EeseDharmaSanātana Library
588मण्डल 7 · सूक्त 72
5 shlokआ गोम॑ता नासत्या॒ रथे॒नाऽश्वा॑वता पुरुश्च॒न्द्रेण॑ यातम् ।
अ॒भि वां॒ विश्वा॑ नि॒युत॑: सचन्ते स्पा॒र्हया॑ श्रि॒या त॒न्वा॑ शुभा॒ना ॥१॥
ā goma॑tā nāsatyā॒ rathe॒nā’śvā॑vatā puruśca॒ndreṇa॑ yātam | a॒bhi vāṃ॒ viśvā॑ ni॒yuta॑: sacante spā॒rhayā॑ śri॒yā ta॒nvā॑ śubhā॒nā || १ ||
आ नो॑ दे॒वेभि॒रुप॑ यातम॒र्वाक्स॒जोष॑सा नासत्या॒ रथे॑न ।
यु॒वोर्हि न॑: स॒ख्या पित्र्या॑णि समा॒नो बन्धु॑रु॒त तस्य॑ वित्तम् ॥२॥
ā no॑ de॒vebhi॒rupa॑ yātama॒rvāksa॒joṣa॑sā nāsatyā॒ rathe॑na | yu॒vorhi na॑: sa॒khyā pitryā॑ṇi samā॒no bandhu॑ru॒ta tasya॑ vittam || २ ||
उदु॒ स्तोमा॑सो अ॒श्विनो॑रबुध्रञ्जा॒मि ब्रह्मा॑ण्यु॒षस॑श्च दे॒वीः ।
आ॒विवा॑स॒न्रोद॑सी॒ धिष्ण्ये॒मे अच्छा॒ विप्रो॒ नास॑त्या विवक्ति ॥३॥
udu॒ stomā॑so a॒śvino॑rabudhrañjā॒mi brahmā॑ṇyu॒ṣasa॑śca de॒vīḥ | ā॒vivā॑sa॒nroda॑sī॒ dhiṣṇye॒me acchā॒ vipro॒ nāsa॑tyā vivakti || ३ ||
वि चेदु॒च्छन्त्य॑श्विना उ॒षास॒: प्र वां॒ ब्रह्मा॑णि का॒रवो॑ भरन्ते ।
ऊ॒र्ध्वं भा॒नुं स॑वि॒ता दे॒वो अ॑श्रेद्बृ॒हद॒ग्नय॑: स॒मिधा॑ जरन्ते ॥४॥
vi cedu॒cchantya॑śvinā u॒ṣāsa॒: pra vāṃ॒ brahmā॑ṇi kā॒ravo॑ bharante | ū॒rdhvaṃ bhā॒nuṃ sa॑vi॒tā de॒vo a॑średbṛ॒hada॒gnaya॑: sa॒midhā॑ jarante || ४ ||
आ प॒श्चाता॑न्नास॒त्या पु॒रस्ता॒दाश्वि॑ना यातमध॒रादुद॑क्तात् ।
आ वि॒श्वत॒: पाञ्च॑जन्येन रा॒या यू॒यं पा॑त स्व॒स्तिभि॒: सदा॑ नः ॥५॥
ā pa॒ścātā॑nnāsa॒tyā pu॒rastā॒dāśvi॑nā yātamadha॒rāduda॑ktāt | ā vi॒śvata॒: pāñca॑janyena rā॒yā yū॒yaṃ pā॑ta sva॒stibhi॒: sadā॑ naḥ || ५ ||