EeseDharmaSanātana Library
559मण्डल 7 · सूक्त 43
5 shlokप्र वो॑ य॒ज्ञेषु॑ देव॒यन्तो॑ अर्च॒न्द्यावा॒ नमो॑भिः पृथि॒वी इ॒षध्यै॑ ।
येषां॒ ब्रह्मा॒ण्यस॑मानि॒ विप्रा॒ विष्व॑ग्वि॒यन्ति॑ व॒निनो॒ न शाखा॑: ॥१॥
pra vo॑ ya॒jñeṣu॑ deva॒yanto॑ arca॒ndyāvā॒ namo॑bhiḥ pṛthi॒vī i॒ṣadhyai॑ | yeṣāṃ॒ brahmā॒ṇyasa॑māni॒ viprā॒ viṣva॑gvi॒yanti॑ va॒nino॒ na śākhā॑: || १ ||
प्र य॒ज्ञ ए॑तु॒ हेत्वो॒ न सप्ति॒रुद्य॑च्छध्वं॒ सम॑नसो घृ॒ताची॑: ।
स्तृ॒णी॒त ब॒र्हिर॑ध्व॒राय॑ सा॒धूर्ध्वा शो॒चींषि॑ देव॒यून्य॑स्थुः ॥२॥
pra ya॒jña e॑tu॒ hetvo॒ na sapti॒rudya॑cchadhvaṃ॒ sama॑naso ghṛ॒tācī॑: | stṛ॒ṇī॒ta ba॒rhira॑dhva॒rāya॑ sā॒dhūrdhvā śo॒cīṃṣi॑ deva॒yūnya॑sthuḥ || २ ||
आ पु॒त्रासो॒ न मा॒तरं॒ विभृ॑त्रा॒: सानौ॑ दे॒वासो॑ ब॒र्हिष॑: सदन्तु ।
आ वि॒श्वाची॑ विद॒थ्या॑मन॒क्त्वग्ने॒ मा नो॑ दे॒वता॑ता॒ मृध॑स्कः ॥३॥
ā pu॒trāso॒ na mā॒taraṃ॒ vibhṛ॑trā॒: sānau॑ de॒vāso॑ ba॒rhiṣa॑: sadantu | ā vi॒śvācī॑ vida॒thyā॑mana॒ktvagne॒ mā no॑ de॒vatā॑tā॒ mṛdha॑skaḥ || ३ ||
ते सी॑षपन्त॒ जोष॒मा यज॑त्रा ऋ॒तस्य॒ धारा॑: सु॒दुघा॒ दुहा॑नाः ।
ज्येष्ठं॑ वो अ॒द्य मह॒ आ वसू॑ना॒मा ग॑न्तन॒ सम॑नसो॒ यति॒ ष्ठ ॥४॥
te sī॑ṣapanta॒ joṣa॒mā yaja॑trā ṛ॒tasya॒ dhārā॑: su॒dughā॒ duhā॑nāḥ | jyeṣṭhaṃ॑ vo a॒dya maha॒ ā vasū॑nā॒mā ga॑ntana॒ sama॑naso॒ yati॒ ṣṭha || ४ ||
ए॒वा नो॑ अग्ने वि॒क्ष्वा द॑शस्य॒ त्वया॑ व॒यं स॑हसाव॒न्नास्क्रा॑: ।
रा॒या यु॒जा स॑ध॒मादो॒ अरि॑ष्टा यू॒यं पा॑त स्व॒स्तिभि॒: सदा॑ नः ॥५॥
e॒vā no॑ agne vi॒kṣvā da॑śasya॒ tvayā॑ va॒yaṃ sa॑hasāva॒nnāskrā॑: | rā॒yā yu॒jā sa॑dha॒mādo॒ ari॑ṣṭā yū॒yaṃ pā॑ta sva॒stibhi॒: sadā॑ naḥ || ५ ||