑ति सु॒तसो॑ममि॒च्छन् ॥१॥
adhva॑ryavo’ru॒ṇaṃ du॒gdhamaṃ॒śuṃ ju॒hota॑na vṛṣa॒bhāya॑ kṣitī॒nām | gau॒rādvedī॑yām̐ ava॒pāna॒mindro॑ vi॒śvāhedyā॑ti su॒taso॑mami॒cchan || १ ||
यद्द॑धि॒षे प्र॒दिवि॒ चार्वन्नं॑ दि॒वेदि॑वे पी॒तिमिद॑स्य वक्षि ।
उ॒त हृ॒दोत मन॑सा जुषा॒ण उ॒शन्नि॑न्द्र॒ प्रस्थि॑तान्पाहि॒ सोमा॑न् ॥२॥
yadda॑dhi॒ṣe pra॒divi॒ cārvannaṃ॑ di॒vedi॑ve pī॒timida॑sya vakṣi | u॒ta hṛ॒dota mana॑sā juṣā॒ṇa u॒śanni॑ndra॒ prasthi॑tānpāhi॒ somā॑n || २ ||
ज॒ज्ञा॒नः सोमं॒ सह॑से पपाथ॒ प्र ते॑ मा॒ता म॑हि॒मान॑मुवाच ।
एन्द्र॑ पप्राथो॒र्व१न्तरि॑क्षं यु॒धा दे॒वेभ्यो॒ वरि॑वश्चकर्थ ॥३॥
ja॒jñā॒naḥ somaṃ॒ saha॑se papātha॒ pra te॑ mā॒tā ma॑hi॒māna॑muvāca | endra॑ paprātho॒rva१ntari॑kṣaṃ yu॒dhā de॒vebhyo॒ vari॑vaścakartha || ३ ||
यद्यो॒धया॑ मह॒तो मन्य॑माना॒न्त्साक्षा॑म॒ तान्बा॒हुभि॒: शाश॑दानान् ।
यद्वा॒ नृभि॒र्वृत॑ इन्द्राभि॒युध्या॒स्तं त्वया॒जिं सौ॑श्रव॒सं ज॑येम ॥४॥
yadyo॒dhayā॑ maha॒to manya॑mānā॒ntsākṣā॑ma॒ tānbā॒hubhi॒: śāśa॑dānān | yadvā॒ nṛbhi॒rvṛta॑ indrābhi॒yudhyā॒staṃ tvayā॒jiṃ sau॑śrava॒saṃ ja॑yema || ४ ||
प्रेन्द्र॑स्य वोचं प्रथ॒मा कृ॒तानि॒ प्र नूत॑ना म॒घवा॒ या च॒कार॑ ।
य॒देददे॑वी॒रस॑हिष्ट मा॒या अथा॑भव॒त्केव॑ल॒: सोमो॑ अस्य ॥५॥
prendra॑sya vocaṃ pratha॒mā kṛ॒tāni॒ pra nūta॑nā ma॒ghavā॒ yā ca॒kāra॑ | ya॒dedade॑vī॒rasa॑hiṣṭa mā॒yā athā॑bhava॒tkeva॑la॒: somo॑ asya || ५ ||
तवे॒दं विश्व॑म॒भित॑: पश॒व्यं१ यत्पश्य॑सि॒ चक्ष॑सा॒ सूर्य॑स्य ।
गवा॑मसि॒ गोप॑ति॒रेक॑ इन्द्र भक्षी॒महि॑ ते॒ प्रय॑तस्य॒ वस्व॑: ॥६॥
tave॒daṃ viśva॑ma॒bhita॑: paśa॒vyaṃ१ yatpaśya॑si॒ cakṣa॑sā॒ sūrya॑sya | gavā॑masi॒ gopa॑ti॒reka॑ indra bhakṣī॒mahi॑ te॒ praya॑tasya॒ vasva॑: || ६ ||
बृह॑स्पते यु॒वमिन्द्र॑श्च॒ वस्वो॑ दि॒व्यस्ये॑शाथे उ॒त पार्थि॑वस्य ।
ध॒त्तं र॒यिं स्तु॑व॒ते की॒रये॑ चिद्यू॒यं पा॑त स्व॒स्तिभि॒: सदा॑ नः ॥७॥
bṛha॑spate yu॒vamindra॑śca॒ vasvo॑ di॒vyasye॑śāthe u॒ta pārthi॑vasya | dha॒ttaṃ ra॒yiṃ stu॑va॒te kī॒raye॑ cidyū॒yaṃ pā॑ta sva॒stibhi॒: sadā॑ naḥ || ७ ||