EeseDharmaSanātana Library
576मण्डल 7 · सूक्त 60
12 shlokयद॒द्य सू॑र्य॒ ब्रवोऽना॑गा उ॒द्यन्मि॒त्राय॒ वरु॑णाय स॒त्यम् ।
व॒यं दे॑व॒त्रादि॑ते स्याम॒ तव॑ प्रि॒यासो॑ अर्यमन्गृ॒णन्त॑: ॥१॥
yada॒dya sū॑rya॒ bravo’nā॑gā u॒dyanmi॒trāya॒ varu॑ṇāya sa॒tyam | va॒yaṃ de॑va॒trādi॑te syāma॒ tava॑ pri॒yāso॑ aryamangṛ॒ṇanta॑: || १ ||
ए॒ष स्य मि॑त्रावरुणा नृ॒चक्षा॑ उ॒भे उदे॑ति॒ सूर्यो॑ अ॒भि ज्मन् ।
विश्व॑स्य स्था॒तुर्जग॑तश्च गो॒पा ऋ॒जु मर्ते॑षु वृजि॒ना च॒ पश्य॑न् ॥२॥
e॒ṣa sya mi॑trāvaruṇā nṛ॒cakṣā॑ u॒bhe ude॑ti॒ sūryo॑ a॒bhi jman | viśva॑sya sthā॒turjaga॑taśca go॒pā ṛ॒ju marte॑ṣu vṛji॒nā ca॒ paśya॑n || २ ||
अयु॑क्त स॒प्त ह॒रित॑: स॒धस्था॒द्या ईं॒ वह॑न्ति॒ सूर्यं॑ घृ॒ताची॑: ।
धामा॑नि मित्रावरुणा यु॒वाकु॒: सं यो यू॒थेव॒ जनि॑मानि॒ चष्टे॑ ॥३॥
ayu॑kta sa॒pta ha॒rita॑: sa॒dhasthā॒dyā īṃ॒ vaha॑nti॒ sūryaṃ॑ ghṛ॒tācī॑: | dhāmā॑ni mitrāvaruṇā yu॒vāku॒: saṃ yo yū॒theva॒ jani॑māni॒ caṣṭe॑ || ३ ||
उद्वां॑ पृ॒क्षासो॒ मधु॑मन्तो अस्थु॒रा सूर्यो॑ अरुहच्छु॒क्रमर्ण॑: ।
यस्मा॑ आदि॒त्या अध्व॑नो॒ रद॑न्ति मि॒त्रो अ॑र्य॒मा वरु॑णः स॒जोषा॑: ॥४॥
udvāṃ॑ pṛ॒kṣāso॒ madhu॑manto asthu॒rā sūryo॑ aruhacchu॒kramarṇa॑: | yasmā॑ ādi॒tyā adhva॑no॒ rada॑nti mi॒tro a॑rya॒mā varu॑ṇaḥ sa॒joṣā॑: || ४ ||
इ॒मे चे॒तारो॒ अनृ॑तस्य॒ भूरे॑र्मि॒त्रो अ॑र्य॒मा वरु॑णो॒ हि सन्ति॑ ।
इ॒म ऋ॒तस्य॑ वावृधुर्दुरो॒णे श॒ग्मास॑: पु॒त्रा अदि॑ते॒रद॑ब्धाः ॥५॥
i॒me ce॒tāro॒ anṛ॑tasya॒ bhūre॑rmi॒tro a॑rya॒mā varu॑ṇo॒ hi santi॑ | i॒ma ṛ॒tasya॑ vāvṛdhurduro॒ṇe śa॒gmāsa॑: pu॒trā adi॑te॒rada॑bdhāḥ || ५ ||
इ॒मे मि॒त्रो वरु॑णो दू॒ळभा॑सोऽचे॒तसं॑ चिच्चितयन्ति॒ दक्षै॑: ।
अपि॒ क्रतुं॑ सु॒चेत॑सं॒ वत॑न्तस्ति॒रश्चि॒दंह॑: सु॒पथा॑ नयन्ति ॥६॥
i॒me mi॒tro varu॑ṇo dū॒ḷabhā॑so’ce॒tasaṃ॑ ciccitayanti॒ dakṣai॑: | api॒ kratuṃ॑ su॒ceta॑saṃ॒ vata॑ntasti॒raści॒daṃha॑: su॒pathā॑ nayanti || ६ ||
