EeseDharmaSanātana Library
561मण्डल 7 · सूक्त 45
4 shlokआ दे॒वो या॑तु सवि॒ता सु॒रत्नो॑ऽन्तरिक्ष॒प्रा वह॑मानो॒ अश्वै॑: ।
हस्ते॒ दधा॑नो॒ नर्या॑ पु॒रूणि॑ निवे॒शय॑ञ्च प्रसु॒वञ्च॒ भूम॑ ॥१॥
ā de॒vo yā॑tu savi॒tā su॒ratno॑’ntarikṣa॒prā vaha॑māno॒ aśvai॑: | haste॒ dadhā॑no॒ naryā॑ pu॒rūṇi॑ nive॒śaya॑ñca prasu॒vañca॒ bhūma॑ || १ ||
उद॑स्य बा॒हू शि॑थि॒रा बृ॒हन्ता॑ हिर॒ण्यया॑ दि॒वो अन्ताँ॑ अनष्टाम् ।
नू॒नं सो अ॑स्य महि॒मा प॑निष्ट॒ सूर॑श्चिदस्मा॒ अनु॑ दादप॒स्याम् ॥२॥
uda॑sya bā॒hū śi॑thi॒rā bṛ॒hantā॑ hira॒ṇyayā॑ di॒vo antām̐॑ anaṣṭām | nū॒naṃ so a॑sya mahi॒mā pa॑niṣṭa॒ sūra॑ścidasmā॒ anu॑ dādapa॒syām || २ ||
स घा॑ नो दे॒वः स॑वि॒ता स॒हावा ऽऽसा॑विष॒द्वसु॑पति॒र्वसू॑नि ।
वि॒श्रय॑माणो अ॒मति॑मुरू॒चीं म॑र्त॒भोज॑न॒मध॑ रासते नः ॥३॥
sa ghā॑ no de॒vaḥ sa॑vi॒tā sa॒hāvā ’’sā॑viṣa॒dvasu॑pati॒rvasū॑ni | vi॒śraya॑māṇo a॒mati॑murū॒cīṃ ma॑rta॒bhoja॑na॒madha॑ rāsate naḥ || ३ ||
इ॒मा गिर॑: सवि॒तारं॑ सुजि॒ह्वं पू॒र्णग॑भस्तिमीळते सुपा॒णिम् ।
चि॒त्रं वयो॑ बृ॒हद॒स्मे द॑धातु यू॒यं पा॑त स्व॒स्तिभि॒: सदा॑ नः ॥४॥
i॒mā gira॑: savi॒tāraṃ॑ suji॒hvaṃ pū॒rṇaga॑bhastimīḷate supā॒ṇim | ci॒traṃ vayo॑ bṛ॒hada॒sme da॑dhātu yū॒yaṃ pā॑ta sva॒stibhi॒: sadā॑ naḥ || ४ ||