EeseDharmaSanātana Library
567मण्डल 7 · सूक्त 51
3 shlokआ॒दि॒त्याना॒मव॑सा॒ नूत॑नेन सक्षी॒महि॒ शर्म॑णा॒ शंत॑मेन ।
अ॒ना॒गा॒स्त्वे अ॑दिति॒त्वे तु॒रास॑ इ॒मं य॒ज्ञं द॑धतु॒ श्रोष॑माणाः ॥१॥
ā॒di॒tyānā॒mava॑sā॒ nūta॑nena sakṣī॒mahi॒ śarma॑ṇā॒ śaṃta॑mena | a॒nā॒gā॒stve a॑diti॒tve tu॒rāsa॑ i॒maṃ ya॒jñaṃ da॑dhatu॒ śroṣa॑māṇāḥ || १ ||
आ॒दि॒त्यासो॒ अदि॑तिर्मादयन्तां मि॒त्रो अ॑र्य॒मा वरु॑णो॒ रजि॑ष्ठाः ।
अ॒स्माकं॑ सन्तु॒ भुव॑नस्य गो॒पाः पिब॑न्तु॒ सोम॒मव॑से नो अ॒द्य ॥२॥
ā॒di॒tyāso॒ adi॑tirmādayantāṃ mi॒tro a॑rya॒mā varu॑ṇo॒ raji॑ṣṭhāḥ | a॒smākaṃ॑ santu॒ bhuva॑nasya go॒pāḥ piba॑ntu॒ soma॒mava॑se no a॒dya || २ ||
आ॒दि॒त्या विश्वे॑ म॒रुत॑श्च॒ विश्वे॑ दे॒वाश्च॒ विश्व॑ ऋ॒भव॑श्च॒ विश्वे॑ ।
इन्द्रो॑ अ॒ग्निर॒श्विना॑ तुष्टुवा॒ना यू॒यं पा॑त स्व॒स्तिभि॒: सदा॑ नः ॥३॥
ā॒di॒tyā viśve॑ ma॒ruta॑śca॒ viśve॑ de॒vāśca॒ viśva॑ ṛ॒bhava॑śca॒ viśve॑ | indro॑ a॒gnira॒śvinā॑ tuṣṭuvā॒nā yū॒yaṃ pā॑ta sva॒stibhi॒: sadā॑ naḥ || ३ ||