EeseDharmaSanātana Library
523मण्डल 7 · सूक्त 7
7 shlokप्र वो॑ दे॒वं चि॑त्सहसा॒नम॒ग्निमश्वं॒ न वा॒जिनं॑ हिषे॒ नमो॑भिः ।
भवा॑ नो दू॒तो अ॑ध्व॒रस्य॑ वि॒द्वान्त्मना॑ दे॒वेषु॑ विविदे मि॒तद्रु॑: ॥१॥
pra vo॑ de॒vaṃ ci॑tsahasā॒nama॒gnimaśvaṃ॒ na vā॒jinaṃ॑ hiṣe॒ namo॑bhiḥ | bhavā॑ no dū॒to a॑dhva॒rasya॑ vi॒dvāntmanā॑ de॒veṣu॑ vivide mi॒tadru॑: || १ ||
आ या॑ह्यग्ने प॒थ्या॒३ अनु॒ स्वा म॒न्द्रो दे॒वानां॑ स॒ख्यं जु॑षा॒णः ।
आ सानु॒ शुष्मै॑र्न॒दय॑न्पृथि॒व्या जम्भे॑भि॒र्विश्व॑मु॒शध॒ग्वना॑नि ॥२॥
ā yā॑hyagne pa॒thyā॒३ anu॒ svā ma॒ndro de॒vānāṃ॑ sa॒khyaṃ ju॑ṣā॒ṇaḥ | ā sānu॒ śuṣmai॑rna॒daya॑npṛthi॒vyā jambhe॑bhi॒rviśva॑mu॒śadha॒gvanā॑ni || २ ||
प्रा॒चीनो॑ य॒ज्ञः सुधि॑तं॒ हि ब॒र्हिः प्री॑णी॒ते अ॒ग्निरी॑ळि॒तो न होता॑ ।
आ मा॒तरा॑ वि॒श्ववा॑रे हुवा॒नो यतो॑ यविष्ठ जज्ञि॒षे सु॒शेव॑: ॥३॥
prā॒cīno॑ ya॒jñaḥ sudhi॑taṃ॒ hi ba॒rhiḥ prī॑ṇī॒te a॒gnirī॑ḷi॒to na hotā॑ | ā mā॒tarā॑ vi॒śvavā॑re huvā॒no yato॑ yaviṣṭha jajñi॒ṣe su॒śeva॑: || ३ ||
स॒द्यो अ॑ध्व॒रे र॑थि॒रं ज॑नन्त॒ मानु॑षासो॒ विचे॑तसो॒ य ए॑षाम् ।
वि॒शाम॑धायि वि॒श्पति॑र्दुरो॒णे॒३ऽग्निर्म॒न्द्रो मधु॑वचा ऋ॒तावा॑ ॥४॥
sa॒dyo a॑dhva॒re ra॑thi॒raṃ ja॑nanta॒ mānu॑ṣāso॒ vice॑taso॒ ya e॑ṣām | vi॒śāma॑dhāyi vi॒śpati॑rduro॒ṇe॒३’gnirma॒ndro madhu॑vacā ṛ॒tāvā॑ || ४ ||
असा॑दि वृ॒तो वह्नि॑राजग॒न्वान॒ग्निर्ब्र॒ह्मा नृ॒षद॑ने विध॒र्ता ।
द्यौश्च॒ यं पृ॑थि॒वी वा॑वृ॒धाते॒ आ यं होता॒ यज॑ति वि॒श्ववा॑रम् ॥५॥
asā॑di vṛ॒to vahni॑rājaga॒nvāna॒gnirbra॒hmā nṛ॒ṣada॑ne vidha॒rtā | dyauśca॒ yaṃ pṛ॑thi॒vī vā॑vṛ॒dhāte॒ ā yaṃ hotā॒ yaja॑ti vi॒śvavā॑ram || ५ ||
ए॒ते द्यु॒म्नेभि॒र्विश्व॒माति॑रन्त॒ मन्त्रं॒ ये वारं॒ नर्या॒ अत॑क्षन् ।
प्र ये विश॑स्ति॒रन्त॒ श्रोष॑माणा॒ आ ये मे॑ अ॒स्य दीध॑यन्नृ॒तस्य॑ ॥६॥
e॒te dyu॒mnebhi॒rviśva॒māti॑ranta॒ mantraṃ॒ ye vāraṃ॒ naryā॒ ata॑kṣan | pra ye viśa॑sti॒ranta॒ śroṣa॑māṇā॒ ā ye me॑ a॒sya dīdha॑yannṛ॒tasya॑ || ६ ||
नू त्वाम॑ग्न ईमहे॒ वसि॑ष्ठा ईशा॒नं सू॑नो सहसो॒ वसू॑नाम् ।
इषं॑ स्तो॒तृभ्यो॑ म॒घव॑द्भ्य आनड्यू॒यं पा॑त स्व॒स्तिभि॒: सदा॑ नः ॥७॥
nū tvāma॑gna īmahe॒ vasi॑ṣṭhā īśā॒naṃ sū॑no sahaso॒ vasū॑nām | iṣaṃ॑ sto॒tṛbhyo॑ ma॒ghava॑dbhya ānaḍyū॒yaṃ pā॑ta sva॒stibhi॒: sadā॑ naḥ || ७ ||