EeseDharmaSanātana Library
610मण्डल 7 · सूक्त 94
12 shlokइ॒यं वा॑म॒स्य मन्म॑न॒ इन्द्रा॑ग्नी पू॒र्व्यस्तु॑तिः । अ॒भ्राद्वृ॒ष्टिरि॑वाजनि ॥१॥
i॒yaṃ vā॑ma॒sya manma॑na॒ indrā॑gnī pū॒rvyastu॑tiḥ | a॒bhrādvṛ॒ṣṭiri॑vājani || १ ||
शृ॒णु॒तं ज॑रि॒तुर्हव॒मिन्द्रा॑ग्नी॒ वन॑तं॒ गिर॑: । ई॒शा॒ना पि॑प्यतं॒ धिय॑: ॥२॥
śṛ॒ṇu॒taṃ ja॑ri॒turhava॒mindrā॑gnī॒ vana॑taṃ॒ gira॑: | ī॒śā॒nā pi॑pyataṃ॒ dhiya॑: || २ ||
मा पा॑प॒त्वाय॑ नो न॒रेन्द्रा॑ग्नी॒ माभिश॑स्तये । मा नो॑ रीरधतं नि॒दे ॥३॥
mā pā॑pa॒tvāya॑ no na॒rendrā॑gnī॒ mābhiśa॑staye | mā no॑ rīradhataṃ ni॒de || ३ ||
इन्द्रे॑ अ॒ग्ना नमो॑ बृ॒हत्सु॑वृ॒क्तिमेर॑यामहे । धि॒या धेना॑ अव॒स्यव॑: ॥४॥
indre॑ a॒gnā namo॑ bṛ॒hatsu॑vṛ॒ktimera॑yāmahe | dhi॒yā dhenā॑ ava॒syava॑: || ४ ||
ता हि शश्व॑न्त॒ ईळ॑त इ॒त्था विप्रा॑स ऊ॒तये॑ । स॒बाधो॒ वाज॑सातये ॥५॥
tā hi śaśva॑nta॒ īḷa॑ta i॒tthā viprā॑sa ū॒taye॑ | sa॒bādho॒ vāja॑sātaye || ५ ||
ता वां॑ गी॒र्भिर्वि॑प॒न्यव॒: प्रय॑स्वन्तो हवामहे । मे॒धसा॑ता सनि॒ष्यव॑: ॥६॥
tā vāṃ॑ gī॒rbhirvi॑pa॒nyava॒: praya॑svanto havāmahe | me॒dhasā॑tā sani॒ṣyava॑: || ६ ||
इन्द्रा॑ग्नी॒ अव॒सा ग॑तम॒स्मभ्यं॑ चर्षणीसहा । मा नो॑ दु॒:शंस॑ ईशत ॥७॥
indrā॑gnī॒ ava॒sā ga॑tama॒smabhyaṃ॑ carṣaṇīsahā | mā no॑ du॒:śaṃsa॑ īśata || ७ ||
मा कस्य॑ नो॒ अर॑रुषो धू॒र्तिः प्रण॒ङ्मर्त्य॑स्य । इन्द्रा॑ग्नी॒ शर्म॑ यच्छतम् ॥८॥
mā kasya॑ no॒ ara॑ruṣo dhū॒rtiḥ praṇa॒ṅmartya॑sya | indrā॑gnī॒ śarma॑ yacchatam || ८ ||
गोम॒द्धिर॑ण्यव॒द्वसु॒ यद्वा॒मश्वा॑व॒दीम॑हे । इन्द्रा॑ग्नी॒ तद्व॑नेमहि ॥९॥
goma॒ddhira॑ṇyava॒dvasu॒ yadvā॒maśvā॑va॒dīma॑he | indrā॑gnī॒ tadva॑nemahi || ९ ||
यत्सोम॒ आ सु॒ते नर॑ इन्द्रा॒ग्नी अजो॑हवुः । सप्ती॑वन्ता सप॒र्यव॑: ॥१०॥
yatsoma॒ ā su॒te nara॑ indrā॒gnī ajo॑havuḥ | saptī॑vantā sapa॒ryava॑: || १० ||
उ॒क्थेभि॑र्वृत्र॒हन्त॑मा॒ या म॑न्दा॒ना चि॒दा गि॒रा । आ॒ङ्गू॒षैरा॒विवा॑सतः ॥११॥
u॒kthebhi॑rvṛtra॒hanta॑mā॒ yā ma॑ndā॒nā ci॒dā gi॒rā | ā॒ṅgū॒ṣairā॒vivā॑sataḥ || ११ ||
ताविद्दु॒:शंसं॒ मर्त्यं॒ दुर्वि॑द्वांसं रक्ष॒स्विन॑म् । आ॒भो॒गं हन्म॑ना हतमुद॒धिं हन्म॑ना हतम् ॥१२॥
tāviddu॒:śaṃsaṃ॒ martyaṃ॒ durvi॑dvāṃsaṃ rakṣa॒svina॑m | ā॒bho॒gaṃ hanma॑nā hatamuda॒dhiṃ hanma॑nā hatam || १२ ||