EeseDharmaSanātana Library
589मण्डल 7 · सूक्त 73
5 shlokअता॑रिष्म॒ तम॑सस्पा॒रम॒स्य प्रति॒ स्तोमं॑ देव॒यन्तो॒ दधा॑नाः ।
पु॒रु॒दंसा॑ पुरु॒तमा॑ पुरा॒जाऽम॑र्त्या हवते अ॒श्विना॒ गीः ॥१॥
atā॑riṣma॒ tama॑saspā॒rama॒sya prati॒ stomaṃ॑ deva॒yanto॒ dadhā॑nāḥ | pu॒ru॒daṃsā॑ puru॒tamā॑ purā॒jā’ma॑rtyā havate a॒śvinā॒ gīḥ || १ ||
न्यु॑ प्रि॒यो मनु॑षः सादि॒ होता॒ नास॑त्या॒ यो यज॑ते॒ वन्द॑ते च ।
अ॒श्नी॒तं मध्वो॑ अश्विना उपा॒क आ वां॑ वोचे वि॒दथे॑षु॒ प्रय॑स्वान् ॥२॥
nyu॑ pri॒yo manu॑ṣaḥ sādi॒ hotā॒ nāsa॑tyā॒ yo yaja॑te॒ vanda॑te ca | a॒śnī॒taṃ madhvo॑ aśvinā upā॒ka ā vāṃ॑ voce vi॒dathe॑ṣu॒ praya॑svān || २ ||
अहे॑म य॒ज्ञं प॒थामु॑रा॒णा इ॒मां सु॑वृ॒क्तिं वृ॑षणा जुषेथाम् ।
श्रु॒ष्टी॒वेव॒ प्रेषि॑तो वामबोधि॒ प्रति॒ स्तोमै॒र्जर॑माणो॒ वसि॑ष्ठः ॥३॥
ahe॑ma ya॒jñaṃ pa॒thāmu॑rā॒ṇā i॒māṃ su॑vṛ॒ktiṃ vṛ॑ṣaṇā juṣethām | śru॒ṣṭī॒veva॒ preṣi॑to vāmabodhi॒ prati॒ stomai॒rjara॑māṇo॒ vasi॑ṣṭhaḥ || ३ ||
उप॒ त्या वह्नी॑ गमतो॒ विशं॑ नो रक्षो॒हणा॒ सम्भृ॑ता वी॒ळुपा॑णी ।
समन्धां॑स्यग्मत मत्स॒राणि॒ मा नो॑ मर्धिष्ट॒मा ग॑तं शि॒वेन॑ ॥४॥
upa॒ tyā vahnī॑ gamato॒ viśaṃ॑ no rakṣo॒haṇā॒ sambhṛ॑tā vī॒ḷupā॑ṇī | samandhāṃ॑syagmata matsa॒rāṇi॒ mā no॑ mardhiṣṭa॒mā ga॑taṃ śi॒vena॑ || ४ ||
आ प॒श्चाता॑न्नास॒त्या पु॒रस्ता॒दाश्वि॑ना यातमध॒रादुद॑क्तात् ।
आ वि॒श्वत॒: पाञ्च॑जन्येन रा॒या यू॒यं पा॑त स्व॒स्तिभि॒: सदा॑ नः ॥५॥
ā pa॒ścātā॑nnāsa॒tyā pu॒rastā॒dāśvi॑nā yātamadha॒rāduda॑ktāt | ā vi॒śvata॒: pāñca॑janyena rā॒yā yū॒yaṃ pā॑ta sva॒stibhi॒: sadā॑ naḥ || ५ ||