EeseDharmaSanātana Library
520मण्डल 7 · सूक्त 4
10 shlokप्र व॑: शु॒क्राय॑ भा॒नवे॑ भरध्वं ह॒व्यं म॒तिं चा॒ग्नये॒ सुपू॑तम् ।
यो दैव्या॑नि॒ मानु॑षा ज॒नूंष्य॒न्तर्विश्वा॑नि वि॒द्मना॒ जिगा॑ति ॥१॥
pra va॑: śu॒krāya॑ bhā॒nave॑ bharadhvaṃ ha॒vyaṃ ma॒tiṃ cā॒gnaye॒ supū॑tam | yo daivyā॑ni॒ mānu॑ṣā ja॒nūṃṣya॒ntarviśvā॑ni vi॒dmanā॒ jigā॑ti || १ ||
स गृत्सो॑ अ॒ग्निस्तरु॑णश्चिदस्तु॒ यतो॒ यवि॑ष्ठो॒ अज॑निष्ट मा॒तुः ।
सं यो वना॑ यु॒वते॒ शुचि॑द॒न्भूरि॑ चि॒दन्ना॒ समिद॑त्ति स॒द्यः ॥२॥
sa gṛtso॑ a॒gnistaru॑ṇaścidastu॒ yato॒ yavi॑ṣṭho॒ aja॑niṣṭa mā॒tuḥ | saṃ yo vanā॑ yu॒vate॒ śuci॑da॒nbhūri॑ ci॒dannā॒ samida॑tti sa॒dyaḥ || २ ||
अ॒स्य दे॒वस्य॑ सं॒सद्यनी॑के॒ यं मर्ता॑सः श्ये॒तं ज॑गृ॒भ्रे ।
नि यो गृभं॒ पौरु॑षेयीमु॒वोच॑ दु॒रोक॑म॒ग्निरा॒यवे॑ शुशोच ॥३॥
a॒sya de॒vasya॑ saṃ॒sadyanī॑ke॒ yaṃ martā॑saḥ śye॒taṃ ja॑gṛ॒bhre | ni yo gṛbhaṃ॒ pauru॑ṣeyīmu॒voca॑ du॒roka॑ma॒gnirā॒yave॑ śuśoca || ३ ||
अ॒यं क॒विरक॑विषु॒ प्रचे॑ता॒ मर्ते॑ष्व॒ग्निर॒मृतो॒ नि धा॑यि ।
स मा नो॒ अत्र॑ जुहुरः सहस्व॒: सदा॒ त्वे सु॒मन॑सः स्याम ॥४॥
a॒yaṃ ka॒viraka॑viṣu॒ prace॑tā॒ marte॑ṣva॒gnira॒mṛto॒ ni dhā॑yi | sa mā no॒ atra॑ juhuraḥ sahasva॒: sadā॒ tve su॒mana॑saḥ syāma || ४ ||
आ यो योनिं॑ दे॒वकृ॑तं स॒साद॒ क्रत्वा॒ ह्य१ग्निर॒मृताँ॒ अता॑रीत् ।
तमोष॑धीश्च व॒निन॑श्च॒ गर्भं॒ भूमि॑श्च वि॒श्वधा॑यसं बिभर्ति ॥५॥
ā yo yoniṃ॑ de॒vakṛ॑taṃ sa॒sāda॒ kratvā॒ hya१gnira॒mṛtām॒̐ atā॑rīt | tamoṣa॑dhīśca va॒nina॑śca॒ garbhaṃ॒ bhūmi॑śca vi॒śvadhā॑yasaṃ bibharti || ५ ||
ईशे॒ ह्य१ग्निर॒मृत॑स्य॒ भूरे॒रीशे॑ रा॒यः सु॒वीर्य॑स्य॒ दातो॑: ।
मा त्वा॑ व॒यं स॑हसावन्न॒वीरा॒ माप्स॑व॒: परि॑ षदाम॒ मादु॑वः ॥६॥
īśe॒ hya१gnira॒mṛta॑sya॒ bhūre॒rīśe॑ rā॒yaḥ su॒vīrya॑sya॒ dāto॑: | mā tvā॑ va॒yaṃ sa॑hasāvanna॒vīrā॒ māpsa॑va॒: pari॑ ṣadāma॒ mādu॑vaḥ || ६ ||
प॒रि॒षद्यं॒ ह्यर॑णस्य॒ रेक्णो॒ नित्य॑स्य रा॒यः पत॑यः स्याम ।
न शेषो॑ अग्ने अ॒न्यजा॑तम॒स्त्यचे॑तानस्य॒ मा प॒थो वि दु॑क्षः ॥७॥
pa॒ri॒ṣadyaṃ॒ hyara॑ṇasya॒ rekṇo॒ nitya॑sya rā॒yaḥ pata॑yaḥ syāma | na śeṣo॑ agne a॒nyajā॑tama॒styace॑tānasya॒ mā pa॒tho vi du॑kṣaḥ || ७ ||
न॒हि ग्रभा॒यार॑णः सु॒शेवो॒ऽन्योद॑र्यो॒ मन॑सा॒ मन्त॒वा उ॑ ।
अधा॑ चि॒दोक॒: पुन॒रित्स ए॒त्या ऽऽनो॑ वा॒ज्य॑भी॒षाळे॑तु॒ नव्य॑: ॥८॥
na॒hi grabhā॒yāra॑ṇaḥ su॒śevo॒’nyoda॑ryo॒ mana॑sā॒ manta॒vā u॑ | adhā॑ ci॒doka॒: puna॒ritsa e॒tyā ’’no॑ vā॒jya॑bhī॒ṣāḷe॑tu॒ navya॑: || ८ ||
त्वम॑ग्ने वनुष्य॒तो नि पा॑हि॒ त्वमु॑ नः सहसावन्नव॒द्यात् ।
सं त्वा॑ ध्वस्म॒न्वद॒भ्ये॑तु॒ पाथ॒: सं र॒यिः स्पृ॑ह॒याय्य॑: सह॒स्री ॥९॥
tvama॑gne vanuṣya॒to ni pā॑hi॒ tvamu॑ naḥ sahasāvannava॒dyāt | saṃ tvā॑ dhvasma॒nvada॒bhye॑tu॒ pātha॒: saṃ ra॒yiḥ spṛ॑ha॒yāyya॑: saha॒srī || ९ ||
ए॒ता नो॑ अग्ने॒ सौभ॑गा दिदी॒ह्यपि॒ क्रतुं॑ सु॒चेत॑सं वतेम ।
विश्वा॑ स्तो॒तृभ्यो॑ गृण॒ते च॑ सन्तु यू॒यं पा॑त स्व॒स्तिभि॒: सदा॑ नः ॥१०॥
e॒tā no॑ agne॒ saubha॑gā didī॒hyapi॒ kratuṃ॑ su॒ceta॑saṃ vatema | viśvā॑ sto॒tṛbhyo॑ gṛṇa॒te ca॑ santu yū॒yaṃ pā॑ta sva॒stibhi॒: sadā॑ naḥ || १० ||