EeseDharmaSanātana Library
544मण्डल 7 · सूक्त 28
5 shlokब्रह्मा॑ ण इ॒न्द्रोप॑ याहि वि॒द्वान॒र्वाञ्च॑स्ते॒ हर॑यः सन्तु यु॒क्ताः ।
विश्वे॑ चि॒द्धि त्वा॑ वि॒हव॑न्त॒ मर्ता॑ अ॒स्माक॒मिच्छृ॑णुहि विश्वमिन्व ॥१॥
brahmā॑ ṇa i॒ndropa॑ yāhi vi॒dvāna॒rvāñca॑ste॒ hara॑yaḥ santu yu॒ktāḥ | viśve॑ ci॒ddhi tvā॑ vi॒hava॑nta॒ martā॑ a॒smāka॒micchṛ॑ṇuhi viśvaminva || १ ||
हवं॑ त इन्द्र महि॒मा व्या॑न॒ड्ब्रह्म॒ यत्पासि॑ शवसि॒न्नृषी॑णाम् ।
आ यद्वज्रं॑ दधि॒षे हस्त॑ उग्र घो॒रः सन्क्रत्वा॑ जनिष्ठा॒ अषा॑ळ्हः ॥२॥
havaṃ॑ ta indra mahi॒mā vyā॑na॒ḍbrahma॒ yatpāsi॑ śavasi॒nnṛṣī॑ṇām | ā yadvajraṃ॑ dadhi॒ṣe hasta॑ ugra gho॒raḥ sankratvā॑ janiṣṭhā॒ aṣā॑ḷhaḥ || २ ||
तव॒ प्रणी॑तीन्द्र॒ जोहु॑वाना॒न्त्सं यन्नॄन्न रोद॑सी नि॒नेथ॑ ।
म॒हे क्ष॒त्राय॒ शव॑से॒ हि ज॒ज्ञेऽतू॑तुजिं चि॒त्तूतु॑जिरशिश्नत् ॥३॥
tava॒ praṇī॑tīndra॒ johu॑vānā॒ntsaṃ yannṝnna roda॑sī ni॒netha॑ | ma॒he kṣa॒trāya॒ śava॑se॒ hi ja॒jñe’tū॑tujiṃ ci॒ttūtu॑jiraśiśnat || ३ ||
ए॒भिर्न॑ इ॒न्द्राह॑भिर्दशस्य दुर्मि॒त्रासो॒ हि क्षि॒तय॒: पव॑न्ते ।
प्रति॒ यच्चष्टे॒ अनृ॑तमने॒ना अव॑ द्वि॒ता वरु॑णो मा॒यी न॑: सात् ॥४॥
e॒bhirna॑ i॒ndrāha॑bhirdaśasya durmi॒trāso॒ hi kṣi॒taya॒: pava॑nte | prati॒ yaccaṣṭe॒ anṛ॑tamane॒nā ava॑ dvi॒tā varu॑ṇo mā॒yī na॑: sāt || ४ ||
वो॒चेमेदिन्द्रं॑ म॒घवा॑नमेनं म॒हो रा॒यो राध॑सो॒ यद्दद॑न्नः ।
यो अर्च॑तो॒ ब्रह्म॑कृति॒मवि॑ष्ठो यू॒यं पा॑त स्व॒स्तिभि॒: सदा॑ नः ॥५॥
vo॒cemedindraṃ॑ ma॒ghavā॑namenaṃ ma॒ho rā॒yo rādha॑so॒ yaddada॑nnaḥ | yo arca॑to॒ brahma॑kṛti॒mavi॑ṣṭho yū॒yaṃ pā॑ta sva॒stibhi॒: sadā॑ naḥ || ५ ||