EeseDharmaSanātana Library
562मण्डल 7 · सूक्त 46
4 shlokइ॒मा रु॒द्राय॑ स्थि॒रध॑न्वने॒ गिर॑: क्षि॒प्रेष॑वे दे॒वाय॑ स्व॒धाव्ने॑ ।
अषा॑ळ्हाय॒ सह॑मानाय वे॒धसे॑ ति॒ग्मायु॑धाय भरता शृ॒णोतु॑ नः ॥१॥
i॒mā ru॒drāya॑ sthi॒radha॑nvane॒ gira॑: kṣi॒preṣa॑ve de॒vāya॑ sva॒dhāvne॑ | aṣā॑ḷhāya॒ saha॑mānāya ve॒dhase॑ ti॒gmāyu॑dhāya bharatā śṛ॒ṇotu॑ naḥ || १ ||
स हि क्षये॑ण॒ क्षम्य॑स्य॒ जन्म॑न॒: साम्रा॑ज्येन दि॒व्यस्य॒ चेत॑ति ।
अव॒न्नव॑न्ती॒रुप॑ नो॒ दुर॑श्चरानमी॒वो रु॑द्र॒ जासु॑ नो भव ॥२॥
sa hi kṣaye॑ṇa॒ kṣamya॑sya॒ janma॑na॒: sāmrā॑jyena di॒vyasya॒ ceta॑ti | ava॒nnava॑ntī॒rupa॑ no॒ dura॑ścarānamī॒vo ru॑dra॒ jāsu॑ no bhava || २ ||
या ते॑ दि॒द्युदव॑सृष्टा दि॒वस्परि॑ क्ष्म॒या चर॑ति॒ परि॒ सा वृ॑णक्तु नः ।
स॒हस्रं॑ ते स्वपिवात भेष॒जा मा न॑स्तो॒केषु॒ तन॑येषु रीरिषः ॥३॥
yā te॑ di॒dyudava॑sṛṣṭā di॒vaspari॑ kṣma॒yā cara॑ti॒ pari॒ sā vṛ॑ṇaktu naḥ | sa॒hasraṃ॑ te svapivāta bheṣa॒jā mā na॑sto॒keṣu॒ tana॑yeṣu rīriṣaḥ || ३ ||
मा नो॑ वधी रुद्र॒ मा परा॑ दा॒ मा ते॑ भूम॒ प्रसि॑तौ हीळि॒तस्य॑ ।
आ नो॑ भज ब॒र्हिषि॑ जीवशं॒से यू॒यं पा॑त स्व॒स्तिभि॒: सदा॑ नः ॥४॥
mā no॑ vadhī rudra॒ mā parā॑ dā॒ mā te॑ bhūma॒ prasi॑tau hīḷi॒tasya॑ | ā no॑ bhaja ba॒rhiṣi॑ jīvaśaṃ॒se yū॒yaṃ pā॑ta sva॒stibhi॒: sadā॑ naḥ || ४ ||