EeseDharmaSanātana Library
597मण्डल 7 · सूक्त 81
6 shlokप्रत्यु॑ अदर्श्याय॒त्यु१च्छन्ती॑ दुहि॒ता दि॒वः ।
अपो॒ महि॑ व्ययति॒ चक्ष॑से॒ तमो॒ ज्योति॑ष्कृणोति सू॒नरी॑ ॥१॥
pratyu॑ adarśyāya॒tyu१cchantī॑ duhi॒tā di॒vaḥ | apo॒ mahi॑ vyayati॒ cakṣa॑se॒ tamo॒ jyoti॑ṣkṛṇoti sū॒narī॑ || १ ||
उदु॒स्रिया॑: सृजते॒ सूर्य॒: सचाँ॑ उ॒द्यन्नक्ष॑त्रमर्चि॒वत् ।
तवेदु॑षो॒ व्युषि॒ सूर्य॑स्य च॒ सं भ॒क्तेन॑ गमेमहि ॥२॥
udu॒sriyā॑: sṛjate॒ sūrya॒: sacām̐॑ u॒dyannakṣa॑tramarci॒vat | tavedu॑ṣo॒ vyuṣi॒ sūrya॑sya ca॒ saṃ bha॒ktena॑ gamemahi || २ ||
प्रति॑ त्वा दुहितर्दिव॒ उषो॑ जी॒रा अ॑भुत्स्महि ।
या वह॑सि पु॒रु स्पा॒र्हं व॑नन्वति॒ रत्नं॒ न दा॒शुषे॒ मय॑: ॥३॥
prati॑ tvā duhitardiva॒ uṣo॑ jī॒rā a॑bhutsmahi | yā vaha॑si pu॒ru spā॒rhaṃ va॑nanvati॒ ratnaṃ॒ na dā॒śuṣe॒ maya॑: || ३ ||
उ॒च्छन्ती॒ या कृ॒णोषि॑ मं॒हना॑ महि प्र॒ख्यै दे॑वि॒ स्व॑र्दृ॒शे ।
तस्या॑स्ते रत्न॒भाज॑ ईमहे व॒यं स्याम॑ मा॒तुर्न सू॒नव॑: ॥४॥
u॒cchantī॒ yā kṛ॒ṇoṣi॑ maṃ॒hanā॑ mahi pra॒khyai de॑vi॒ sva॑rdṛ॒śe | tasyā॑ste ratna॒bhāja॑ īmahe va॒yaṃ syāma॑ mā॒turna sū॒nava॑: || ४ ||
तच्चि॒त्रं राध॒ आ भ॒रोषो॒ यद्दी॑र्घ॒श्रुत्त॑मम् ।
यत्ते॑ दिवो दुहितर्मर्त॒भोज॑नं॒ तद्रा॑स्व भु॒नजा॑महै ॥५॥
tacci॒traṃ rādha॒ ā bha॒roṣo॒ yaddī॑rgha॒śrutta॑mam | yatte॑ divo duhitarmarta॒bhoja॑naṃ॒ tadrā॑sva bhu॒najā॑mahai || ५ ||
श्रव॑: सू॒रिभ्यो॑ अ॒मृतं॑ वसुत्व॒नं वाजाँ॑ अ॒स्मभ्यं॒ गोम॑तः ।
चो॒द॒यि॒त्री म॒घोन॑: सू॒नृता॑वत्यु॒षा उ॑च्छ॒दप॒ स्रिध॑: ॥६॥
śrava॑: sū॒ribhyo॑ a॒mṛtaṃ॑ vasutva॒naṃ vājām̐॑ a॒smabhyaṃ॒ goma॑taḥ | co॒da॒yi॒trī ma॒ghona॑: sū॒nṛtā॑vatyu॒ṣā u॑ccha॒dapa॒ sridha॑: || ६ ||