EeseDharmaSanātana Library
582मण्डल 7 · सूक्त 66
19 shlokप्र मि॒त्रयो॒र्वरु॑णयो॒: स्तोमो॑ न एतु शू॒ष्य॑: । नम॑स्वान्तुविजा॒तयो॑: ॥१॥
pra mi॒trayo॒rvaru॑ṇayo॒: stomo॑ na etu śū॒ṣya॑: | nama॑svāntuvijā॒tayo॑: || १ ||
या धा॒रय॑न्त दे॒वाः सु॒दक्षा॒ दक्ष॑पितरा । अ॒सु॒र्या॑य॒ प्रम॑हसा ॥२॥
yā dhā॒raya॑nta de॒vāḥ su॒dakṣā॒ dakṣa॑pitarā | a॒su॒ryā॑ya॒ prama॑hasā || २ ||
ता न॑: स्ति॒पा त॑नू॒पा वरु॑ण जरितॄ॒णाम् । मित्र॑ सा॒धय॑तं॒ धिय॑: ॥३॥
tā na॑: sti॒pā ta॑nū॒pā varu॑ṇa jaritṝ॒ṇām | mitra॑ sā॒dhaya॑taṃ॒ dhiya॑: || ३ ||
यद॒द्य सूर॒ उदि॒तेऽना॑गा मि॒त्रो अ॑र्य॒मा । सु॒वाति॑ सवि॒ता भग॑: ॥४॥
yada॒dya sūra॒ udi॒te’nā॑gā mi॒tro a॑rya॒mā | su॒vāti॑ savi॒tā bhaga॑: || ४ ||
सु॒प्रा॒वीर॑स्तु॒ स क्षय॒: प्र नु याम॑न्त्सुदानवः । ये नो॒ अंहो॑ऽति॒पिप्र॑ति ॥५॥
su॒prā॒vīra॑stu॒ sa kṣaya॒: pra nu yāma॑ntsudānavaḥ | ye no॒ aṃho॑’ti॒pipra॑ti || ५ ||
उ॒त स्व॒राजो॒ अदि॑ति॒रद॑ब्धस्य व्र॒तस्य॒ ये । म॒हो राजा॑न ईशते ॥६॥
u॒ta sva॒rājo॒ adi॑ti॒rada॑bdhasya vra॒tasya॒ ye | ma॒ho rājā॑na īśate || ६ ||
प्रति॑ वां॒ सूर॒ उदि॑ते मि॒त्रं गृ॑णीषे॒ वरु॑णम् । अ॒र्य॒मणं॑ रि॒शाद॑सम् ॥७॥
prati॑ vāṃ॒ sūra॒ udi॑te mi॒traṃ gṛ॑ṇīṣe॒ varu॑ṇam | a॒rya॒maṇaṃ॑ ri॒śāda॑sam || ७ ||
रा॒या हि॑रण्य॒या म॒तिरि॒यम॑वृ॒काय॒ शव॑से । इ॒यं विप्रा॑ मे॒धसा॑तये ॥८॥
rā॒yā hi॑raṇya॒yā ma॒tiri॒yama॑vṛ॒kāya॒ śava॑se | i॒yaṃ viprā॑ me॒dhasā॑taye || ८ ||
ते स्या॑म देव वरुण॒ ते मि॑त्र सू॒रिभि॑: स॒ह । इषं॒ स्व॑श्च धीमहि ॥९॥
te syā॑ma deva varuṇa॒ te mi॑tra sū॒ribhi॑: sa॒ha | iṣaṃ॒ sva॑śca dhīmahi || ९ ||
ब॒हव॒: सूर॑चक्षसोऽग्निजि॒ह्वा ऋ॑ता॒वृध॑: । त्रीणि॒ ये ये॒मुर्वि॒दथा॑नि धी॒तिभि॒र्विश्वा॑नि॒ परि॑भूतिभिः ॥१०॥
ba॒hava॒: sūra॑cakṣaso’gniji॒hvā ṛ॑tā॒vṛdha॑: | trīṇi॒ ye ye॒murvi॒dathā॑ni dhī॒tibhi॒rviśvā॑ni॒ pari॑bhūtibhiḥ || १० ||
वि ये द॒धुः श॒रदं॒ मास॒मादह॑र्य॒ज्ञम॒क्तुं चादृच॑म् ।
