EeseDharmaSanātana Library
574मण्डल 7 · सूक्त 58
6 shlokप्र सा॑क॒मुक्षे॑ अर्चता ग॒णाय॒ यो दैव्य॑स्य॒ धाम्न॒स्तुवि॑ष्मान् ।
उ॒त क्षो॑दन्ति॒ रोद॑सी महि॒त्वा नक्ष॑न्ते॒ नाकं॒ निॠ॑तेरवं॒शात् ॥१॥
pra sā॑ka॒mukṣe॑ arcatā ga॒ṇāya॒ yo daivya॑sya॒ dhāmna॒stuvi॑ṣmān | u॒ta kṣo॑danti॒ roda॑sī mahi॒tvā nakṣa॑nte॒ nākaṃ॒ niṝ॑teravaṃ॒śāt || १ ||
ज॒नूश्चि॑द्वो मरुतस्त्वे॒ष्ये॑ण॒ भीमा॑स॒स्तुवि॑मन्य॒वोऽया॑सः ।
प्र ये महो॑भि॒रोज॑सो॒त सन्ति॒ विश्वो॑ वो॒ याम॑न्भयते स्व॒र्दृक् ॥२॥
ja॒nūści॑dvo marutastve॒ṣye॑ṇa॒ bhīmā॑sa॒stuvi॑manya॒vo’yā॑saḥ | pra ye maho॑bhi॒roja॑so॒ta santi॒ viśvo॑ vo॒ yāma॑nbhayate sva॒rdṛk || २ ||
बृ॒हद्वयो॑ म॒घव॑द्भ्यो दधात॒ जुजो॑ष॒न्निन्म॒रुत॑: सुष्टु॒तिं न॑: ।
ग॒तो नाध्वा॒ वि ति॑राति ज॒न्तुं प्र ण॑: स्पा॒र्हाभि॑रू॒तिभि॑स्तिरेत ॥३॥
bṛ॒hadvayo॑ ma॒ghava॑dbhyo dadhāta॒ jujo॑ṣa॒nninma॒ruta॑: suṣṭu॒tiṃ na॑: | ga॒to nādhvā॒ vi ti॑rāti ja॒ntuṃ pra ṇa॑: spā॒rhābhi॑rū॒tibhi॑stireta || ३ ||
यु॒ष्मोतो॒ विप्रो॑ मरुतः शत॒स्वी यु॒ष्मोतो॒ अर्वा॒ सहु॑रिः सह॒स्री ।
यु॒ष्मोत॑: स॒म्राळु॒त ह॑न्ति वृ॒त्रं प्र तद्वो॑ अस्तु धूतयो दे॒ष्णम् ॥४॥
yu॒ṣmoto॒ vipro॑ marutaḥ śata॒svī yu॒ṣmoto॒ arvā॒ sahu॑riḥ saha॒srī | yu॒ṣmota॑: sa॒mrāḷu॒ta ha॑nti vṛ॒traṃ pra tadvo॑ astu dhūtayo de॒ṣṇam || ४ ||
ताँ आ रु॒द्रस्य॑ मी॒ळ्हुषो॑ विवासे कु॒विन्नंस॑न्ते म॒रुत॒: पुन॑र्नः ।
यत्स॒स्वर्ता॑ जिहीळि॒रे यदा॒विरव॒ तदेन॑ ईमहे तु॒राणा॑म् ॥५॥
tām̐ ā ru॒drasya॑ mī॒ḷhuṣo॑ vivāse ku॒vinnaṃsa॑nte ma॒ruta॒: puna॑rnaḥ | yatsa॒svartā॑ jihīḷi॒re yadā॒virava॒ tadena॑ īmahe tu॒rāṇā॑m || ५ ||
प्र सा वा॑चि सुष्टु॒तिर्म॒घोना॑मि॒दं सू॒क्तं म॒रुतो॑ जुषन्त ।
आ॒राच्चि॒द्द्वेषो॑ वृषणो युयोत यू॒यं पा॑त स्व॒स्तिभि॒: सदा॑ नः ॥६॥
pra sā vā॑ci suṣṭu॒tirma॒ghonā॑mi॒daṃ sū॒ktaṃ ma॒ruto॑ juṣanta | ā॒rācci॒ddveṣo॑ vṛṣaṇo yuyota yū॒yaṃ pā॑ta sva॒stibhi॒: sadā॑ naḥ || ६ ||