EeseDharmaSanātana Library
543मण्डल 7 · सूक्त 27
5 shlokइन्द्रं॒ नरो॑ ने॒मधि॑ता हवन्ते॒ यत्पार्या॑ यु॒नज॑ते॒ धिय॒स्ताः ।
शूरो॒ नृषा॑ता॒ शव॑सश्चका॒न आ गोम॑ति व्र॒जे भ॑जा॒ त्वं न॑: ॥१॥
indraṃ॒ naro॑ ne॒madhi॑tā havante॒ yatpāryā॑ yu॒naja॑te॒ dhiya॒stāḥ | śūro॒ nṛṣā॑tā॒ śava॑saścakā॒na ā goma॑ti vra॒je bha॑jā॒ tvaṃ na॑: || १ ||
य इ॑न्द्र॒ शुष्मो॑ मघवन्ते॒ अस्ति॒ शिक्षा॒ सखि॑भ्यः पुरुहूत॒ नृभ्य॑: ।
त्वं हि दृ॒ळ्हा म॑घव॒न्विचे॑ता॒ अपा॑ वृधि॒ परि॑वृतं॒ न राध॑: ॥२॥
ya i॑ndra॒ śuṣmo॑ maghavante॒ asti॒ śikṣā॒ sakhi॑bhyaḥ puruhūta॒ nṛbhya॑: | tvaṃ hi dṛ॒ḷhā ma॑ghava॒nvice॑tā॒ apā॑ vṛdhi॒ pari॑vṛtaṃ॒ na rādha॑: || २ ||
इन्द्रो॒ राजा॒ जग॑तश्चर्षणी॒नामधि॒ क्षमि॒ विषु॑रूपं॒ यदस्ति॑ ।
ततो॑ ददाति दा॒शुषे॒ वसू॑नि॒ चोद॒द्राध॒ उप॑स्तुतश्चिद॒र्वाक् ॥३॥
indro॒ rājā॒ jaga॑taścarṣaṇī॒nāmadhi॒ kṣami॒ viṣu॑rūpaṃ॒ yadasti॑ | tato॑ dadāti dā॒śuṣe॒ vasū॑ni॒ coda॒drādha॒ upa॑stutaścida॒rvāk || ३ ||
नू चि॑न्न॒ इन्द्रो॑ म॒घवा॒ सहू॑ती दा॒नो वाजं॒ नि य॑मते न ऊ॒ती ।
अनू॑ना॒ यस्य॒ दक्षि॑णा पी॒पाय॑ वा॒मं नृभ्यो॑ अ॒भिवी॑ता॒ सखि॑भ्यः ॥४॥
nū ci॑nna॒ indro॑ ma॒ghavā॒ sahū॑tī dā॒no vājaṃ॒ ni ya॑mate na ū॒tī | anū॑nā॒ yasya॒ dakṣi॑ṇā pī॒pāya॑ vā॒maṃ nṛbhyo॑ a॒bhivī॑tā॒ sakhi॑bhyaḥ || ४ ||
नू इ॑न्द्र रा॒ये वरि॑वस्कृधी न॒ आ ते॒ मनो॑ ववृत्याम म॒घाय॑ ।
गोम॒दश्वा॑व॒द्रथ॑व॒द्व्यन्तो॑ यू॒यं पा॑त स्व॒स्तिभि॒: सदा॑ नः ॥५॥
nū i॑ndra rā॒ye vari॑vaskṛdhī na॒ ā te॒ mano॑ vavṛtyāma ma॒ghāya॑ | goma॒daśvā॑va॒dratha॑va॒dvyanto॑ yū॒yaṃ pā॑ta sva॒stibhi॒: sadā॑ naḥ || ५ ||