अ॒ना॒प्यं वरु॑णो मि॒त्रो अ॑र्य॒मा क्ष॒त्रं राजा॑न आशत ॥११॥
vi ye da॒dhuḥ śa॒radaṃ॒ māsa॒mādaha॑rya॒jñama॒ktuṃ cādṛca॑m | a॒nā॒pyaṃ varu॑ṇo mi॒tro a॑rya॒mā kṣa॒traṃ rājā॑na āśata || ११ ||
तद्वो॑ अ॒द्य म॑नामहे सू॒क्तैः सूर॒ उदि॑ते । यदोह॑ते॒ वरु॑णो मि॒त्रो अ॑र्य॒मा यू॒यमृ॒तस्य॑ रथ्यः ॥१२॥
tadvo॑ a॒dya ma॑nāmahe sū॒ktaiḥ sūra॒ udi॑te | yadoha॑te॒ varu॑ṇo mi॒tro a॑rya॒mā yū॒yamṛ॒tasya॑ rathyaḥ || १२ ||
ऋ॒तावा॑न ऋ॒तजा॑ता ऋता॒वृधो॑ घो॒रासो॑ अनृत॒द्विष॑: ।
तेषां॑ वः सु॒म्ने सु॑च्छ॒र्दिष्ट॑मे नर॒: स्याम॒ ये च॑ सू॒रय॑: ॥१३॥
ṛ॒tāvā॑na ṛ॒tajā॑tā ṛtā॒vṛdho॑ gho॒rāso॑ anṛta॒dviṣa॑: | teṣāṃ॑ vaḥ su॒mne su॑ccha॒rdiṣṭa॑me nara॒: syāma॒ ye ca॑ sū॒raya॑: || १३ ||
उदु॒ त्यद्द॑र्श॒तं वपु॑र्दि॒व ए॑ति प्रतिह्व॒रे । यदी॑मा॒शुर्वह॑ति दे॒व एत॑शो॒ विश्व॑स्मै॒ चक्ष॑से॒ अर॑म् ॥१४॥
udu॒ tyadda॑rśa॒taṃ vapu॑rdi॒va e॑ti pratihva॒re | yadī॑mā॒śurvaha॑ti de॒va eta॑śo॒ viśva॑smai॒ cakṣa॑se॒ ara॑m || १४ ||
शी॒र्ष्णःशी॑र्ष्णो॒ जग॑तस्त॒स्थुष॒स्पतिं॑ स॒मया॒ विश्व॒मा रज॑: ।
स॒प्त स्वसा॑रः सुवि॒ताय॒ सूर्यं॒ वह॑न्ति ह॒रितो॒ रथे॑ ॥१५॥
śī॒rṣṇaḥśī॑rṣṇo॒ jaga॑tasta॒sthuṣa॒spatiṃ॑ sa॒mayā॒ viśva॒mā raja॑: | sa॒pta svasā॑raḥ suvi॒tāya॒ sūryaṃ॒ vaha॑nti ha॒rito॒ rathe॑ || १५ ||
तच्चक्षु॑र्दे॒वहि॑तं शु॒क्रमु॒च्चर॑त् । पश्ये॑म श॒रद॑: श॒तं जीवे॑म श॒रद॑: श॒तम् ॥१६॥
taccakṣu॑rde॒vahi॑taṃ śu॒kramu॒ccara॑t | paśye॑ma śa॒rada॑: śa॒taṃ jīve॑ma śa॒rada॑: śa॒tam || १६ ||
काव्ये॑भिरदा॒भ्या ऽऽया॑तं वरुण द्यु॒मत् । मि॒त्रश्च॒ सोम॑पीतये ॥१७॥
kāvye॑bhiradā॒bhyā ’’yā॑taṃ varuṇa dyu॒mat | mi॒traśca॒ soma॑pītaye || १७ ||
दि॒वो धाम॑भिर्वरुण मि॒त्रश्चा या॑तम॒द्रुहा॑ । पिब॑तं॒ सोम॑मातु॒जी ॥१८॥
di॒vo dhāma॑bhirvaruṇa mi॒traścā yā॑tama॒druhā॑ | piba॑taṃ॒ soma॑mātu॒jī || १८ ||
आ या॑तं मित्रावरुणा जुषा॒णावाहु॑तिं नरा । पा॒तं सोम॑मृतावृधा ॥१९॥
ā yā॑taṃ mitrāvaruṇā juṣā॒ṇāvāhu॑tiṃ narā | pā॒taṃ soma॑mṛtāvṛdhā || १९ ||