EeseDharmaSanātana Library
592मण्डल 7 · सूक्त 76
7 shlokउदु॒ ज्योति॑र॒मृतं॑ वि॒श्वज॑न्यं वि॒श्वान॑रः सवि॒ता दे॒वो अ॑श्रेत् ।
क्रत्वा॑ दे॒वाना॑मजनिष्ट॒ चक्षु॑रा॒विर॑क॒र्भुव॑नं॒ विश्व॑मु॒षाः ॥१॥
udu॒ jyoti॑ra॒mṛtaṃ॑ vi॒śvaja॑nyaṃ vi॒śvāna॑raḥ savi॒tā de॒vo a॑śret | kratvā॑ de॒vānā॑majaniṣṭa॒ cakṣu॑rā॒vira॑ka॒rbhuva॑naṃ॒ viśva॑mu॒ṣāḥ || १ ||
प्र मे॒ पन्था॑ देव॒याना॑ अदृश्र॒न्नम॑र्धन्तो॒ वसु॑भि॒रिष्कृ॑तासः ।
अभू॑दु के॒तुरु॒षस॑: पु॒रस्ता॑त्प्रती॒च्यागा॒दधि॑ ह॒र्म्येभ्य॑: ॥२॥
pra me॒ panthā॑ deva॒yānā॑ adṛśra॒nnama॑rdhanto॒ vasu॑bhi॒riṣkṛ॑tāsaḥ | abhū॑du ke॒turu॒ṣasa॑: pu॒rastā॑tpratī॒cyāgā॒dadhi॑ ha॒rmyebhya॑: || २ ||
तानीदहा॑नि बहु॒लान्या॑स॒न्या प्रा॒चीन॒मुदि॑ता॒ सूर्य॑स्य ।
यत॒: परि॑ जा॒र इ॑वा॒चर॒न्त्युषो॑ ददृ॒क्षे न पुन॑र्य॒तीव॑ ॥३॥
tānīdahā॑ni bahu॒lānyā॑sa॒nyā prā॒cīna॒mudi॑tā॒ sūrya॑sya | yata॒: pari॑ jā॒ra i॑vā॒cara॒ntyuṣo॑ dadṛ॒kṣe na puna॑rya॒tīva॑ || ३ ||
त इद्दे॒वानां॑ सध॒माद॑ आसन्नृ॒तावा॑नः क॒वय॑: पू॒र्व्यास॑: ।
गू॒ळ्हं ज्योति॑: पि॒तरो॒ अन्व॑विन्दन्त्स॒त्यम॑न्त्रा अजनयन्नु॒षास॑म् ॥४॥
ta idde॒vānāṃ॑ sadha॒māda॑ āsannṛ॒tāvā॑naḥ ka॒vaya॑: pū॒rvyāsa॑: | gū॒ḷhaṃ jyoti॑: pi॒taro॒ anva॑vindantsa॒tyama॑ntrā ajanayannu॒ṣāsa॑m || ४ ||
स॒मा॒न ऊ॒र्वे अधि॒ संग॑तास॒: सं जा॑नते॒ न य॑तन्ते मि॒थस्ते ।
ते दे॒वानां॒ न मि॑नन्ति व्र॒तान्यम॑र्धन्तो॒ वसु॑भि॒र्याद॑मानाः ॥५॥
sa॒mā॒na ū॒rve adhi॒ saṃga॑tāsa॒: saṃ jā॑nate॒ na ya॑tante mi॒thaste | te de॒vānāṃ॒ na mi॑nanti vra॒tānyama॑rdhanto॒ vasu॑bhi॒ryāda॑mānāḥ || ५ ||
प्रति॑ त्वा॒ स्तोमै॑रीळते॒ वसि॑ष्ठा उष॒र्बुध॑: सुभगे तुष्टु॒वांस॑: ।
गवां॑ ने॒त्री वाज॑पत्नी न उ॒च्छोष॑: सुजाते प्रथ॒मा ज॑रस्व ॥६॥
prati॑ tvā॒ stomai॑rīḷate॒ vasi॑ṣṭhā uṣa॒rbudha॑: subhage tuṣṭu॒vāṃsa॑: | gavāṃ॑ ne॒trī vāja॑patnī na u॒cchoṣa॑: sujāte pratha॒mā ja॑rasva || ६ ||
ए॒षा ने॒त्री राध॑सः सू॒नृता॑नामु॒षा उ॒च्छन्ती॑ रिभ्यते॒ वसि॑ष्ठैः ।
दी॒र्घ॒श्रुतं॑ र॒यिम॒स्मे दधा॑ना यू॒यं पा॑त स्व॒स्तिभि॒: सदा॑ नः ॥७॥
e॒ṣā ne॒trī rādha॑saḥ sū॒nṛtā॑nāmu॒ṣā u॒cchantī॑ ribhyate॒ vasi॑ṣṭhaiḥ | dī॒rgha॒śrutaṃ॑ ra॒yima॒sme dadhā॑nā yū॒yaṃ pā॑ta sva॒stibhi॒: sadā॑ naḥ || ७ ||