EeseDharmaSanātana Library
525मण्डल 7 · सूक्त 9
6 shlokअबो॑धि जा॒र उ॒षसा॑मु॒पस्था॒द्धोता॑ म॒न्द्रः क॒वित॑मः पाव॒कः ।
दधा॑ति के॒तुमु॒भय॑स्य ज॒न्तोर्ह॒व्या दे॒वेषु॒ द्रवि॑णं सु॒कृत्सु॑ ॥१॥
abo॑dhi jā॒ra u॒ṣasā॑mu॒pasthā॒ddhotā॑ ma॒ndraḥ ka॒vita॑maḥ pāva॒kaḥ | dadhā॑ti ke॒tumu॒bhaya॑sya ja॒ntorha॒vyā de॒veṣu॒ dravi॑ṇaṃ su॒kṛtsu॑ || १ ||
स सु॒क्रतु॒र्यो वि दुर॑: पणी॒नां पु॑ना॒नो अ॒र्कं पु॑रु॒भोज॑सं नः ।
होता॑ म॒न्द्रो वि॒शां दमू॑नास्ति॒रस्तमो॑ ददृशे रा॒म्याणा॑म् ॥२॥
sa su॒kratu॒ryo vi dura॑: paṇī॒nāṃ pu॑nā॒no a॒rkaṃ pu॑ru॒bhoja॑saṃ naḥ | hotā॑ ma॒ndro vi॒śāṃ damū॑nāsti॒rastamo॑ dadṛśe rā॒myāṇā॑m || २ ||
अमू॑रः क॒विरदि॑तिर्वि॒वस्वा॑न्त्सुसं॒सन्मि॒त्रो अति॑थिः शि॒वो न॑: ।
चि॒त्रभा॑नुरु॒षसां॑ भा॒त्यग्रे॒ऽपां गर्भ॑: प्र॒स्व१ आ वि॑वेश ॥३॥
amū॑raḥ ka॒viradi॑tirvi॒vasvā॑ntsusaṃ॒sanmi॒tro ati॑thiḥ śi॒vo na॑: | ci॒trabhā॑nuru॒ṣasāṃ॑ bhā॒tyagre॒’pāṃ garbha॑: pra॒sva१ ā vi॑veśa || ३ ||
ई॒ळेन्यो॑ वो॒ मनु॑षो यु॒गेषु॑ समन॒गा अ॑शुचज्जा॒तवे॑दाः ।
सु॒सं॒दृशा॑ भा॒नुना॒ यो वि॒भाति॒ प्रति॒ गाव॑: समिधा॒नं बु॑धन्त ॥४॥
ī॒ḷenyo॑ vo॒ manu॑ṣo yu॒geṣu॑ samana॒gā a॑śucajjā॒tave॑dāḥ | su॒saṃ॒dṛśā॑ bhā॒nunā॒ yo vi॒bhāti॒ prati॒ gāva॑: samidhā॒naṃ bu॑dhanta || ४ ||
अग्ने॑ या॒हि दू॒त्यं१ मा रि॑षण्यो दे॒वाँ अच्छा॑ ब्रह्म॒कृता॑ ग॒णेन॑ ।
सर॑स्वतीं म॒रुतो॑ अ॒श्विना॒पो यक्षि॑ दे॒वान्र॑त्न॒धेया॑य॒ विश्वा॑न् ॥५॥
agne॑ yā॒hi dū॒tyaṃ१ mā ri॑ṣaṇyo de॒vām̐ acchā॑ brahma॒kṛtā॑ ga॒ṇena॑ | sara॑svatīṃ ma॒ruto॑ a॒śvinā॒po yakṣi॑ de॒vānra॑tna॒dheyā॑ya॒ viśvā॑n || ५ ||
त्वाम॑ग्ने समिधा॒नो वसि॑ष्ठो॒ जरू॑थं ह॒न्यक्षि॑ रा॒ये पुरं॑धिम् ।
पु॒रु॒णी॒था जा॑तवेदो जरस्व यू॒यं पा॑त स्व॒स्तिभि॒: सदा॑ नः ॥६॥
tvāma॑gne samidhā॒no vasi॑ṣṭho॒ jarū॑thaṃ ha॒nyakṣi॑ rā॒ye puraṃ॑dhim | pu॒ru॒ṇī॒thā jā॑tavedo jarasva yū॒yaṃ pā॑ta sva॒stibhi॒: sadā॑ naḥ || ६ ||