EeseDharmaSanātana Library
613मण्डल 7 · सूक्त 97
10 shlokय॒ज्ञे दि॒वो नृ॒षद॑ने पृथि॒व्या नरो॒ यत्र॑ देव॒यवो॒ मद॑न्ति ।
इन्द्रा॑य॒ यत्र॒ सव॑नानि सु॒न्वे गम॒न्मदा॑य प्रथ॒मं वय॑श्च ॥१॥
ya॒jñe di॒vo nṛ॒ṣada॑ne pṛthi॒vyā naro॒ yatra॑ deva॒yavo॒ mada॑nti | indrā॑ya॒ yatra॒ sava॑nāni su॒nve gama॒nmadā॑ya pratha॒maṃ vaya॑śca || १ ||
आ दैव्या॑ वृणीम॒हेऽवां॑सि॒ बृह॒स्पति॑र्नो मह॒ आ स॑खायः ।
यथा॒ भवे॑म मी॒ळ्हुषे॒ अना॑गा॒ यो नो॑ दा॒ता प॑रा॒वत॑: पि॒तेव॑ ॥२॥
ā daivyā॑ vṛṇīma॒he’vāṃ॑si॒ bṛha॒spati॑rno maha॒ ā sa॑khāyaḥ | yathā॒ bhave॑ma mī॒ḷhuṣe॒ anā॑gā॒ yo no॑ dā॒tā pa॑rā॒vata॑: pi॒teva॑ || २ ||
तमु॒ ज्येष्ठं॒ नम॑सा ह॒विर्भि॑: सु॒शेवं॒ ब्रह्म॑ण॒स्पतिं॑ गृणीषे ।
इन्द्रं॒ श्लोको॒ महि॒ दैव्य॑: सिषक्तु॒ यो ब्रह्म॑णो दे॒वकृ॑तस्य॒ राजा॑ ॥३॥
tamu॒ jyeṣṭhaṃ॒ nama॑sā ha॒virbhi॑: su॒śevaṃ॒ brahma॑ṇa॒spatiṃ॑ gṛṇīṣe | indraṃ॒ śloko॒ mahi॒ daivya॑: siṣaktu॒ yo brahma॑ṇo de॒vakṛ॑tasya॒ rājā॑ || ३ ||
स आ नो॒ योनिं॑ सदतु॒ प्रेष्ठो॒ बृह॒स्पति॑र्वि॒श्ववा॑रो॒ यो अस्ति॑ ।
कामो॑ रा॒यः सु॒वीर्य॑स्य॒ तं दा॒त्पर्ष॑न्नो॒ अति॑ स॒श्चतो॒ अरि॑ष्टान् ॥४॥
sa ā no॒ yoniṃ॑ sadatu॒ preṣṭho॒ bṛha॒spati॑rvi॒śvavā॑ro॒ yo asti॑ | kāmo॑ rā॒yaḥ su॒vīrya॑sya॒ taṃ dā॒tparṣa॑nno॒ ati॑ sa॒ścato॒ ari॑ṣṭān || ४ ||
तमा नो॑ अ॒र्कम॒मृता॑य॒ जुष्ट॑मि॒मे धा॑सुर॒मृता॑सः पुरा॒जाः ।
शुचि॑क्रन्दं यज॒तं प॒स्त्या॑नां॒ बृह॒स्पति॑मन॒र्वाणं॑ हुवेम ॥५॥
tamā no॑ a॒rkama॒mṛtā॑ya॒ juṣṭa॑mi॒me dhā॑sura॒mṛtā॑saḥ purā॒jāḥ | śuci॑krandaṃ yaja॒taṃ pa॒styā॑nāṃ॒ bṛha॒spati॑mana॒rvāṇaṃ॑ huvema || ५ ||
तं श॒ग्मासो॑ अरु॒षासो॒ अश्वा॒ बृह॒स्पतिं॑ सह॒वाहो॑ वहन्ति ।
सह॑श्चि॒द्यस्य॒ नील॑वत्स॒धस्थं॒ नभो॒ न रू॒पम॑रु॒षं वसा॑नाः ॥६॥
taṃ śa॒gmāso॑ aru॒ṣāso॒ aśvā॒ bṛha॒spatiṃ॑ saha॒vāho॑ vahanti | saha॑ści॒dyasya॒ nīla॑vatsa॒dhasthaṃ॒ nabho॒ na rū॒pama॑ru॒ṣaṃ vasā॑nāḥ || ६ ||
स हि शुचि॑: श॒तप॑त्र॒: स शु॒न्ध्युर्हिर॑ण्यवाशीरिषि॒रः स्व॒र्षाः ।
बृह॒स्पति॒: स स्वा॑वे॒श ऋ॒ष्वः पु॒रू सखि॑भ्य आसु॒तिं करि॑ष्ठः ॥७॥
sa hi śuci॑: śa॒tapa॑tra॒: sa śu॒ndhyurhira॑ṇyavāśīriṣi॒raḥ sva॒rṣāḥ | bṛha॒spati॒: sa svā॑ve॒śa ṛ॒ṣvaḥ pu॒rū sakhi॑bhya āsu॒tiṃ kari॑ṣṭhaḥ || ७ ||
दे॒वी दे॒वस्य॒ रोद॑सी॒ जनि॑त्री॒ बृह॒स्पतिं॑ वावृधतुर्महि॒त्वा ।
द॒क्षाय्या॑य दक्षता सखाय॒: कर॒द्ब्रह्म॑णे सु॒तरा॑ सुगा॒धा ॥८॥
de॒vī de॒vasya॒ roda॑sī॒ jani॑trī॒ bṛha॒spatiṃ॑ vāvṛdhaturmahi॒tvā | da॒kṣāyyā॑ya dakṣatā sakhāya॒: kara॒dbrahma॑ṇe su॒tarā॑ sugā॒dhā || ८ ||
इ॒यं वां॑ ब्रह्मणस्पते सुवृ॒क्तिर्ब्रह्मेन्द्रा॑य व॒ज्रिणे॑ अकारि ।
अ॒वि॒ष्टं धियो॑ जिगृ॒तं पुरं॑धीर्जज॒स्तम॒र्यो व॒नुषा॒मरा॑तीः ॥९॥
i॒yaṃ vāṃ॑ brahmaṇaspate suvṛ॒ktirbrahmendrā॑ya va॒jriṇe॑ akāri | a॒vi॒ṣṭaṃ dhiyo॑ jigṛ॒taṃ puraṃ॑dhīrjaja॒stama॒ryo va॒nuṣā॒marā॑tīḥ || ९ ||
बृह॑स्पते यु॒वमिन्द्र॑श्च॒ वस्वो॑ दि॒व्यस्ये॑शाथे उ॒त पार्थि॑वस्य ।
ध॒त्तं र॒यिं स्तु॑व॒ते की॒रये॑ चिद्यू॒यं पा॑त स्व॒स्तिभि॒: सदा॑ नः ॥१०॥
bṛha॑spate yu॒vamindra॑śca॒ vasvo॑ di॒vyasye॑śāthe u॒ta pārthi॑vasya | dha॒ttaṃ ra॒yiṃ stu॑va॒te kī॒raye॑ cidyū॒yaṃ pā॑ta sva॒stibhi॒: sadā॑ naḥ || १० ||