EeseDharmaSanātana Library
563मण्डल 7 · सूक्त 47
4 shlokआपो॒ यं व॑: प्रथ॒मं दे॑व॒यन्त॑ इन्द्र॒पान॑मू॒र्मिमकृ॑ण्वते॒ळः ।
तं वो॑ व॒यं शुचि॑मरि॒प्रम॒द्य घृ॑त॒प्रुषं॒ मधु॑मन्तं वनेम ॥१॥
āpo॒ yaṃ va॑: pratha॒maṃ de॑va॒yanta॑ indra॒pāna॑mū॒rmimakṛ॑ṇvate॒ḷaḥ | taṃ vo॑ va॒yaṃ śuci॑mari॒prama॒dya ghṛ॑ta॒pruṣaṃ॒ madhu॑mantaṃ vanema || १ ||
तमू॒र्मिमा॑पो॒ मधु॑मत्तमं वो॒ऽपां नपा॑दवत्वाशु॒हेमा॑ ।
यस्मि॒न्निन्द्रो॒ वसु॑भिर्मा॒दया॑ते॒ तम॑श्याम देव॒यन्तो॑ वो अ॒द्य ॥२॥
tamū॒rmimā॑po॒ madhu॑mattamaṃ vo॒’pāṃ napā॑davatvāśu॒hemā॑ | yasmi॒nnindro॒ vasu॑bhirmā॒dayā॑te॒ tama॑śyāma deva॒yanto॑ vo a॒dya || २ ||
श॒तप॑वित्राः स्व॒धया॒ मद॑न्तीर्दे॒वीर्दे॒वाना॒मपि॑ यन्ति॒ पाथ॑: ।
ता इन्द्र॑स्य॒ न मि॑नन्ति व्र॒तानि॒ सिन्धु॑भ्यो ह॒व्यं घृ॒तव॑ज्जुहोत ॥३॥
śa॒tapa॑vitrāḥ sva॒dhayā॒ mada॑ntīrde॒vīrde॒vānā॒mapi॑ yanti॒ pātha॑: | tā indra॑sya॒ na mi॑nanti vra॒tāni॒ sindhu॑bhyo ha॒vyaṃ ghṛ॒tava॑jjuhota || ३ ||
याः सूर्यो॑ र॒श्मिभि॑रात॒तान॒ याभ्य॒ इन्द्रो॒ अर॑दद्गा॒तुमू॒र्मिम् ।
ते सि॑न्धवो॒ वरि॑वो धातना नो यू॒यं पा॑त स्व॒स्तिभि॒: सदा॑ नः ॥४॥
yāḥ sūryo॑ ra॒śmibhi॑rāta॒tāna॒ yābhya॒ indro॒ ara॑dadgā॒tumū॒rmim | te si॑ndhavo॒ vari॑vo dhātanā no yū॒yaṃ pā॑ta sva॒stibhi॒: sadā॑ naḥ || ४ ||