इ॒मे दि॒वो अनि॑मिषा पृथि॒व्याश्चि॑कि॒त्वांसो॑ अचे॒तसं॑ नयन्ति ।
प्र॒व्रा॒जे चि॑न्न॒द्यो॑ गा॒धम॑स्ति पा॒रं नो॑ अ॒स्य वि॑ष्पि॒तस्य॑ पर्षन् ॥७॥
i॒me di॒vo ani॑miṣā pṛthi॒vyāści॑ki॒tvāṃso॑ ace॒tasaṃ॑ nayanti | pra॒vrā॒je ci॑nna॒dyo॑ gā॒dhama॑sti pā॒raṃ no॑ a॒sya vi॑ṣpi॒tasya॑ parṣan || ७ ||
यद्गो॒पाव॒ददि॑ति॒: शर्म॑ भ॒द्रं मि॒त्रो यच्छ॑न्ति॒ वरु॑णः सु॒दासे॑ ।
तस्मि॒न्ना तो॒कं तन॑यं॒ दधा॑ना॒ मा क॑र्म देव॒हेळ॑नं तुरासः ॥८॥
yadgo॒pāva॒dadi॑ti॒: śarma॑ bha॒draṃ mi॒tro yaccha॑nti॒ varu॑ṇaḥ su॒dāse॑ | tasmi॒nnā to॒kaṃ tana॑yaṃ॒ dadhā॑nā॒ mā ka॑rma deva॒heḷa॑naṃ turāsaḥ || ८ ||
अव॒ वेदिं॒ होत्रा॑भिर्यजेत॒ रिप॒: काश्चि॑द्वरुण॒ध्रुत॒: सः ।
परि॒ द्वेषो॑भिरर्य॒मा वृ॑णक्तू॒रुं सु॒दासे॑ वृषणा उ लो॒कम् ॥९॥
ava॒ vediṃ॒ hotrā॑bhiryajeta॒ ripa॒: kāści॑dvaruṇa॒dhruta॒: saḥ | pari॒ dveṣo॑bhirarya॒mā vṛ॑ṇaktū॒ruṃ su॒dāse॑ vṛṣaṇā u lo॒kam || ९ ||
स॒स्वश्चि॒द्धि समृ॑तिस्त्वे॒ष्ये॑षामपी॒च्ये॑न॒ सह॑सा॒ सह॑न्ते ।
यु॒ष्मद्भि॒या वृ॑षणो॒ रेज॑माना॒ दक्ष॑स्य चिन्महि॒ना मृ॒ळता॑ नः ॥१०॥
sa॒svaści॒ddhi samṛ॑tistve॒ṣye॑ṣāmapī॒cye॑na॒ saha॑sā॒ saha॑nte | yu॒ṣmadbhi॒yā vṛ॑ṣaṇo॒ reja॑mānā॒ dakṣa॑sya cinmahi॒nā mṛ॒ḷatā॑ naḥ || १० ||
यो ब्रह्म॑णे सुम॒तिमा॒यजा॑ते॒ वाज॑स्य सा॒तौ प॑र॒मस्य॑ रा॒यः ।
सीक्ष॑न्त म॒न्युं म॒घवा॑नो अ॒र्य उ॒रु क्षया॑य चक्रिरे सु॒धातु॑ ॥११॥
yo brahma॑ṇe suma॒timā॒yajā॑te॒ vāja॑sya sā॒tau pa॑ra॒masya॑ rā॒yaḥ | sīkṣa॑nta ma॒nyuṃ ma॒ghavā॑no a॒rya u॒ru kṣayā॑ya cakrire su॒dhātu॑ || ११ ||
इ॒यं दे॑व पु॒रोहि॑तिर्यु॒वभ्यां॑ य॒ज्ञेषु॑ मित्रावरुणावकारि ।
विश्वा॑नि दु॒र्गा पि॑पृतं ति॒रो नो॑ यू॒यं पा॑त स्व॒स्तिभि॒: सदा॑ नः ॥१२॥
i॒yaṃ de॑va pu॒rohi॑tiryu॒vabhyāṃ॑ ya॒jñeṣu॑ mitrāvaruṇāvakāri | viśvā॑ni du॒rgā pi॑pṛtaṃ ti॒ro no॑ yū॒yaṃ pā॑ta sva॒stibhi॒: sadā॑ naḥ || १२ ||